764
Ородой Холбоото Уласай үйлэ хэрэгтэ зорюулагдаһан эрхим 200 түсэлэй тоодо «Нүүдэлшэдэй ая дуун» гэһэн хүгжэмэй фестиваль хоёрдохи жэлээ оруулагдаба. Тус фестиваль ноябриин 27-до «Үндэһэтэнэй хэмжээ ябуулга-2018» гэһэн зэргэтэй боложо, горитойгоор дэмжэгдэхэ юм.
Тиин «Нүүдэлшэдэй ая дуун» тухай мэдээсэл аяншалгын-мэдээсэлэй түбүүд, аяншалгын фирмэнүүд болон зошод буудалнуудта, тиихэдэ Зүүн-Урда Азиин гүрэнүүдтэ, Арабай Эмирадуудта, мүн Иран, Кувейт, Хитад, Германи, Итали, Испани болон Великобританида оршодог «Visit Russia» гэһэн эмхиин аяншалгын таһагуудта дамжуулагдаха.
Ородой Холбоото Уласай болон харишье гүрэнүүдэй аяншалагшадта «Нүүдэлшэдэй ая дуун. Байгал - Буряад» гэһэн фестиваль ехэ һонирхолтой, удха шанартай аяншалгын түсэл болоно.
- Фестивалиин гүрэнэй хэмжээ ябуулгануудай түсэбтэ оруулагдаһаниинь Буряад орондо ехэ шухала: улас дотор аяншалга хүгжөөлгэдэ туһатай байха, фестиваль тухай үшөө олон хүн мэдэхэ болохо. Буряад Уластай танилсаха зорилготой аяншалагшадай тоо олошорхо», - гэжэ фестивалиин уран һайханай талаар захирал Наталья Уланова хэлэбэ.
EventsInRussia.com гэһэн Гүрэнэй хэмжээ ябуулгануудай түсэб хадаа Ородой Холбоото Улас дотор бэелүүлэгдэдэг аяншалгын хэмжээ ябуулганууд тухай мэдээсэһэн федеральна түсэл болоно. Гүрэнэймнай Соёлой яаманай дэмжэлгээр «Visit Russia» гэһэн аяншалга тухай федеральна программа бэелүүлгын хэмжээндэ энэ түсэб зохёогдонхой. Жэл бүхэндэ тусхай комисси эгээл һонирхолтой, тон эрхим 200 түсэл шэлэн абажа, «Гүрэнэй хэмжээ ябуулга» гэһэн зэргэ олгогдодог. Хэмжээ ябуулга олон талаһаа сэгнэгдэдэг: хэр һонирхолтойб, хэмжээгээрээ ямар бэ, хүн зоной хабаадалга, болбосон түхэлтэй хангалгын байгууламжа... Эдэ шалгалтануудые дабажа, эрхимэй тоодо ороһон хэмжээ ябуулгануудта жэлэй туршада мэдээсэлэй талаар болон PR-дэмжэлгэ үзүүлэгдэдэг.
«Нүүдэлшэдэй ая дуун» болон «Ёохорой һүни» гэһэн фестивальнууд жэл урид шахуу Ородой Холбоото Уласай эрхим 200 хэмжээ ябуулгануудай тоодо оруулагдаа гэжэ һануулаябди. Үнгэрһэн һарада «Нүүдэлшэдэй ая дуун» фестиваль «Russian Event Awards» гэһэн Гран-при шанда хүртэһэн байна. Тиихэдэ «Буряадта үльгэртэ Сагаалган», «Байгалай һалхин», “Буузын Баяр-Праздник Буузы» хэмжээ ябуулганууд тусхай шангуудта хүртөө.
Анна Огороднигой гэрэл зураг.
