​Тимур Цыбиковэй "Баяртай!"

Буряад Уласай соёлой сайдай тушаалһаа сүлөөлэгдэһэн ушараа олондо мэдээсэл тараадаг эмхинүүдэй түлөөлэгшэдтэ үдын сай бариха үедөө Тимур Цыбиков тайлбарилба. 

Юһэн жэлэй туршада Тимур Цыбиков Буряад Уласай соёлой сайдаар ажаллаа. Энэ хугасаада соёлой һалбари нилээд хүгжөө, хэдэн һайн хубилалтанууд болоо. 2008 ондо оройдоол 31–тэй залуу хүн харюусалгатай тушаалда томилогдоо бэлэй. Тимур Гомбожапович мүнөө 40 наһатай, дүршэл ехэтэй хүтэлбэрилэгшэ болонхой. Эдэ жэлнүүдэй хугасаада тэрэ Буряад Уласай соёлой hалбариин хүгжэлтэдэ өөрынгөө хубитаяа оруулаа. 

Энэ уулзалгада ерэhэн хүн бүхэн соёлой сайд юундэ тушаалһаа бууба гээшэб, ямар ажалда орохонь бэ, хэн тушаалыень эзэлхэб гэхэ мэтэ асуудалнуудта харюунуудые хүлеэгээ. 

Соёлой сайдай тушаалhаа гараха гэһэн шиидхэбэри үшөө февраль һарада абаһан тухайгаа Тимур Цыбиков мэдүүлээ.

Раиса Пшеничниковагай соёлой дээдэ һургуулиин ректорэй тушаалhаа үшөө гараадүй байхада, Тимур Цыбиков энэ тушаалда орохо юм гэhэн hураг суу гарадаг бэлэй. Теэд Тимур Гомбожапович энэ тушаал эзэлхэеэ байнагүйб гэжэ тодоор хэлэбэ. 

Ямар ажалда орохоёо байһанаа тэрэ хэлэбэгүй. Хэдэн дурадхалнууд оронхой, теэд мүнөө дээрээ амаралтада гарабаб гэжэ тэрэ мэдээсэбэ. 

Соёлой сайд хэн болохоб гэһэн асуудал олониие хүлгөөнэ. 

«Соёлой ажал ганса дуу, хатар бэшэ, үзэл сурталай гол шэглэл hэн тулань ехэ анхарал хандуулагдана ха юм», - гэжэ Тимур Цыбиков тайлбарилба.

- Би өөрынгөө орондо гурбан хүниие дурадхааб. Хэд бэ гэжэ нэрлэхэ аргагүйб. Нэгэдэхинь – соёлой хүдэлмэрилэгшэ, хоёрдохинь – соёлдо хабаагүй, гүрэнэй албатан, гурбадахинь – ниитын ажал ябуулагша, - гэжэ тэрэ мэдээсэбэ. 

Шэнээр томилогдохо сайдай урда нилээд олон зорилгонууд табигдана: Үндэһэтэнэй музейн байшан бариха, бэлигтэй үхибүүдэй интернат нээхэ, Үндэһэтэнэй номой сангай байшанай барилга дүүргэхэ гэхэ мэтэ ажалнууд үргэлжэлүүлэгдэхэ; хүүхэлдэйн театрай болон Байгаалиин музейн байшан һэльбэн шэнэлэлгэдэ мүнгэ һомололгын асуудал шиидхэгдэнхэй, барилга эхилхэ ёhотой. 

Юһэн жэлэй туршада hалбариие ударидажа, Буряадай соёлой нюур боложо ябаһан Тимур Гомбожапович Цыбиковтэ саашанхи ажал хэрэгтэнь амжалта хүсэе.