745
1941 оной июниин 22-рой үдэр гүрэнэймнай түүхэдэ уйдхар гашуудалай үдэр. Энэ үдэр Эсэгэ ороноо хамгаалгын Агууехэ дайн эхилһэн гэжэ мэдээжэ.
Хархис дайсанай эхилһэн хорото дайнда ами наһаяа алдаһан, фашис булимтарагшадай баряанда, ара талын хүндэ байдалда үбдэжэ, үлдэжэ наһа бараһан хүнүүдээ дурсажа, тэдэнэрэй эрэлхэг зориг, баатаршалга хэзээдэшье мартагдашагүй гэжэ энэ үдэр һануулна.
Ородой Холбооной Верховно Соведэй 1992 оной июлиин 13-най тогтоолоор июниин 22-рой үдэр - Эсэгэ ороноо хамгаалагшадай дурасхаалай үдэр гэжэ нэрлэгдэһэн байгаа. Ородой Холбоото Уласай Юрэнхылэгшын 1996 оной июниин 8-да тогтоолой ёһоор энэ үдэр - Уйдхар гашуудалай үдэр гэжэ нэрэтэй болоо.
Июниин 22-то Улаан-Үдэдэ Илалтын дурасхаалай хүшөөгэй дэргэдэ Бүхэроссиин “Дурасхаалай дэнгүүд” гэһэн акци үнгэргэгдэхэ юм.
Энэ хэмжээ ябуулга Эсэгэ ороноо хамгаалгын Агууехэ дайнда ами наһаяа гамнангүй унаһан үбгэ эсэгэнэрэйнгээ, эжынэрэйнгээ баатаршалга сэгнэхэ, эрэлхэг арадай үри һадаһадбди гэжэ ойлгохо, түүхын хуудаһа хубилгагшадта эсэргүүсэхэ гэһэн зорилгонуудые хараална.
Буряад Уласта Эсэгэ ороно хамгаалгын Агууехэ дайнай 10429 ветеранууд ажаһуудаг. Тэдэнэй 546 хүниинь дайнда хабаадаагшад болон дайнда эрэмдэг бэетэй болоһон хүнүүд, 8 мянга шахуу дайнай ара талын ажалда хабаадагшад, 2 мянганһаа дээшэ нүхэрөө алдаһан эхэнэрнүүд болоно.
