Тоонто нютагынь
Үершье, түймэршье,
Үймөөншье хадаа,
Үхэлшье, зоболоншье,
Жаргалшье хадаа
Үлгэн замбиин үргэһэн болоод лэ,
Үедөө нэгэтэ үнгэрдэг юм даа...
Үнгэрһэн юумэн үнгэрөө гээд лэ,
Үнэндөө энээндэнь бү этигэ.
Үнгэрөөд һөөргөө бусадаг юм даа,
Үедөө нэгэтэл эрьедэг юм даа.
(Дондок Улзытуев)
“Модон үндэһэтэй, хүн угтай” гэжэ мүнөө сагта бүришье ехээр уг унгияа хүнүүд бэдэрдэг болонхой. Уг соомнай ямар хүнүүд байһан бэ, юу хэдэг байгааб гэжэ ехээр һонирхожо, нютагайнгаа аха захатантай хөөрэлдэнэ, бүхы архивуудһаа һурагшална. Тиигэһээр олон зон ехэ һонин ушарнуудые, түрэл гаралайнгаа бодото намтар, арадай үмэнэ аша габьяаень мэдэжэ абана.
Мүнөө Улаан-Үдэдэ ажаһуудаг, наһаараа түүхын багша ябаһан Надежда Санжиева баһал уг удамаа мүшхэхэдөө, гайхалтай һонин намтартай нагаса тухайгаа мэдээнүүдые олоо. Хори буряадуудай гушад обогой, Бэшүүрэй Гушад (Гочит) нютагта ажаһуудаг Цыденжап Санжиевай, Дари Шойбоновагай, Дулма Санжиевагай нагаса Цыден-Еши Содномович Дашепилов-Гочитский Халха Монголой бэеэ дааһан гүрэн болохо хэрэгтэ шиидхэхы үүргэ дүүргэһэн Дамдинай Сүхэ-Баатартай хамта ябалсаһан, арадай намай, гүрэнэй тогтоолгодо ехэ ажал ябуулһан байна гэжэ ойлгоо.
Тон һайнаар лаблаха гэжэ Надежда Митыповна Аюулгүйе сахилгын федеральна албанда хандалга бэшэг эльгээгээ. Тиигээд иимэ харюу абаа.
Ородой Холбоото Уласай Аюулгүйе сахилгын федеральна албанай Санкт-Петербургын болон Ленинградска можын албанай архивай жасаһаа
Н.М.САНЖИЕВАДА
Хүндэтэ Надежда Митыповна!
Хандалгыетнай хараад, архивай жасада олдоһон данса танда эльгээбэбди.
Дашипилон-Готчитский Циден-Еши, 1895 ондо түрэһэн, Буряад-Монголой АССР-эй Хайсагар нютагай, буряад яһанай, Монголой эрхэтэн. Дээдэ эрдэмтэй, «Скороход» фабрикын бүлгэмэй хүтэлбэрилэгшөөр хүдэлөө, Ленинград хотын Кировскэ проспектын 55-дахи гэрэй 35-дахи байрада ажаһуугаа.
Ц-Н. Дашипилон-Готчитскиие 1937 оной августын 26-да Ленинградска можын НКВД РСФСР-эй УК-гай 58-6. 58-9 болон 58-11 статьянуудаар гэмнэжэ тушаагаа.
СССР-эй НКВД-эйн Тусхай Суглаагаар 1940 оной февралиин 19-дэ 8 жэлээр эрхэеэ хаһагдажа, Магаданай Севвостлаг лагерьта ябуулагдаа.
1940 оной декабриин 3-да наһа бараа.
Ленинградска сэрэгэй тойрогой Сэрэгэй трибуналаар 1956 оной майн 25-да Ц-Е. Дашипилон-Готчитский зэмэгүй гэжэ сагааруулагдаа.
Ц-Е. Дашипилон-Готчитскиин хэрэгэй дансанууд соо түрэлнүүдынь заагданхай: наһанайнь нүхэр - Екатерина Александровна Дашипилон, 41 наһатай, Ленинградта ажаһуугаа, аха - Базар Цирено, 54-тэй, Улаан-Үдэдэ ажаһуугаа. Түрэлнүүд тухайнь ондоо мэдээн үгы.
