868
Буряад Уласай Толгойлогшо Алексей Цыденовэй ударидалга доро үнгэргэгдэһэн түсэблэлгын суглаанда мал ажахы хүгжөөлгын асуудалнуудаар хэлсэбэ.
Буряад Уласай Хүдөө ажахы болон эдеэ хоолой яаманай түлөөлэгшэд болон уласай хүдөө ажахын эмхинүүдэй хүтэлбэрилэгшэд энэ суглаанда хабаадаһан байна. Алексей Цыденовэй тэмдэглэһээр, мал ажахы хадаа улас дотор хүдөө ажахын үйлэдбэриин гол һалбаринуудай нэгэн болоно. Тиимэһээ энэ асуудалаар улас дотор хүдөө ажахы эрхилэгшэд һанамжаараа хубаалдахань шухала.
2017 оной ноябриин 22-то Буряад Уласай Засагай газарта мяхан үүлтэрэй мал ажахы хүгжөөхэ тухай зүблөөн Засагай газарай түлөөлэгшэдэй, аймагуудай хүтэлбэрилэгшэдэй, фермернүүд болон эрдэмтэдэй хабаадалгатайгаар үнгэргэгдэһэн байна гэжэ һануулнабди.
«Мал ажахы хүгжөөлгын асуудалнуудаар хөөрэлдөөгөө үргэлэжэлүүлхэмнай. Энээнһээ урид мал үсхэбэрилхэ асуудалаар хэлсэжэ, зохихо хэмжээ ябуулгануудые үнгэргэхэ тухай хэлсэгдээ. Мүнөө зарим асуудалнуудаар ажал ябуулагдаа, бэшэниинь бэелүүлэгдэжэ эхилээ. Хүдөө ажахын хүгжэлтэгүйгөөр уласай бүхы олзо дээшэлүүлхэ аргагүй», - гэжэ уласай хүтэлбэрилэгшэ суглаанда хэлэбэ.
Удаань Зэдэ аймагай хүдөө ажахын үйлэдбэриин «Баян» хамтаралай түрүүлэгшэ Наталья Бальчугова мал ажахын һалбарида һү үйлэдбэри дээшэлүүлхэ талаар дурадхал оруулжа, мал үсхэбэрилгэдэ мүнгэн тэдхэмжэ үзүүлхэ тухай хэлэбэ. Хизаарламал харюусалгатай «СП Тугнуй» бүлгэмэй захирал Дмитрий Климов хүдөө нютагуудта ажалшадай талаар һанамжаяа хэлэбэ. Тиихэдэ уласай хүдөө ажахын үйлэдбэринүүдэй хүтэлбэрилэгшэд хүдөө ажахы хүгжөөхэ талаар дурадхалнуудые баһал оруулба.
Үнгэргэгдэһэн суглаанай дүнгүүдээр Буряад Уласай Толгойлогшо Алексей Цыденов Хүдөө ажахын яаманда даабаринуудые даалгаба. Нэрлэбэл, хүдөө ажахын үйлэдбэридэ ажалшадай дутагдалай талаар, залуу мэргэжэлтэдые бэлдэхэ талаар асуудалнуудта онсо анхарал хандуулагдаха. Тиихэдэ улас дотор үүлтэртэ мал үсхэбэрилхэ албан байгуулагдажа, энэ ажалда баһал онсо анхарал хандуулагдаха юм. Огородой эдеэ, малай тэжээл ургуулха теплицын комплекснуудай барилга ябуулха, үйлэдбэрилһэн эдеэ хоолоо худалдаха хэрэгтэ фермернүүдтэ туһа хүргэхэ гэһэн асуудалнуудаар суглаанда хэлсэһэн байна. Хүдөө ажахы эрхилэгшэдтэ барилга хэхэ ой модо үгэхэ талаар асуудал хэлсэгдэхэ. Үхэр малай таряаланда хохидол үзүүлхэгүй талаар хиналта эршэдэхэ юм. Буряад Уласай Хүдөө ажахын болон эдеэ хоолой яаман Ородой Холбоото Уласай бусад можо нютагуудай хүдөө ажахын болон эдеэ хоолой һалбариин дүй дүршэл хаража үзэхэ юм.
Буряад Уласай Засагай газарай сайтһаа гэрэл зураг абтаба.
