Эхэ байгаалида хамаг юумэн нарин нягта холбоотой. Хэды шэнээн эршэ хүсэтэйгөөр алибаа юумэндэ ханданабши, тэды зэргэ харюу шанха урдаһаань угтаха гэжэ Англиин агууехэ эрдэмтэн Исаак Ньютон (1642- 1727 онууд) ойлгоод, хүн түрэлтэндэ ойлгуулжа үгэһэн байдаг.
Байгаалиин энэ жама ёһо болбол Ньютоной гурбадахи хуули ёһо болоод тодороо гүб даа. Мүнөө бүгэдэ зондо мэдээжэ болонхой, дэлгэрэнхэй. Юундэб гэхэдэ, энэ жама ёhые гансашье амигүй бодосто хэрэглэхэhээ гадна хамаг хүн амитанда, ниигэмэй хүгжэлтэдэ тааруулмаар байшоо ха юм.
Олондо Һамажабай эжы гээд мэдээжэ минии эжы Дэмаа бар жэлдэ түрэһэн. Ород хэлэгүй, үзэг бэшэггүй хүгшөөдэймни иигэжэ хэлэдэг hэн:
- Хорхойшье хадхабал, урдаһаашни нугаран матардаг.
Энэ хэлээшыень бодоод үзөө һаа, бүхы дэлхэйн арад зон Ньютоной гурбадахи жама ёһо үнинэй мэдэдэг, ойлгодог байһан.
Жэшээнь, эжы аба хоёрой ниилэхэдэ, амяараа хүн бии болоно. Тэрэ хүнэй аза талааниинь, хуби заяаниинь, зол шорониинь аба эжы хоёрой буянһаа ехээр дулдыдана. Хэрбэеэ уг һайтай хоёр дайралдажа, инаг дуранай ашаар ехэ хүлеэгдэһэн үхибүүн мүндэлөөд, үргэмжэ һайтайгаар өөдөө боложо, бэрхэдэ һураһан байгаа һаань, һайн хүн болохонь дамжаггүй. Иимээр үндыхэдөө, аба эжыгээ үргэхэ, түрэл гаралдаа туһалха, арад зоноо суурхуулха.
Ньютоной гурбадахи хуули ёһоор, хүндэ һайниие хээ һаа, заатагүй бусаха.
Гадна иимэ хэлсээн бии:
- Табин зургаатай болотороо, хүн аба эжынгээ буянгаар ябадаг, саашаа өөрынгөө буян эдлэдэг. Элинсэг хулинсагнай эртэ урда сагhаа эрын юһэн эрдэни ба эхэнэрэй долоон шанар тодоруулhаниинь мүн лэ үнэ сэнтэй, мэдэхэ хэрэгтэй. Хүндэтэ уншагшад, буряад эрын юhэн эрдэни, буряад эхэнэрэй долоон шанар оложо мэдээд, олонтой хубаалдахыетнай уряалнаб!
Нүгэл ба буяниие, хара ба сагааниие уншагша бүхэн ойлгохотой байгаа ёhотой. Тиимэһээ буян хэжэ бэеэ зобоогоогүй, ганса хара амияа хараад, бэеэ сэнгээжэ, наhаа эдлэhэн хүн һүүлэй һүүлдэ үбгэрхэдөө гү, али хүгшэрхэдөө, үншэрдэг, үхибүүдтээ хаюулдаг, тамын орон гээшые амидыгаар үзэдэг. Энэ тамын эрьесые, нүгэлэй гэнжые таһалхын түлөө нэгэ үе үри бэе гү, али хоёр-гурбан үе үри бэе аба эжыдээ ямаршье ехэ гомдолтой һаа, хүлисэжэ, нигүүлэсхы боди сэдьхэл гаргажа, эхэ эсэгэеэ һайнаар үргэжэ, гурбан зөөлэниие мэдүүлжэ аялуулаа һаа, тамын эрьесые таһалха, үйлын үри сагааруулха аргатай.
Теэд аба эжы хоёрой аша буян яагаадшье харюулхын аргагүйл даа. Аба эжынэр харюугүйгөөр, харюу хүлеэнгүйгөөр үхибүүдээ үргэнэ ха юм. Тиимэһээ тэды шэнээн һайниие хээ һаа, буянгынь харюулжа шадахаб гэһэн хэмжүүр бү табиял даа!