814
Мүнөөдэр, августын 21-дэ, Буряад Уласай Толгойлогшын уялга дүүргэгшэ Алексей Цыденов болон Засагай газарай түлөөлэгшэд албанай хэрэгээр Ярууна аймагта ажалаа ябуулна.
Тэдэнэр «Сосново-Озерский Рабкооп» гэһэн хүдөө ажахын үйлэдбэридэридэ хүрэжэ, талхан болон мяханһаа буйлуулһан эдеэ хоол хаража, тэдэнһээ амта хүрэбэ.
Тиихэдэ уласай хүтэлбэрилэгшэдэ Буряад уласай эд хэрэглэгшэдэй ниигэмэй эблэлэй түлөөлэгшэд хандажа, тэдэндэ хүнгэлэлтэтэй урьһаламжа гү, али мүнгэн тэдхэмжэдэ хүртэхэ талаар туһа хүргыт гэжэ хандаһан байна.
“Бидэ Хүдөө ажахын болон эдеэ хоолой яаманай нэгэшье программада ороногүйбди”, - гэжэ эд хэрэглэгшэдэй түлөөлэгшэд тэмдэглэбэ.
Тиихэдэ Буряад Уласай Толгойлогшын болон Засагай газарай мэдээсэлэй албанай мэдээгээр, Алексей Цыденов 100 һууритай хүүгэдэй сэсэрлигэй баригдаха талмай, соёлой-тамирай байшан болон аймагай түбэй больница хүрэхэ, ТОСуудай эдэбхитэдтэй уулзаха түсэбтэй юм. Удаань уласай хүтэлбэрилэгшэ Эгэтын дасан хүрэхэ, Поперечное тосхоной соёлой байшанда хүрэжэ, уласай фестивальнуудта эдэбхитэй хабаададаг арадай «Сударушка» ансамблиин тоглолто хараха түсэбтэй.
Техникэ худалдан абаха, барилга хэхэ гэжэ гүрэнэй тэдхэмжэдэ хүртэһэн олзын хэрэг эрхилэгшэ Чингис Цыденовэй һүнэй фермэдэ хүдөө ажахы үйлэдбэрилэгшэдтэй уулзажа, аймаг дотор хүдөө ажахы хүгжөөлгын асуудалнуудаар Алексей Цыденов зүбшэхэ. Удаань Эгэтын-Адагта ажаһуугшадтай уулзалга эмхидхэгдэхэ юм.
Буряад Уласай Толгойлогшын болон Засагай газарай мэдээсэлэй албанһаа гэрэл зураг абтаба.
