989
2017 оной октябриин 2-һоо 9 болотор Улаан-Баатарта «UB – The Parade of Winners» гэһэн уласхороондын монодрамануудай фестиваль 3-дахияа үнгэргэгдэхэ.
Энэ хэмжээ ябуулгада Ярослава Пулиновичой зүжэгөөр Н.А.Бестужевай нэрэмжэтэ ород драмын театрай найруулагша Тадас Монтримасай табиһан «Наташина мечта» гэһэн моноспектакль хабаадаха юм. Энэ зүжэгтэ Анастасия Турушева болон Евгений Винокуров наадана.
«Наташина мечта» гэһэн ганса хүнэй наадаха зүжэг ород хэлэн дээрэ фестивалиин һүүлшын үдэр, октябриин 9-дэ, табигдаха. Энэ зүжэг «Территория РОСТа-2017» гэһэн зохёохы лабораториин хэмжээндэ табигдажа, удаань Монголдо үнгэргэгдэхэ фестивальда уригдаа.
«Наташина мечта» хадаа ниигэмэй удха шанартай, гансашье Ород гүрэнэй бэшэ, тиихэдэ хари гүрэнүүдэй ажабайдал зураглаһан зүжэг болоно. Хүүгэдэй байшанда хүмүүжүүлэгдэдэг үншэн басаганай ажабайдал, тэрэнэй үдэр бүриин суг хүмүүжүүлэгдэдэг басагадаар, хүмүүжүүлэгшэдээр тэмсэл харуулагдана. Багаһаа хойшо басаган һайн байдал үзөөгүй, гансал гашуудал, һалан байдал хаража үндыһэн байна. Тиигэбэшье эдир наһандаа Наташа басаган түрүүшын дурантай ушаржа, тэрэнэй зоболон һайса үзэһэн сэдьхэл эдэгэхэ гү гэһэн асуудал гаража ерэнэ.
«UB – The Parade of Winners» гэһэн фестиваль долоон хоногой туршада үнгэргэгдэдэг юм. Мүнөө жэлэй хэмжээ ябуулгада Н.А.Бестужевай нэрэмжэтэ ород драмын театрһаа гадуур, Ородой Холбоото Уласай можо нютагуудай, Монгол, Израиль, Польшо гүрэнүүдэй театрнууд хабаадаха юм. Фестивальда 9 монозүжэгүүд харуулагдаха. Тиихээд Монгол уласта зохёохы уулзалганууд болон экскурси үнгэргэгдэхэ.
– «Наташина мечта» гэһэн зүжэг фестивальда хабаадаха болоһондонь, ехэ баяртайб. Зүжэгшэд Сергея Левицкиин «Ричард III» гэһэн зүжэгтэ наадана, тиимэһээ фестивалиин бүхы программа хаража шадахагүймнай харамтай. - гэжэ Тадас Монтримас хэлэбэ.
Александра Даниловагай гэрэл зураг Буряад Уласай Соёлой яаманай сайтһаа абтаба.
