1177
Үргэн Буряад ороноймнай нютагуудай нэгэниинь болохо Гушан гурбан гулбайтай, гурбан ехэ нуурнуудаараа суурхадаг Ярууна аймагай сэлгеэ номин Нарһата нютагта түрэһэн, эндээл наһанайнгаа амаралтада гаратараа хүдэлһэн Баир Базарович, Надежда Майдараевна Дугарнимаевтан – минии дүү хүбүүнтэн тухай олониитэ зондо хөөрэжэ үгэхэ дуран хүрэнэ.
Баир Базарович ажалайнгаа намтар Нарһатынгаа 6-дахи СПТУ-да үйлэдбэридэ һургадаг багшын мэргэжэлээр эхилээ һэн. Буряадай гүрэнэй багшын дээдэ һургуули дүүргээд, Нарһатынгаа совхоздо аюулгүйе сахилгын инженерээр ажалаа үргэлжэлүүлээ.
Сагай һэлгэжэ, ондоо болоходо, наһанайнгаа амаралтада гаратараа, зайн гал тараан дамжуулдаг газарта (РЭС-тэ) хүдэлөө. Эндэ аяар хорёод жэлэй туршада ашаг үрэтэйгөөр хүдэлһэнэйнгээ түлөө «МРСК Сибири» холдингын Хүндэлэлэй грамотаар шагнагданхай.
Надежда Майдараевна, дүү бэримни, наһанайнгаа амаралтада гаратараа, дүшэ гаран жэлдэ аймагайнгаа эмшэлгын газарта медсестрагай мэргэжэлһээ эхилээд, методическа кабинет гээшэдэнь нэгэшье үдэр ажалһаа хожомдонгүй, үнэн сэхээр, оролдосотойгоор хүдэлөө. Үнэн сэхэ ажалайнгаа түлөө «Буряадай элүүрые хамгаалгын һалбариин отличник» гэһэн үндэр нэрэ зэргэдэ хүртэнхэй.
Баир Базарович Надежда Майдараевна хоёр – ажалай ветеранууд. Бэшэшье бага, ехэ ша-
тын хүндэлэлэй тэмдэгүүдээр нэгэнтэ бэшэ шагнагдаһан. Энэ айл нэгэ басаган, хоёр хүбүү гарынь ганзагада, хүлынь дүрөөдэ хүргэжэ, эбтэй эетэй, ажалдаа оролдосотой гэр бүлэнүүд болгожо табяа.
Эржэна басаганиинь Буряадай гүрэнэй багшын дээдэ һургуули дүүргээд, Яруунадаа тоо бодолгын багшаар хорёод жэлдэ амжалтатай хүдэлжэ байна. Нүхэрынь, Аюр Ендонович, мүн лэ багша, физкультура заадаг. Гурбан үхибүүдтэй айлайхи юм.
Ехэ хүбүүн Чингисынь Хабаровскын сагдаанарай дээдэ һургуули эрхимээр дүүргээд, Улаан-Үдэдөө уголовно мүрдэлгын эмхидэ хүдэлөө. Удаань Яруунынгаа Дотоодын хэрэгүүдэй таһагай даргаар томилогдоод, полковник зэргэтэй боложо, наһанайнгаа амаралтада гаранхай. Нүхэрынь, Олеся, баһал Дотоодын хэрэгүүдэй зургаанда хүдэлдэг. Нэгэ хүбүүтэй айл.
Бага хүбүүн Буладынь Баунтын аймагай Багдаринда ахамад шууд мүрдэгшөөр хүдэлнэ, капитан зэргэтэй. Нүхэрынь Сэсэгма экономист мэргэжэлээрээ Баунтын аймагай эрдэм һуралсалай таһагта хүдэлдэг. Хүбүүн басаган хоёртой айлайхи.
90-ээд онуудта хэдышье хүшэр хүндэ байгаашье һаань, Баиртан хэжэ байһан ажалаа орхёогүй, үнэн сэхээр хүдэлжэ, үхибүүдэйнгээ түлөө оролдожо, бултандань байдалаа зохёоходонь туһалжа, хүнһээ дутуугүй гэр бүлэ болгожо шадаа.
Баир Базарович Надежда Майдараевна хоёр аха дүүнэртээ, түрэл гаралдаа һанаагаа зобожо, хамаг юумэндэнь туһалжа, дүү зоноо дүмэжэ, аха зонойнгоо ёһотой тулгань болодог гээшэ.
2011 ондо Энэдхэг гүрэн ошожо, Далай лама багшаяа бараалхажа, гүрэнэймнай эрхэтэдтэ ном табихадань, хүртэжэ ерэхэ буянтай байгаа. Эхэ зургаан зүйл, хамаг амитанай түлөө, түрэл гаралайнгаа түлөө буянтай хэрэг бүтээжэ ерээ.
Энэ намар Москва, Санкт-Петербург хотонуудаар аяншалжа, гоё һайханииень хаража, дүүнэртэеэ уулзажа, тэдэнэйнгээ һайнууд байһандань ехэ баясажа ерээ.
Жара наһанай дабаа дабажа, даланай хорёо соо ороошье һаа, Баиртамнай арюун дулаахан гуламтадаа һайхан сайгаараа, амтан эдеэгээрээ ерэһэниие угтажа, ошоһониие үдэшэжэ байдаг.
Эхэ эсэгын буянгаар,
Орон нютагай үргэмжөөр
Энэ наһандаа элүүр энхэ, жаргалтай,
Унтариин зөөлэнөөр бэеэ жэгнүүлжэ,
Үгын зөөлэнөөр сэдьхэлээ баясуулжа,
Боди сагаан сэдьхэл сэдьхэжэ,
Буянгаа эдлэжэ, сээжэ һонор ябагты.
Үри хүүгэдтээ үргүүлжэ,
Аша гушанараа тойруулжа,
Дүрбэн тэгшэ үнэржэн һуухыетнай
Эгэшэтнай үнэнхэ зүрхэнһөө хүсэнэб!
Балмацо ДУГАРНИМАЕВА, ажалай ветеран
