​Бүхы дэлхэйн буряадууд Сагаалганаа ёохор наадаар угтаба

Улаан-Үдэ хотын түбтэ, Буряадай оперо болон баледэй театрай урдахи талмай дээрэ, «Буряад үнэн» Хэблэлэй байшанай заншалта ёһоороо Са­гаалганай үдэр эмхидхэдэг ёохорто хүн зон ерэжэ, дүхэриглэжэ наадаба. Энэл талмай дээрэ хабсаргагдаһан томо гэгшын дэлгэсэһээ холын газар дайдада түбхинэһэн аха дүү буряад зон Улаан-Үдынгөө ажаһуугшадые Сага­алганаар хани халуунаар амаршалба, ёохор наадаяа дэл­гэбэ.

«Бүхэдэлхэйн ёохор» нааданда Ахын аймагай «Солныш­ко» сэсэрлигэй эдиршүүл болон хүмүүжүүлэгшэд хубитаяа оруулба. Тэдэнэр дүхэриглэжэ ёохорлоод, тэрэнээ буулгаад, Сагаалганай амаршалга Улаан-Үдэ эльгээhэн байна.

Зургаан жэлэй түүхэтэй «Бүхэдэлхэйн ёохорые» хүн зон телевизорээр «Ариг Ус» телеканалаар хараха аргатай байба. Сагаалган – буряад-монголшуудай шэнэ жэл ха юм даа. Оро­дой Холбооной Уласай Жабар Үбгэн Великий Устюг хотоһоо зорюута Улаан-Үдэ ерэжэ, ёохорто сугларһан буряадуудые хани халуунаар амаршалба.

- Ёохор наадан гээшэ ехэл гүн удхатай хатар юм байна. Арад зоноо, дэлхэйн бүхы түбинүүдтэ ажаhуудаг үндэhэтэнөө ии­гэжэ нэгэдхэжэ байхада, эб эетэй, амгалан байдалай үндэһэ һуури түхөөгдэнэ ха юм. Һайндэрөөр бултанииетнай! – гэжэ Жабар Үбгэн амаршалба. Сагаалганай үдэр дэлхэйн 40 гаран газар нютагуудта буряадууд ёохорлобо. Ганса Улаан-Үдэ хо­тодо ёохор наада 500 гаран хүн хатарба. Тэдэнэр ёохор хата­рай 50 ондоо янза мэдэхэ болоо. «Бүхэдэлхэйн ёохор-2017» гэһэн хэмжээ ябуулгада мэргэжэлтэ артистнууд эдэбхитэй­гээр хабаадажа, сугларагша олониие эмхитэйгээр хатаруу­лаа. Олон үндэһэ яһатанай ажаһуудаг Буряад ороной арадуу­дай ёһо заншалнуудаа сахин hэргээхэ хэрэгтэ, мүн бүгэдэнэй эбтэй эетэй ажаһуудалда өөрын хубита оруулһан уран hайханай бүлгэмүүдые эндэ дурдамаар байна: «Амар сайн» (хүтэлбэрилэгшэнь - Владимир Очирович Бухаев), «Найдал» (хүтэлбэрилэгшэнь Оксана Цырендоржиевна Сансуева), «Ха­раасгай» (хүтэлбэрилэгшэнь Суржима Шагдыровна Базаро­ва), «Хяагта» (хүтэлбэрилэгшэнь Гырылма Владимировна Дашипылова), «Хадаг» (хүтэлбэрилэгшэнь Ешин-Хорло Бу­дуевна Гомбоин), «Лотос» (хүтэлбэрилэгшэнь Татьяна Васи­льевна Ци-Ю-Фа), «Уряал» (хүтэлбэрилэгшэнь Аюша Даба­евич Ринчинов), «Наран-Гоохон» (хүтэлбэрилэгшэнь Мария Антоновна Ербахаева), Буряадай гүрэнэй ехэ һургуулиин оюутадай «Байгалай долгинууд» ансамбльнууд.

Сагаалганай үдэр, шэнын нэгэндэ, Улаан-Үдын үдэшын 18 сагта 15 гүрэндэ ажаһуудаг зуу гаран буряадууд ёохор наадандаа сугларжа, огсом дорюунаар ха­тарба. Мүнөө жэлдэ Буряад Уласай бүхы шахуу аймагууд «Буряад үнэн» Хэблэлэй байшанай зарлаһан уряа шагнажа, ёохороо табиба. Хүршэ Эрхүү можын 12 ай­магта ёохор хатарһан тухайгаа видео буулгаад, манда эльгээһэн байна.

Гүрэнэй 10 можо нютагуудта ёохор наа­дан мүн лэ дэлгэгдээ. Европо түбиин - Испа­ни, Франци, Америкэ түбиин Америкын Хол­боото Штадууд, Ази түбиин – Монгол Улас, дүн хамта 15 гүрэндэ ажаһуудаг буряадууд ёохороо хатаржа, 46 видеоролик буулгажа эльгээгээ. Германиин Берлин, Польшын Кра­ков хотонуудай буряадууд түрүүшынхиеэ хабаадаа. Японидо ажаһуудаг буряадууд суг хүдэлдэг олон яһанай хүнүүдые ёохор хатаржа һургаа. Бүхэдэлхэйн ёохор тухай һонин мэдээнүүд Твиттер гэжэ микроблог­то 2013 ондо үдэрэй 12 сагта #Бүхэдэлхэйн ёохор гэжэ хэштег Интернедэй Ород гүрэнэй хубида нэгэдэхи һуури эзэлһэн байна. 2016 ондо ёохор хатарагшад 140 гэрэл зу­раг буулгажа абаһан байна. Тиихэдэ «Би бүхэдэлхэйн ёохорто хабааданаб» гэһэн конкурс зарлагдаһан байгаа. Бүхэдэлхэйн ёохор хатархада, эгээн жабартай үдэр Яхад Уласта тогтоо. Харин ааяма халуун уларилда Тайландын Пхукет гэжэ газарта амарагшад буряад ёохороо хатараа. Америкын Холбоо­то Штадуудай Нью-Йорк хотодо ажаһуудаг буряадууд 500 бууза мушхаһан байна. Хари гүрэнүүдтэ ажаһуугшадай ёохор хатархыень хоёр нюдөөрөө харахаяа хүсэбэл, #yokhor гэжэ хэштег Интернедтэ ороходоо бэшэгты. Тиихэдэтнай, энэ жэлдэ буулгагдаһан ёохор тэрэ дороо гараха.

Видеоролигуудһаа хуулажа абтаһан зурагууд

Анна Огороднигой гэрэл зурагууд