​Гүрэн түрын сайд Буряадтамнай морилоо

Үсэгэлдэр Ородой Холбоото Уласай транспортын сайд Максим Со­колов албанай хэрэгээр Улаан-Үдэ ерэбэ. Буряад Уласай Толгой­логшын уялга дүүргэгшэ Алексей Цыденов “Байгал” аэропортдо хүндэтэ айлшаниие угтаба. Тэндэ Буряад Уласай аэродромой ком­плексые һэльбэн шэнэдхэхэ талаар хүдэлмэри ямараар ябуулагдана гээ­шэб гэжэ Максим Соколов хараба. Хангалгын байгууламжын хүгжэхэдэ, Буряад Уласта ямаршье самолёдууд бууха аргатай болохо гэжэ сайд тэмдэглээ. Буряад Улас аяншалагшадта 2-дохи Швейцари мэтэ боло­хо ёһотой, тиимэһээ Улаан-Үдын аэропортдо ямаршье самолёдууд буу­ха аргатай болохонь шухала гэжэ Буряад Уласай Толгойлогшын уялга дүүргэгшэ Алексей Цыденов хэлэбэ.

2016 оной сентябрь һараһаа Улаан-Үдын аэропортдо баригдажа эхилһэн ниидэлгын зурууд Максим Соколов шалгажа, ажалай зүблөө үнгэргэбэ.

- Транспортын хангалгын бай­гууламжын талаар ехэ барилга хэг­дэхэ. Нэн түрүүн Улаан-Үдын аэро­порт заһабарилагдаха юм. Тиимэһээ ямаршье агаарай онгосонууд эндэ бууха аргатай болохо,- гэжэ Максим Соколов хэлэбэ.

Буряад Уласай Толгойлогшын уялга дүүргэгшэ Алексей Цыде­нов федеральна хэмжээндэ уласые дэмжэһэнэйнь түлөө сайдта баярые хүргэбэ.

- Танай дэмжэлгээр “Победа” авиакомпанитай хэлсээ баталаабди. Мүнөө ниидэлгын зурууд барилга хэгдэжэ байна. Саашадаа терминал хүгжөөхэ талаар ажал ябуулагдахань шухала, - гэжэ тэрэ хэлэбэ.

Баригдажа эхилһэн ниидэлгын зурууд 2018 ондо ашаглалгада ту­шаагдаха юм. Энэ барилгаар зарим тэды асуудалнуудые шиидхэхээр гэжэ Максим Соколов тэмдэглэбэ. Федеральна бюджедһээ энэ хэрэгтэ аэродромой комплексын һэльбэн заһабарилгада 4 млрд түхэриг мүнгэн һомологдоод, ажалынь гур­бан һараар хожомдожо байна. Ти­игэбэшье ехэ ажал хэгдэһэн байна, - гэжэ транспортын сайд тэмдэглэбэ.

Ородой Холбоото Уласай транс­портын сайдай хэлэһээр, 27 хото­до “Аюулгүй, һайн шанартай хар­гы зам” гэһэн федеральна түсэл бэелүүлэгдэхэ гэжэ хараалагдаһан байгаа. Харин 2017 ондо Улаан-Үдэ, Калининград хотонууд эндэ нэмэг­дэжэ оруулагдаһан байгаа. Улаан-Үдэ хотын харгы заһабарилгада 11 млрд түхэриг гаргашалагдаха юм.

Транспортын хүгжэлтэһөө бүхы һалбаринууд дулдыдана.

“Аюулгүй, һайн шанартай харгы зам” гэһэн федеральна түсэл олондо һайшаагдаа. Улаан-Үдэдэ иимэ ехэ харгын барилга анханһаа хэгдээгүй. Буряад Уласта оршодог федераль­на харгы заһабарилгада 4,5 млрд түхэриг гаргашалагдаха, харгы заһабарилагдаха мүнгэн тэдхэмжэ­тэй хамта тоолобол, 6 млрд шахуу түхэриг федеральна бюджедһээ һомологдохо, - гэжэ Алексей Цыде­нов хэлэбэ.

Үшөө тиихэдэ Байгал хүрэтэр ошохо харгы заһабарилагдаха шуха­ла гэжэ транспортын сайд хэлэбэ.

- Уһан дээгүүр тамарха арга бэелүүлхэ шухала, - гэжэ Максим Со­колов хэлэбэ.

Гурбан һарын туршада Байгал далайда онгосоор тамарха тухай программа бэлдэхэ даабари тэрэ үгэбэ. Хоёр можо нютагуудай хизаар­та оршодог Байгал далай хоёр можо хамтадаа энэ талаар ажал ябуулха болоно. Түрүүшын шатада нуур бо­лон голнуудай федеральна агент­ствэдэ энэ асуудалаар ажалай бүлэг байгуулжа, Буряад Уласай, Эрхүү мо­жын болон транспортын компани­нууд суг хүдэлмэри ябуулха шухала гэжэ транспортын сайд хэлэбэ. 2017 оной августын 1 болотор программа бэлдэхэ болзор тэрэ үгэбэ.

Түмэр замай харгы баһал һайн шанартай байха шухала гэжэ Мак­сим Соколов тэмдэглээ.

Аяншалгын федеральна агент­ство Байгалай эрьедэ амархаа ерэһэн аяншалагшадһаа мүнгэ суглуулха ту­хай дурадхал зүбшэбэ. Аяншалгын агентствын хүтэлбэрилэгшын ор­логшо Николай Королёвой хэлэһээр, энэ асуудал һайса бодожо үзэхэ шу­хала. Суглуулһан мүнгэ уласай бюд­жедтэ оруулха гэбэл, гарай мүнгөөр тоосоо хэхэгүй, харин аяншалгын газарнуудые арилгаха, болбосон түхэлтэй болгохо ажал ябуулгада СМС-бэшэлгээр мүнгэ суглуулжа бо­лохо гэжэ Буряад Уласай Толгойлог­шын уялга дүүргэгшэ Алексей Цы­денов хэлэбэ.

- Энэ хэмжээ ябуулгые Байгал шадархи дайда хизаарта бэелүүлхэдэ, тааруу байха. Үндэһэтэнэй дар­хан газарнууд өөһэдынгөө дайдада хүнүүдые оруулхадаа, тэдэндэ туһа хүргэхэдөө, мүнгэ суглуулна ха юм. Хайшан гэжэ, ямар аргаар мүнгэн суглуулагдахаб гэжэ һайса бодожо үзэхэ хэрэгтэй, - гэжэ Николай Коро­лёв хэлээ.

- Байгалай эрьедэ амархаяа ерэһэн хүнүүдэй ерэхэдэ баяртайб­ди. Зүгөөр тэдэнэр сэбэр оршон той­рондо амарха эрхэтэй. СМС-бэшэгэй аргаар мүнгэ суглуулжа болоно. Мүнгөө түлэһэн тухай томьёо тэмдэг (код) абажа болохо. Гараар суглуулһан мүнгэн нэгэ «бэрхын» хармаанда орошохо юм. Иимэ байдал маанадта огто таарахагүй гэжэ Алексей Цыде­нов хэлэбэ.

Красноярск хотодо үнгэргэгдэһэн эдэй засагай хуралдаанда Буряад Ула­сай Толгойлогшын уялга дүүргэгшэ Алексей Цыденов аяншалагшадһаа мүнгэ суглуулха гэһэн дурадхал оруулһан байна.