790
2017 оной майн 19- 21-нэй үдэрнүүдтэ Улаан-Үдэдэ Саха (Яхад) Уласай гүрэнэй Эдир харагшын театр “Үльгэр” театрай тайзан дээрэ зүжэгүүдые харуулха.
“С благодарностью учителю” гэһэн гаршаг доро эмхидхэгдэһэн гастрольнууд Ородой Холбоото Уласай бүридэлдэ Саха (Яхад) Уласай ороһоор 385 жэлэй, театрай байгуулагдаһаар 25 жэлэй ойн баярнуудта зорюулагдана. Эдэнэр Улаан-Үдэ, Москва, Казань хотонуудаар зүжэг наадануудые табиха түсэбтэй. Эдир харагшын театрай коллектив мэргэжэл олгоһон багшанартаа баярые хүргэжэ, энэ хэмжээ ябуулга зорюулна. Зүжэгшэдэй олонхинь Зүүн Сибириин соёл урлагай ехэ һургуули дүүргэһэн байжа, Эдир харагшын театр Улаан-Үдэ хүрэнгүй гараха аргагүй байба.
Майн 20-до француз драматург Эжен Ионескын бэшэһэн, Саха (Яхад) Уласай соёлой габьяата хүдэлмэрилэгшэ Карл Сергучёвой найруулһан “Король умирает” гэһэн зүжэг харагшадай һонорто дурадхагдаха. Ородой Холбоото Уласай Соёлой габьяата хүдэлмэрилэгшэ, Саха (Яхад) Уласай арадай артист, Эдир харагшын театрай уран һайханай хүтэлбэрилэгшэ Алексей Павлов гол рольдо наадаха юм.
Майн 21-дэ Эдир харагшын театр Хойто зүгэй арадуудай үльгэр домогуудай удхаар Александр Титигировэй найруулһан “Камень счастья” гэһэн зүжэг харуулха. Энэ зүжэг хадаа Белоруссиин Гомель хотодо үнгэргэгдэһэн “Славянские театральные встречи” гэһэн Уласхоорондын фестивалиин, Сербиин Суботица хотодо үнгэргэгдэһэн үхибүүдтэ зорюулагдаһан Уласхоорондын 9-дэхи фестивалиин, Хорватиин Загреб хотодо залуушуул болон үхибүүдэй театрнуудай дунда эмхидхэгдэһэн “NAJNAJNAJ” гэһэн Уласхоорондын фестивалиин, Якутск хотодо үнгэргэгдэһэн “Сказки на земле Олонхо” гэһэн Бүхэроссиин хүүгэдэй театрай урлагай фестивалиин , “Желанный берег” гэһэн Саха Уласай театрай фестивалиин лауреат болоһон байна. Үшөө тиихэдэ, Монгол гүрэнэй Улаан-Баатар хотодо эмхидхэгдэһэн “Театр-Дети-Будущее” гэһэн Уласхоорондын нигүүлэсхы сэдьхэлэй фестивальда, Тунисай Набель хотодо үнгэргэгдэһэн Уласхоорондын Неаполиин фестивальда энэ зүжэг табигдаһан юм.
“Үльгэр” театрай фойе соо Яхадай Эдир харагшын театр үзэсхэлэн дэлгэхэ. Буряад Уласта зүжэгүүдэй табиһанай удаа, энэ коллектив Москва хото ошожо, гастроль наадаяа үргэлжэлүүлхэ юм. Һүүлээрнь, Казань хотодо үнгэргэгдэхэ тюрк арадуудай Уласхоорондын 13-дахи фестивальда хабаадаха.
Буряад Уласай Соёлой яаманай сайтһаа гэрэл зураг абтаба.
