​Турцида амжалта туйлаба

Стамбул хотодо жэл бүри үнгэргэгдэдэг Түүрэг арадуудай залуушуулай уласхоорондын фестивальда Буряад оронһоо Дулма Сунрапова, Хальмаг Уласһаа Гиляна Бембеева гэгшэд уригдаһан байгаа. Энэ фестивальда Казахстан, Афганистан, Сири, Македони, Башкортостан, Кыргызстан, Турци, Узбекистан, Азербайджан, Саха-Яхад, Тыва хабаададаг. 

- Би ходол Турци гүрэн ошохоёо һанадаг һэм. Одоол ошохо арга боломжын олдоходонь, ехэ баярлааб. Дээдэ хэмжээнэй урилдаанда хабаадажа, дүй дүршэлтэй боложо, мүн һайхан газар дайда хаража ерээб. Стамбулда элдэб гүрэнүүдэй бэлигтэй дуушадтай уулзажа танилсааб, - гэжэ Дулма Сунрапова хөөрэбэ. 

Дулма уласхоорондын энэ фестивальда Монгол ороной мэдээжэ хүгжэмшэн, өөрынгөө багша Лхагвадоржын Балхжавай “Зүүдэнд ирсэн хонгохон ээж” гэһэн дуу дуулаа. Монгол хэлэн дээрэ гүйсэдхэгдэһэн ехэ һайхан, сэдьхэл уяруулма энэ дуун бүгэдэндэ һайшаагдаа. 

Дулма Сунрапова зохёохы ажалайнгаа түлэг дундаа ябана. Ород гүрэн болон Монгол орондо мэдээжэ болоһон дуушан Казахстан, Хитад, Франци гүрэнүүдтэ элдэб фестиваль, харалгануудта хабаадахадаа, бэлиг шадабарияа гэршэлжэ, оло дахин амжалта туйлаһан юм. Мүнөө Дулма Сунрапова П.Чайковскиин нэрэмжэтэ Соёл, урлагай колледжын оршон үеын дуунай багшаар хүдэлнэ.

- Би эндэ оройдоол нэгэ жэл багшалжа байнаб. Гэбэшье оюутадни ехэ эдэбхитэйгээр элдэб харалга, урилдаануудта хабаадажа, түрүү һууринуудые эзэлдэг. Эндэ Дондог Тулоновые онсо тэмдэглэлтэй. Дондог “Сагаан һара – 2017” гэһэн Оршон үеын дуунай уласхоорондын харалгада хабаадажа, Буряад Уласай Соёлой яаманай “Найдал” гэһэн тусхай шанда хүртөө. Yшөө нэгэ оюутан Сарюна Бальжинимаева, залуу дуушан, Буряад орондоо болон Монголдо мэдээжэ болонхой, - гэжэ Дулма Владимировна хөөрэнэ. 

Мэдээжэ дуушан, бэлигтэй хүгжэмшэн, оршон үеын дуунай багша Дулма Сунрапова мүнөө зундаа Буряад Улас дотор үнгэргэгдэхэ соёлой бүхы хэмжээ ябуулгануудта эдэбхитэйгээр хабаадаха түсэбтэй.