697
Мүнөөдэр, декабриин 14-дэ, Буряад Уласай Арадай Хуралай ниигэмэй бодолгын хорооной суглаанда һунгамалнууд Буряад Уласай Засагай газарай Түрүүлэгшын орлогшо – Буряад Уласай Толгойлогшын болон Засагай газарай Захиргаанай хүтэлбэрилэгшын тушаалда дэбжүүлэгдэһэн Баир Цыренов, Буряад Уласай Мүнгэй һангай сайдай тушаалда – Всеволод Мухин, Эдэй засагай сайдай тушаалда дэбжүүлэгдэһэн Александр Бардалеев гэгшэдтэй уулзаба.
Шэнэ тушаалда дэбжүүлэгдэһэн Баир Цыренов һунгамалнуудай асуудалнуудта харюусахадаа, Арадай Хуралай һунгамал ябаһанай дүй дүршэл тэрэнэй саашанхи ажалада туһатай байха гэжэ хэлэбэ.
- Асууалнуудай гарабал, тэдэниие таарамжатай, үнэн сэхээр шиидхэхэб, - гэжэ Баир Цыренов найдуулба.
Буряад Уласай Мүнгэн һангай сайдай тушаалда дэбжүүлэгдэһэн Всеволод Мухинда олон асуудалнуудые һунгамалнууд табиһан байна. Всеволод Мухин өөрынгөө программатай танилсуулжа, Буряад Уласай Мүнгэн һангай яаманай гол зорилгонууд тухай хэлэбэ. Нэрлэбэл, «Буряад Уласай программын дансануудтай шэглэлнүүдтэ анхарал хандуулха: уласай ниигэмэй-эдэй засагай хүгжэлтын холын хараата түсэбүүдые бэлдэжэ абаха, уласта олзын ородог һалбари хүгжөөхэ болоно.Тиихэдэ Мүнгэн һангай сайдай уялга дүүргэгшэ бюджедэй тэнсүүри, тэрэнэй дутагдалай асуудалда анхаралаа хандуулаа.
- Бюджедэй байдал хубилгаха гэбэл, бюджедэй татабариин хуби дээшэлүүлхэ хэрэгтэй, - гэжэ Всеволод Мухин тэмдэглэбэ.
Жэл бүри татабариин хүнгэлэлтэнүүд аша үрэтэй гү, али бэшэ гү гэжэ сэгнэхэ тухай тэрэ дурадхал оруулба. Тиихэдэ тус яаманай гол үүргэнүүд тухай хэлэхэдээ, һэргылэмжын болон түсэблэлгын ажалнуудта анхаралаа хандуулха тухай үгэеэ үгэбэ.
Арадай Хуралай һунгамалнууд бюджет хоорондын асуудалнуудаар, тодорхойлбол, нютагай засагай байгууламжануудта тэдхэмжэ үзүүлхэ гуримда хубилалтанууд оруулагдаха гү гэжэ асууба. «Мүнгэн һангай яаманай бодолгоһоо» һургуулинууд болон больницанууд заһабарилагданагүй гэжэ һунгамалнууд тэмдэглэбэ. Хангалгын байгууламжа хүгжөөхэ хэрэгтэ мүнгэнэй һомололго дээшэлүүлхэ тухай Арадай Хуралай һунгамалнууд дурадхаба.
Удаань Буряад Уласай Эдэй засагай сайдай тушаалда зууршалһан Александр Бардалеевэй программатай Арадай Хуралай гэшүүд танилсаба.
Үндэр тушаалда дэбжүүлэгдэһэн Баир Цыренов, Всеволод Мухин болон Александр Бардалеевэй түлөө һунгамалнуууд дуугаа үгэбэ.Энээнһээ урид Буряад Уласай Арадай Хуралай бусад хороонуудта тушаалда зууршалагшад суглаанда хабаадажа, һунгамалнууд тэдэниие дэмжэһэн байна. Декабриин 20-до Буряад Уласай Арадай Хуралай ээлжээтэ бэшэ сесси үнгэргэгдэжэ, тэрэнэй үедэ үндэр тушаалда томилогдоһон хүнүүдэй талаар эсэслэн шиидхэһэн харюу үгтэхэ.
