675
Ородой Холбоото Уласай Юрэнхылэгшэ Владимир Путин Байгал шадарай аймагай Черёмушки һууринай ажаһуугшадтай холбоодо гаража харилсаба.
- Бидэ ойн түймэрһөө хохидоһон уласта ерээд байнабди. Түймэрэй хойшолонгуудые усадхалгын ажалнууд яажа ябуулагданаб? Гэрнүүдээ алдаһан хүнүүдтэ мүнгэн хэр зэргэ түлэгдэнэб? Гэрнүүдэй барилга хэзээ дүүрэхэб, хэды мүнгэн һомологдоноб? – гэжэ Владимир Путин асууба.
Буряад Уласай Толгойлогшын уялгануудые дүүргэгшэ Алексей Цыденовэй хэлэһээр, гэрээ алдаһан хүнүүдтэ мүнгэ түлэхэ, гэр бариха асуудалнуудаар ажаһуугшадһаа гомдол ороогүй. Черёмушки һууринда гэрнүүдэй барилгада Сэлэнгын ЦКК 20 млн. түхэриг һомолһон байна.
“Черёмушки һууринда гэрнүүдэй барилга ажаһуугшад өөһэдөө шалгаха, хинаха арга боломжотой байгаа”, - гэжэ Гремячинскын һомоной дарга Оксана Тришкина хэлэбэ.
Эсэгэ ороноо хамгаалгын Агууехэ дайнай ветеран, Черёмушки һууринай ажаһуугша Иван Голощапов шэнээр баригдаһан гэртэй болоһон байна. “Гэргүй болоһон хүнүүдтэ мүнгэ түлэхэ, гэрэй барилгын шанараар зүрилдөөтэ асуудалнууд гараагүй. Түймэрэй хойшолонгуудые усадхаһан, гэрнүүдэй үлэгдэлнүүдые арилгалсаһан һайн дуратанда баяраа мэдүүлнэб”, - гэжэ тэрэ хэлэбэ.
Ородой Холбоото Уласай Юрэнхылэгшэ Владимир Путин гэнэ тодхорто ороһон хүнүүдтэ һайн дураараа туһа хүргэһэн, бог шорой арилгалсаһан хүнүүдтэ баһал баярые хүргэбэ.
“Тохёолдоһон байдал саашадаа хинажа, гэрнүүдэй барилгын ажалнуудые дүүргэжэ, шанарынь шалгаха хэрэгтэй”, - гэжэ Владимир Путин хэлэбэ.
Анна Огороднигой гэрэл зураг.
