Крымэй дулаахан хабар

«Крымэй хабар» гурбадахияа мүндэлжэ, үргэн уужам гүрэн түрэдэмнай ажаһуудаг бүхы зоной зүрхэ сэдьхэл баяраар халяаба.

“Гэртээ бусабабди, түрэл орондоо ерэбэбди” гэһэн уряа доро гурбан жэлэй саада тээ Крым Уласай болон Баатар хото Севастополиин ажаһуугшад бултадаа шахуу дуугаа үгэжэ, Ородой Холбоото Уласай мэдэлдэ орохо тухай түүхэтэ шиидхэбэри абаһан юм.

2014 оной мартын 18-да Кремлиин ордондо тусхай Хэлсээн баталагдажа, эрхэтэн зоной, арадай һанамжа хуулиин ёһоор батадхагдаһан байгаа. Энэ түүхэтэ үйлэ хэрэг гүрэнэймнай ехэ һайндэр болоо. Гурбан жэлэй туршада Хара далайн эрьедэ оршодог хото улас хоёрой, тэндэ ажамидардаг арад түмэнэй ажабайдал эгсэ хубилаа. Дайн дажарай хара утаан, алуурша дээрмэшэ һэшхэлгүйшүүлэй үхэл тахал асардаг ябадал үзэхэеэ болиһон зоной баяр юугээр сэгнэхээр бэ?

Жэл бүри хабарай эхиндэ гүрэн түрымнай бүхы дэбисхэр дээрэ арадай һайндэр үргэнөөр тэмдэглэхэ заншал бии болоо. Энэ удаа Буряадаймнай нютаг бүхэндэ элдэб хэмжээ ябуулганууд үнгэргэгдэжэ, хүн зомнай хүгшэн залуугүй хүхибэд. Уласай Толгойлогшын уялга саг зуура дүүргэгшэ дарга Алексей Цыденов Улаан-Үдэдэ болоһон нааданда хабаадалсахадаа, сугларһан зоной урда хүн бүхэнэй дуулажал байдаг үгэнүүдые хэлэнгүй, юрын зонтой, залуушуултай хөөрэлдөө, наадануудта дуратайгаар хабаадалсаа.