717
Буряад Уласай эдэй засагай, мүнгэн һангай, элүүрые хамгаалгын, соёлой болон аяншалгын яамануудай хүтэлбэрилэгшэдые томилхо конкурс һаяын үдэрнүүдтэ соносхогдохо.
Эдэбхи үүсхэл ехэтэй, ажалдаа үнэн сэхээр хандаха хүнүүдые шэлэн абалга холын хараата үүсхэлэй агентствын хүсөөр үнгэргэгдэхэ. Үндэр тушаалда томилогдохо хүнүүдые шэлэн абалгын комисси байгуулагдаха юм. Буряад Уласай Толгойлогшо, Буряад Уласай Засагай газарай түрүүлэгшын орлогшонор, федеральна гүрэнэй албанай түрүүлэгшэнэр, гүрэнэй албанай болон ажалаар хангалгын бодолгын талаар хорооной, Буряад Уласай Толгойлогшын болон Засагай газарай захиргаанай гүрэнэй-эрхын талаар хорооной хүтэлбэрилэгшэд, Буряад Уласай Олониитын танхимай, яамануудай дэргэдэхи олониитын зүблэлнүүдэй түлөөлэгшэд болон бусад мэргэжэлтэ шүүбэришэд комиссиин бүридэлдэ орохо юм.
Шэлэн абалга хэдэн шатаһаа бүридэхэ, тэрэ шатануудые гараһан хүнүүд нэгэ нэгэээр хөөрэлдөөндэ хабаадажа, томилогдохо болоно.
Шэлэн абалгын шата гаража, Алексей Цыденов Буряад Уласай Толгойлогшын тушаалда томилогдоһон гэжэ һануулнабди. Ородой Холбоото Уласай Юрэнхылэгшэ Владимир Путин һунгалтын һүүлээл можо нютагуудай хүтэлбэрилэгшэдтэй уулзахадаа, энэ хэмжээ ябуулга аша үрэтэй гэжэ хэлэһэн байна.
