690
Октябриин 9-дэ Улаан-Үдын захиргаанай архитектурын болон хотын барилгын хорооной түрүүлэгшэ Александр Маренич, хотын ахамад уран зурааша, дизайнай таһагай дарга Даши Аринчинов гэгшэдтэй зүблөөн үнгэргэгдөө.
Тус уулзалгада нэгэ асуудал зүбшэн хэлсэгдэбэ. Энэнь «Хотын дэбисхэр дээрэ балконуудые шэллэлгэ тухай» абтаhан хуули.
“Москва, Санкт-Петербург, Омск, Томск, Иркутск, Новосибирск, хотонуудта иимэ асуудал табигдаhаар үнинэй. Манай Улаан-Yдэ, Байгал далай аяншалагшад олоороо ерэдэг болонхой, тиимэhээ хотоео гое сэбэр, хүн зоной нюдэндэ урин болгохо талаар ажал хэгдэнэ. Жэшээнь, Борсоевой, Смолиной гудамжануудые абажа харабал, гэрнүүдэй нэгэдэхи дабхарта олон, янза бүриин эмхи зургаанууд түбхинэжэ, өөрынгөө дуран соо байшанай нюур тала һэлгэнэ, элдэб гаршагтай хабтагайнуудые үлгэнэ. Тиимэ тула энэ ажал эмхитэй болгогдожо эхилээ. Олон дабхар гэрнүүдэй балконуудые шэллэлгэ, тэдэнэй нюур тала шэмэглэлгые эмхи гуримтай болохо ёhотой”, - гэжэ А. Маренич тэмдэглэбэ.
Тус хуули 2018 оной апрелиин нэгэнһээ хүсэндөө орохо. Тиигэжэ хотын ажаһуугшад балконоо шэллүүлхэеэ һанабал, хотын захиргаанда хандаха болоно. Хандахадаа өөрынгөө зураг, дизайн абаад ошоходо болохо. Тиин захиргаанда энэнь зүбшэн хэлсэгдэжэ, шиидхэгдэхэ ёhотой. Энэ хуули ганса шэнээр баригдажа байһан гэрнүүдтэ хабаатай. Шэнэ гэр бүхэндэ өөрын типовой түсэл бэлдэгдэхэ юм. Харин урданай хуушан гэрнүүдые һэльбэн шэнэлхэеэ гү, али заһабарилга хэхэеэ һанабал, ажаһуугшад өөһэдөө гэрээрээ хэлсэжэ, ямар түхэлтэй болгохоб гэжэ захиргаанай хороонтой зүбшэн хэлсээд, сугтаа ажал ябуулха болоно. Хотын түхэл шарай һайжаруулха хэрэг ганса шэнэ гэрэй эзэдтэ бэшэ, харин олзын хэрэг эрхилэгшэдтэшье хабаатай бшуу. Эдэ ямар түхэлтэй, үнгэтэй гаршаг эмхи зургаандаа үлгэхэ еhотойб гэжэ баhа хамта шиидхэхэ ёhотой болоно.
Энэ асуудал бүхы хотын ажаһуугшадай һанаа зобоомо асуудалнуудай нэгэн болоно. Сугтаа эбтэйгээр ажалаа хэбэл, ябан ошон хотомнай танихаар бэшэ, гое боложо магад.
Автор: Любовь ЦЫБЕНОВА
