592
Буряад Уласай Засагай газарай гэшүүдые, сайдуудые шэлэн абаха конкурсын болзор гаргагдажа, тэрэнэй дүнгүүдээр Буряад Уласай Толгойлогшо Алексей Цыденов тушаалда зууршалагшадтай уулзаха.
Үндэр тушаал эзэлхэ хүсэлтэй хүнүүдэй түрүүшын шатын мүрысөөн ноябриин 7-8-най үдэрнүүдтэ үнгэргэгдэхэ. Энэ шатада тушаалда зууршалагшадай дансанууд эрилтэнүүдтэ хэр зэргэ тааранаб гэжэ элирүүлэгдэхэ. Сайдай тушаал эзэлхэ хүсэлтэй хүнүүд дээдэ мэргэжэлтэй, зууршалһан һалбарида табан жэлһээ бага бэшэ болзорто ажалай дүршэлтэй (аяншалгын яаманһаа бэшэ), хүтэлбэрилэгшын тушаалда баһал табан жэлһээ бага бэшэ болзортой байха ёһотой.
Мүрысөөнэй хоёрдохи шатада сайдай тушаалда зууршалагшад комиссиин гэшүүдтэй уулзаха юм. Тиихэдэ ноябриин 9-дэ – Спортын болон залуушуулай бодолгын талаар сайдай тушаал эзэлхэ хүнүүдтэй, ноябриин 10-да – Соёлой, ноябриин13-14-нэй үдэрнүүдтэ – Аяншалгын, ноябриин15-да – Элүүрые хамгаалгын, ноябриин16-да Эдэй засагай яамануудые хүтэлбэрилхэ хүсэлтэйшүүл комиссиин гэшүүдтэй уулзаха гэжэ хараалагдана.
Хоёрдохи шатада илаһан хүнүүд ноябриин 20-һоо 23 болотор мүрысөөнэй гурбадахи шатада хабаадаха юм. Тиихэдээ хабаадагшад тестировани гаража, тэрэнэй дүнгүүдээр эрхим ажалнууд Буряад Уласай Толгойлогшо Алексей Цыденовтэ харуулагдаха. Түгэсхэлэй шатада хабаадагшад Алексей Цыденовтэй уулзажа, удаань хэдэн хоногой туршада сайд эзэлхэ хүнүүдээр шиидхэбэри абтаха.
Буряад Уласай Арадай Хурал, Олониитын танхим, яамануудай дэргдэхи олониитын зүблэлнүүдэй болон һалбариин эблэлнүүдэй түлөөлэгшэдэй хабаадалгатай мүрысөөнэй комисси байгуулагдана. Тиихэдэ Буряад Уласай Засагай Түрүүлэгшын орлогшонор үндэр тушаалда зууршалагшадые шэлэн абалгада хабаадалсаха.
