​Анаа дасанай зуун найман субаргын найр

Үргэн нэмжэгэр талаар тооһо бурьюулан, тоогүй олон түмэр унаанууд Анаа дасан руу тэгүүлнэ. Хуурай тала хура бороо хүлеэһэн хэбэртэй. Хойноо хүбшэ тайгатай, урдаа уһа голтой үзэсхэлэнтэ һайхан газарта хори буряадуудай гол дасан харагдаадхиба. 

Табан жэлэй саана Анаа дасаниие тойроод эрхиин тоогоор 108 субарга бодхоогдоһон юм. Субаргынгаа дэргэдэ отог бүхэн жэл бүри шэрээгээ дэлгэжэ, найр наада эмхидхэдэг заншалтай. Мүнөөшье айл аймагаараа субаргануудайнгаа хажууда обооролдоно. Майхан табяад, эдеэ хоолоо бэлдэнэ. Анаа дасанай шэрээтэ Лэгсэг ламын дуулгаһаар, 108 жэлдэ энэ найр наадан үргэлжэлхэ. Субарга бүтээгшэд жэлһээ жэлдэ ээлжээгээр эмхидхэлэй тала даажа абана. Удаадахи жэлдэ зургаадахи субарга бодхооһон гэр бүлынхид 108 субаргын найр эмхидхэхэ болоно.

Анаа дасанай 108 субаргын найр үглөөнэй 10 сагһаа ехэ хуралаар эхилээ. Санкт-Петербургда бүтээгдэһэн дүрбэн зүгэй бурхадай рамнай үнгэрөө. Удаань найр наада нээлгын ёһолол һүр жабхалантайгаар үнгэрөө. Барга баатарһаа эхилээд, Хоридой-Мэргэн тухай домогые хориин залуушуул зүжэглэн табяа. 

Буддын шажанай заншалта Сангхын дид-хамба лама Дагба Очиров баярай үгэнүүдые хэлээ. Хори аймагай засаг дарга Юрий Ширабдоржиев, Анаа дасанай шэрээтэ Лэгсэг лама Дарижапов гэгшэд тэнгэри өөдэ хии-мори хиисхүүлээ. Тэрэ хии морин дээрэ Алексей Цыденовэй нэрэ бэшээтэй гэжэ дуулгаа. Ородой Холбоото Уласай Дүүмын һунгамал Алдар Дамдинов, Хори аймагһаа Буряад Уласай Арадай Хуралай һунгамал Галан Гунзынов, Ярууна аймагай засаг дарга Цыденжап Шагдаров, Хэжэнгэ аймагай засаг дарга Геннадий Лхасаранов болон бусад хүндэтэ айлшад баярай үгэнүүдые хэлээ, бэлэгүүдые барюулаа. 

Удаань эрын гурбан наадан, тоглолтонь үдэшэ орой болотор үргэлжэлһэн байна.

Энэ Хий-морин дээрэ Алексей Цыденовэй нэрэ бэшэгдэнхэй

Найр нээлгын үедэ

Барилдаашадай заншалта хатар

Сарюуна Эрдынеевагай гэрэл зурагууд

АЛТАН СУБАРГА АНАА ДАСАНДАА БУСААГДАА 

Далай багшындаа даабаряар алтаар һиилэгдэһэн субарга цанид хамба лама Агван Доржиев Түбэдһөө асаржа, I I дугаар Николай хаанда бэлэглэһэн байгаа. Үндэр түрэлтэ хаан тэрэнииень Анаа дасанда дамжуулһан юм. 1915 он хүрэтэр Согшон дуганай гунгарбаа соо алтан субарга байһан. Дасан дугануудые һандаргааха үеэр Будын Шираб гэдэг габжа лама алтан субарга абаран хадагалжа шадаа. 1950-аад онуудаар тонуулшадай гайхамшагта шүтөөниие хулуугаад наймаалжа ябатар, Агын дасанай Бабуу лама хаража, Үльдэргын уладай аша туһаар худалдажа абаһан юм. Тиигэжэ алтан субарга дахинаа хори буряадуудта бусаһан гээшэ. Олоной гар дамжаһаар хүрэжэ ерэһэн субаргые һаяхана үльдэргынхидэй Бандида хамба лама Дамба Аюшеевтэ барюулхадань, жэгтэй гоёор толоршоо бэлэй. Хамба ламын шиидхэбэреэр алтан субарга анханайнь һуурида - Анаа дасанда залагдаба.