​Ородой Холбоото Уласай эрхим багша

Сочи болон Москва хотонуудта үнгэргэгдэһэн “Россиин эрхим багша-2017” гэһэн конкурсдо арбан табан бэрхэ багшанарай тоодо буряад багша ороо гэһэн һураг хаа-хаанагүй тараба. Соёлма Эрдэмовна Батоболотова Агын 2-дохи дунда һургуулида тоо бодолгын багшаар ажаллана.

Тус урилдаан 28 жэлэй туршада үнгэргэгдэнэ, тиихэдээ бэлигтэй багшанарые элирүүлхэ, тэдэниие дэмжэхэ гэһэн гол зорилготой.

Сочидо Ород гүрэнэй 85 можо нютагуудһаа эрхим багшанар суглараа. Соёлма Батоболотова Үбэр Байгалай хизаарай Агын тойрогой Ага тосхониие түлөөлөө. Заочно түхэлэй түрүүшын шатада хабаадагшад “Хэнэй һайгаар багша болообиб” болон “Интернет–ресурс” гэһэн эссе-найруулгануудые бэшэхэ даабаритай байгаа. Удаадахи шатада “методическа семинар” болон жэшээтэ хэшээл харуулжа, мэргэжэлтэ шадабарияа, дүй дүршэлөө харуулаа.

Агын 2-дохи дунда һургуулиин захиралай эрдэм-шэнжэлэлгын талаар орлогшо Дулмажаб Цынгуевагай мэдээсэһээр, Соёлма Батоболотова “Пространственное мышление на уроках математики как условие формирования компетентной личности 21 века” гэһэн инновационно түсэл бэелүүлгэ тухай элидхэл бэлдээ.

- Соёлма Эрдэмовна стереометрическэ бодолгонуудые бодоходоо, үхибүүд ядалдана гэжэ хөөрөө. Юуб гэхэдэ, ЕГЭ-гэй даабаринуудай 30-40 хубинь иимэ бодолгонуудһаа бүридэдэг. Мүнөөдэрэй байдалаар, дүрбэн зүг, найман хизаарта юртэмсэдэ байдаг зүйлнүүдые толгой соогоо шэнжэлэл (пространственное мышление) гэһэн ойлгосо һургуулиин ажабайдалда ехэ нэбтэрүүлэгдээгүй, энэ психологическа эрхэ нүхэсэл хараада абтанагүй. Тиигэжэ үхибүүд геометриин дүрсэнүүд оршон тойронхи байдалай зүйлнүүдтэ хабаатай гэжэ ойлгодоггүй гэжэ Соёлма Эрдэмовна тэмдэглээд, энэ хадаа өөрсөөр бодомжолдог шэнэ үеын хүниие хүмүүжүүлхэ аргатай гэжэ харуулаа, - гэжэ Дулмажаб Дугаржаповна тайлбарилба.

Буряад багшын бодомжолгонуудые, ажалайнь дүй дүршэлые жюриин гэшүүд үндэрөөр сэгнэжэ, Ородой Холбоото Уласай һургуулинуудта дэлгэрүүлмээр, мүнөө сагай эрилтэдэ таарана гэжэ тобшолол хээ. Соёлма Батоболотовагай харуулһан хэшээл шүүгшэдэй тон үндэр сэгнэлтэдэ хүртөө. Жюриин гэшүүд буряад багшын ажалыень онсо илгаатай (высший пилотаж), эрхимэй эрхим (шедевр) гэжэ тэмдэглээ бшуу.

Очно түхэлэй түрүүшын шатын дүнгөөр Соёлма Батоболотова 15 эрхим багшанарай тоодо орожо, конкурсын лауреат болоод, “Багахан алтан хотон шубуун” (пеликан) шанда хүртөө. Агын багша очно хоёрдохи шатын даабаринуудые баhал эрхимээр дүүргээ.

Буряад багшын иимэ үндэр дүн туйлаһан ушар хадаа ганса Үбэр Байгалай хизаарай бэшэ, мүн бүхы Сибириин федеральна тойрогой ажаһуугшадай омогорхол болоно. Юундэб гэхэдэ, үндэр хэмжээнэй урилдаануудта манай Сибирьһээ үсөөхэн лэ зон түгэсхэлэй шатада ородог. Харин Үбэр Байгалай, Агын Буряадай тойрогой түүхэдэ эгээл түрүүшын багша иимэ ехэ амжалта туйлаба гээшэ.

“Россиин эрхим багша - 2017” гэһэн урилдаанай дүн Кремлиин Ордон соо согсологдожо, эрхимэй эрхим багшанар нэрлэгдээ. Баяр ёһолол багшанарай мэргэжэлтэ үдэртэ дашарамдуулагдажа, гоё һайхан тоглолто наадаар түгэсөө. Ородой Холбоото Уласай эрхим 15 багшанар Юрэнхылэгшэ Владимир Путинтай уулзаһан байна.

- Ородой Холбоото Уласай эрхим багшанарай тоодо орохын тула нилээд шанга тэмсэл дабагдаа. Зүгөөр манай бүлэг мэргэжэлэй талаар шадабарияа алишье талаhаань харуулха гэжэ оролдообди, тиигэжэ зорилгоёо дүүргэһэн, сэдьхэлээ ханаһан мэдэрэлтэй гэртээ бусажа ябахада, тон аятай байгаа, - гэжэ Соёлма Эрдэмовна тэмдэглэнэ.

Соёлма Эрдэмовна Батоболотова Буряад Уласай Хэжэнгэ аймагай Хэжэнгэ нютагта 1978 ондо түрэһэн юм. Эсэгэнь – Эрдэм Михайлович Ширапов, эжынь – Тамара Хэшэгтуевна Ширапова мүн.

1985 онһоо 1991 он хүрэтэр Соёлма Хоца Намсараевай нэрэмжэтэ Хэжэнгын 1-дэхи дунда һургуулида, 1991 онһоо 1995 он хүрэтэр Хэжэнгын лицей-һургуулида hуража, мүнгэн медальтайгаар дүүргэһэн юм. 1995 ондо Томскын гүрэнэй ехэ һургуулиин “Хабсаргамал тоо бодолго, кибернетика” гэhэн таһагта ороһон байна. 1998 ондо Ага аймагай Согто-Хангил hууринай Гарма Батоболотов хүбүүндэ хадамда гаража, Буряадай гүрэнэй ехэ һургуулида һуралсалаа үргэлжэлүүлээ. 2ООО ондо ехэ һургуулияа дүүргэһэн юм. 2ОО3 ондо Буряадай гүрэнэй хүдөө ажахын академиин экономическа таһаг дүүргээ. Улаан-Үдын 49-дэхи һургуулида нэгэ жэлэй туршада багшалhанай hүүлээр Агын 2–дохи дунда һургуулида тоо бодолго заажа эхилээд, мүнөө болотороо тэндээ хүдэлмэрилнэ. 2ОО5 ондо Москва хотын РУДН–дэ орожо, тестолог гэхэ гү, али буряадшалбал, һурагшадай эрдэм мэдэсэ шалгадаг мэргэжэл олоһон юм.

Соёлма Эрдэмовна Батоболотова 2005 ондо Агын тойрогой “Эрхим багша” гэһэн конкурсын лауреат болоо һэн. Тэрэ Ородой Холбоото Уласай Болбосоролой болон эрдэм ухаанай яаманай хүндэлэлэй грамотаар, Үбэр Байгалай хизаарай Губернаторай Баярай бэшэгээр, Ага hууринай захиргаанай хүндэлэлэй тэмдэгээр шагнагданхай юм.