Тамгын газарай дарга П.В.Миронов.
Надежда Митыповна бэдэрэлгын ехэ ажал ябуулжа, нагасынгаа уг удам шэнжэлээ. Хори-буряад угай хара гушад обогой Цыден-Еши Содномович Дашепилов-Гочитскиин уг: Барга Баатар - Хоридой мэргэн - Гучит - Хуухана - Шэрүүн - Ананда - Бавалдай - Алагтай - Одосхой - Ногто (5 хүбүүтэй) - Нори заһуул - Бодхуул заһуул - Манжуу (Манита) зайһан - Сыдэн капитан, титулярна советник - Эрдэни гулваа - Дашибал гулваа - Содном - Цэдэн-Еши. Иигээд харахада, энэ обогой эрэшүүл харюусалгата тушаалнуудые даажа, хүндэтэй ябаһан гэжэ ойлгогдоно. Нори заһуул алба татабаригша байһан һаа, Манжуу нютагайнгаа зайһан болоһон байна. ХVIII зуун жэлэй 70-аад оноор хатан хаан хоёрдугаар Екатерина Сыдэн Манжуевта капитанай нэрэ зэргэ олгоһон, харин нэгэдүгээр Александр хаан титулярна советник болгоһон байна. Эндэ Баатар сагаан хаанай зарлиг тэрэ зандань толилнобди:
«Божьей милостью Мы, Александр I, император и самодержец Всероссийский, Малые Белые России и прочая… зайсана Гучитского рода Сыдын Манжуева в воздаяние отличного к службе нашей усердие 1801 года июня 19 дня всемилостивейше пожаловали и учредили титулярного советника. Мы надеемся, что он в сем ему так честно и примерно поступать будет как верному подданному подлежит, а во свидетельство чего Мы сие Правительственному Сенату подписать и Государственного нашего печатью укрепить повелели».
Санкт – Петербург. Апреля 21 дня 1805 г.
На подлиннике подписались: сенатор и кавалер Сергей Хитров, граф Александр Салтыков, сенатор Иван Захаров (НАРБ, Ф. 8, оп. 1, , д. 889, л. 122).
2015 оной хабар Надежда Митыповна одхон Вячеславтаяа, Надежда бэритэеэ Улаан-Баатар хүрэжэ, Сүхэ-Баатарай нэрэмжэтэ Үндэһэтэнэй музейдэ орожо, нагаса тухаймнай юумэн эндэ хадагалагдажа байдаггүй юм гү гэжэ һонирхоо. Монголой арад зон түүхэдээ ехэ наринаар хандадаг байба. Бүгд Найрамдах Монгол Уласай байгуулагдаһан түүхэ болон энэ ехэ түүхэтэ үйлэдэ хабаадаһан зоной габьяа аятайхан дэлгэгдэһэн байба. Монгол Уласай байгуулгада болон хүгжэлтэдэ Цыден-Еши Содномович Дашепилов-Гочитский ямар хамаатайб гэхэдээ, ямар ажал ябуулһаниинь аржытар бэшээтэй байгаа.
Цыден-Еши Дашепиловэй хубисхалта замай шэнжэлэлгэ «Угай зам» сониндо гараа һэн. Цыден-Еши Дашепилов 1895 ондо Хайсагар («hайса хара») нютагта түрөө. Тогтохотойн буса түрэлтэнэй һургуули дүүргээд, Дээдэ-Үдын гимнази дүүргэһэн, тэрэ үедөө эрдэм ехэтэй, өөрын хурса ухаатай, бэлигтэй хүн байгаа. Тиимэһээ 1913-1917 онуудаар хушуундаа нарин бэшэгэй даргаар хүдэлөөд, буряадуудай түрүүшын кооператив хүтэлбэрилһэн байна. Тиигэһээр байтараа, хубисхалай хүдэлөөндэ эршэтэйгээр хабаадажа, урагшаа һанаатай монголшуудаар ехэ ажал ябуулаа.
