482
Федеральна түсэлнүүдэй хэр зэргэ бэелүүлэгдэжэ байhаниие Буряад Уласай Арадай Хуралда “Ниитэ нэгэ Росси” намай гэшүүд зүбшэн хэлсэбэ.
“Ниитэ нэгэ Россиин” намай гэшүүн, Арадай Хуралай һунгамал, түсэлнүүдэй ажаябуулгын талаар Секретариин орлогшо Баир Батуевич Доржиев тус зүблөө залан хүтэлбэ.
Буряад Уласта хамта дээрээ 16 федеральна түсэл бэелүүлэгдэнэ. Энэ удаа 6 түсэл бэелүүлгэ тухай хэлсэгдэбэ.
“Хотын оршон ”гэһэн федеральна түсэлөөр можо нютагай залан хүтэлэгшэ Батор Булатович Цыбиков тоосоходоо, иигэжэ хэлэбэ: “Май һараһаа энэ түсэл хүтэлнэб. Уласай ба федеральна бюджедүүдһээ 216 сая түхэриг тэдхэмжэ мүнгэн hомологдоһон байна. Энэ мүнгэн харгы заһабарилгада, зайн гал оруулалгада, харгын захаар хүбөө (бордюр) тодхолгодо гаргашалагдаа. Ажаhуугшад тус түсэл дэмжэнэ, зүйтэй һанамжа, дурадхалнуудые оруулна. Хотын захиргаантай сугтаа ажалаа ябуулнабди.”
“Хүүгэдэй спорт” гэһэн хоёрдохи түсэлэй координатор Сергей Трофимович Леонов үгэ абахадаа, хүдөөгэй һургуулинууд спортивна хэрэгсэлнүүдээр муугаар хангагдана, зарим һургуулинуудта юуншье үгы шахуу, тиихэдэ инструктораар ажаллаха зон олдоногүй, эндэһээ уламжалан, секци, клубуудые нээхын аргагүй гэжэ тэмдэглэбэ. Хүдэлхэ багшанарай олдоходо, нэгэдэхеэр, хэшээлэй саг тааруу бэшээр табигдана, хоёрдохёор, спортивна хэрэгсэлнүүд үгы гү, али хуушан, зарим ушарта аяар 7 жэлэй туршада шэнэлэгдээгүй байна. Юундэб гэхэдэ, энэ хэрэгтэ бюджедээр мүнгэ зөөри хараалагданагүй. Ерэхэ жэлдэ багшанарай ажалай хэмжээн (норматив) тодо болгохо, һургуулинуудые ба хүүгэдэй спортивна һургуулинуудые хэрэгсэлнүүдээр хангалгада бюджедээр хараалагдадаг мүнгэ зөөри ехэ болгохо хэрэгтэй. Хүүгэдэй наадаха 192 талмай, Тарбагатай, Хэжэнгэ, Онохой, Горячинск, Таксимо, Новая Брянь hуурингуудта, мүн Улаан-Үдэ хотын 32-дохи һургуулида спортын танхимууд заhабарилагдаа гэжэ мэдээсэбэ.
“Һайн болбосоролтой эд хэрэглэгшын hургуули» гэhэн түсэл хүтэлдэг Раиса Константиновна Санжицыренова элидхэхэдээ, олонхи ушарнуудта гэр байранууд наһатай зон дээрэ бэшээтэй , тиимэһээ гол түлэб тэдээнтэй хүдэлхэ бологдоно гэжэ тэмдэглэбэ. «Элдэб согсолборинуудые хэблүүлжэ, ойлгууламжын ба методическа хүдэлмэри ябуулнабди. ТСЖ-гэй түрүүлэгшэнэртэй сугтаа хүдэлнэбди, хэдэн дабхар үндэр гэрнүүдэй заһабарилгада, томо гэрнүүдтэ лифтнүүдые һэлгэхэ ушарта ба техническэ инвентаризаци үнгэргэлгэдэ туһа хүргэнэбди. Мүнөө сагта 400 хүниие һурганабди», -гэжэ тэрэ хэлэбэ.
“Ород гүрэндэ бүхы хүүгэд хэрэгтэй” гэһэн түсэлөөр ниигэмые хамгаалгын сайд Татьяна Александровна Быкова элидхэл хэбэ. “Тон шухала асуудал гэхэдэ, хүүгэд бүхэн гэр бүлэдэ үндыхэ, хүмүүжүүлэгдэхэ ёһотой. Тиин 2012 онһоо нилээд олон хүүгэдые гэр бүлэнүүд үргэжэ абаа гээшэ. Тэдэниие дэмжэхэ албангууд ажалаа һайнаар ябуулдаг. Зарим гэр бүлэнүүд мүнгэнэй түлөө таба ба табанһаа дээшэ хүүгэдые үргэжэ абахаяа һанана. Ородой Холбооной түбэй телевидени ерэжэ, “Пока все дома” гэһэн дамжуулга буулгаа hэн. Тэрэ дамжуулгада хабаадаhан 6 хүүгэдэй хуби заяан үшөө эли бэшэ, тиихэдэ 43 хүүгэдтэ видеопаспорт хэгдээ. Хүүгэдые үргэжэ абаһан гэртэхиндэ бултандань индексаци мүнгэн түлэгдэнэ. Жэшээлхэдэ, 3 хүүгэдые үргэжэ абаһан ба 3 жэлэй туршада һайн дүнгүүдые харуулһан гэртэхиндэ 250 мянган түхэриг түлэгдэдэг юм. Олондо мэдээсэл тараадаг хэрэгсэлнүүдэй ажалшадтай нягта харилсаа холбоотойгоор хүдэлхэ гэжэ оролдодогбди. “Тивиком” студиин “Яагаад хүүгэдые гэр бүлэдэ дадхаахаб”, АТВ-тэй “Эжы, би эндэб” гэһэн дамжуулгануудай ашаар 20 хүүгэд гэртэхинтэй болоо. БГТРК-тай энэ асуудалаар хэлсээн баталагдаба. “Ахамад үе” гэhэн түсэл дээрэ Татьяна Александровна тогтоходоо, наһатай зоной ажабайдалай шанар дээшэлүүлхэ, энээнэй тула волонтёрнуудай хүдэлөөн эмхидхэгдэнхэй гэжэ хэлэбэ.
Зүбшэн хэлсэгдэhэн үшөө нэгэ түсэл – “Ород гүрэндэ байгаали хамгаалга”. Энэ талаар Буряад Улас 20 нютаг можын дунда түрүүлнэ. Юрэнхы һуралсалай 132 дунда һургуулида экологическа хэшээлнүүд үнгэргэгдөө. Эндэ хүүгэд экологическа уряал-зурагуудые бүтээгээ, һонирхоһон асуудалнуудаараа хөөрэлдөө. Энэ ажалда шалгарhан 5 хүүгэд “Артек” лагерь ошоо. Пластикова амhартанууд, целлофан туулмагууд оршон тойроноор дүүрэн таранхай, тэдэ зуун жэлэй туршада газар доро үмхирдэггүй, тиимэhээ саарһан туулмагуудые наймаанда табижа эхилхэ тухай дурадхал ороо. Ерэхэ жэлһээ энэ түсэл “Байгаали хамгаалга ба элүүр энхэ байлга “ гэжэ нэрлэгдэхэ.
Зүблөөнэй түгэсхэлдэ эдэ түсэлнүүд тус тустаа сайтнуудтай болохо, тэрэнээ саг үргэлжэ шэнэлжэ, һарын хоёр дахин һонинуудаараа хубаалдажа байха гэжэ шиидхэгдээ.
Фото пресс-службы БРО ЕР
