761
Буряад Уласай Толгойлогшын уялгануудые дүүргэгшэ Алексей Цыденов үхибүүдэй эмхинүүд, нэгэдэлнүүд, хүдэлөөнүүдые болон эрэмдэг бэетэй үхибүүдые болон тэдэнэй гэр бүлэнүүдые дэмжэхэ асуудалнуудаар Залан хүтэлбэрилгын соведэй зүблөөндэ хэлсэбэ.
Ородой Холбоото Уласай Юрэнхылэгшэ Владимир Путин 2018-2027 онуудта үхибүүдэй арбан жэл гэһэн тогтоол гаргаһан байна. Хүүгэдые хүмүүжүүлхэ, дэмжэхэ, далижуулха асуудал манай гүрэн дотор түрүүлэн байдаг гэжэ Алексей Цыденов тэмдэглэбэ.
Тиимэһээ үхибүүдые олониитын хэмжээ ябуулгануудта хабаадуулха, тэдэнэрые һонирхуулха, нэгэдүүлхэ талаар асуудалнуудта онсо анхарал хандуулагдана.
- Эрэмдэг бэетэй үхибүүд баһал олониитын ажаябуулгада хабаадаха ёһотой, - гэжэ Буряад Уласай Толгойлогшын уялгануудые дүүргэгшэ хэлэбэ.
Улас дотор элдэб янзын шэглэлтэй 50-һаа дээшэ залуушуулай эмхинүүд ажалаа ябуулдаг. Тэдэнэй бүридэлдэ 20-ёод мянган гаран залуушуул хабаададаг гэжэ Буряад Уласай Спортын болон залуушуулай бодолгын талаар сайдай уялгануудые дүүргэгшэ Баир Ангуров хэлэбэ.
- Коммерческэ бэшэ эмхинүүдтэ болбосоролой программын талаар залуушуулда гүрэнэй тэдхэмжэ үзүүлэгдэдэг. 2017 оной июниин 6-8-най үдэрнүүдтэ түсэлэй ажал эмхидхэхэ, худалдаа наймаанай, гүрэнэй бэшэ эмхинүүдтэ Юрэнхылэгшын грантын мүрысөөндэ хабаадаха асудалнуудаар уласай семинар үнгэргэгдэнэ. Тиихэдэ залуушуул ниигэмэй түсэл бэелүүлхэ талаар уласай грантын конкурсдо хабаадаха аргатай, - гэжэ Баир Ангуров тэмдэглэбэ.
Энэ конкурс жэл бүри эмхидхэгдэдэг юм. 2016 ондо олониитын 42 эмхинүүд дэмжэлгэдэ хүртэһэн байна. Байгша ондо түрүүшын шатын дүнгүүдээр 32 эмхинүүд дэмжэгдээ. Тиихэдээ грантын мүнгэн 100 мянганһаа доошо бэшэ юм.
Эрэмдэг бэетэй үхибүүдтэ болон тэдэнэй гэр бүлэнүүдтэ гүрэнэй талаһаа туһалха, дэмжэхэ асуудалнуудаар зүблөөндэ онсолон хэлсэбэ. Буряад Уласай Элүүрые хамгаалгын яаманда “Эрэмдэг бэетэй үхибүүтэй гэр бүлэнүүдтэ эртэлэн туһалха албан хүгжөөхэ, шэнэдхэхэ” гэһэн программын ёһоор, энээниие бэелүүлхэ мэргэжэлтэдые һургаха, эртэлэн туһалха албануудай хүгжэлтэ дэмжэхэ талаар ажалаа үргэлжэлүүлхэ гэһэн шиидхэбэри абтаһан байна.
Анна Огороднигой гэрэл зураг.
