​Буряадай балет бахархуулаа

Ноябриин 7-до Буряадай баледэй түлөөлэгшэд Александрийска театрай тайзан дээрэ Санкт-Петербургын харагшадай нэрьемэ альга ташалганда хүртөө.

“Баледэй үдэшын” программада дэлхэйн алтан жасада ороһон болон мүнөөнэй үеын баледүүдһээ шэлэгдэмэл хэһэгүүд, мүн тиихэдэ “Ангар дүүхэй” гэһэн үндэһэн буряад зүжэгһөө үзэгдэл оруулагдаа юм. Тодорхойлбол, “Щелкунчик”, “Венециин карнавал”, “Князь Игорь” зүжэгүүд, “Үхэжэ байһан хун шубуун”, “Хабарай уһанууд”, “Перс хатар” гэһэн багахан хатарнууд, “Ангар дүүхэйһээ” адажио, “Пенелопа” болон “Юки” зүжэгүүдһээ хэһэгүүд болоно.

Буряадай баледэй уран һайханай талаар хүтэлбэрилэгшэ Морихиро Иватын хэлэһээр, хатаршад тус хэмжээ ябуулгада ехэ харюусалгатайгаар хандаа, харагшадшье ехэ дулаанаар манай хатаршадые угтан абаа.