Алас Дурна зүгэй Коминтернын секретариадай С.С. Борисовтай Үргөө (Богдын хүреэ) гаража, Сүхэ-Баатар Чойбалсан хоёртой ехэ ажал ябуулаа. Тэдэнэй 1921 ондо Дээдэ-Үдэ болон Эрхүүдэ ажаллахадань, ехэ туһа хүргэһэн байна. 1921 ондо барон Унгернын сэрэгэй тэгэндэ орожо, монгол-буряадуудай хоорондо идхалгын, ойлгууламжын ажал ябуулхаһаа гадна, сагаантанай хүсэ шадалые болон түсэбүүдые мэдээсэжэ, аргагүй ехэ туһа хүргэһэн байна. Эндэһээл Цыден-Еши Дашепилов “Гочитский” гэжэ нэрлүүлэгдэдэг болоһон намтартай.
Ц-Е. Дашепилов-Гочитский 1921 оной хабар Монгол арадай хубисхалта намай I хуралдаае эмхидхэлгэдэ болон үнгэргэлгэдэ хам оролсоһон габьяатай. Тэрээнтэй хамта энэ ехэ үйлэ хэрэг Балмацу Цэрэнэй, Сандаг-Доржи Жамбалын (Бэшүүрэй бодонгууд), Эрдэни Батухан (Боохоной), Цыбен Жамцарано (Агын) болон тэрэнэй наһанай нүхэр, Франциин Сорбоннын университет дүүргэһэн Бадмажаб Сахьяагиин (Хориин) буряадууд шударгыгаар бүтээлсэһэн гэжэ мэдээжэ.
Цыден-Еши Баруун-Харганаагай гулбаа Цыдендамба Добдоновой Гамаа басагантай гэрлэһэн байгаа. Теэд тэдэ үни һуугаагүй, үхибүүшье түрөөгүй. Энээн тухай тэдэнэйдэ һуулгамаршанаар, тогоошоноор хүдэлһэн 103 наһа хүрэһэн эхэнэрэй болон Дулма Санжиевнагай хөөрөөнүүдһээ мэдээжэ.
Улаантан, сагаантанай тэмсэжэ байһан тэрэ шанга үедэ Бэшүүрэй улаан партизанууд Содном Дашепиловые тушаагаад, арадай дайсан гэжэ буудахаяа абаашаа. Тэрэ үедэ Хяагтаһаа Цыден-Еши улаан сэрэгшэдтэй ерэжэ, эсэгэеэ саазалуулгаһаа абарһан түүхэтэй. Тиигээд Хайсагарһаа эжыгээ баһа абалсаад, хилэ дабаһан юм.
Монголдо арадай хубисхалай илахада, Ц-Е. Дашепилов шэнэ гүрэнэй засаг зургаанай тогтонижохын тула ехэ ажал ябуулһан. Арадай Хубисхалта намай түрүү зэргэдэ ябалсажа, засагай дэргэдэ сан жасын талаар гол зүбшэлэгшэ байгаа. Эдеэ хоолоор болон хубсаһа хунараар сэрэгшэдые хангаха болон сэрэгэй бүхы зөөриие, сан жасые нөөсэлхэ, хадагалха, хамгаалха ажалые сүм ябуулаа. Энэ ажалаа эрхимээр ябуулаад, намай нарин хиналтын комиссиие даан абажа, Монголой Эдэй засагай зүблэлэй гэшүүнээр, Монголой кооперативуудай түрүүлэгшээр хүдэлхэдөө, хоёр хүршэ оронуудай худалдаа наймаае үргэдхэхэ ехэ ажал ябуулаа. Тэрэ СССР, Германи, Франци, Итали гүрэнүүдээр ябажа, дүй дүршэлтэй болоо.
Тэрэнэй түрэлэйдөө үргэгдэһэн ууган аха Балмасу Цэрэнов (1890 оной), баһал эрдэмтэй бэрхэ багша, РКП (б)- гэй Сиббюрогой зүүн зүгэй арадуудай таһагай гэшүүн, Хяагтада хүдэлөө. Тиигээд хилэ шадархи монголнуудай дунда идхамжын ажал ябуулаа. Монголой Арадай хубисхалта намай 1-дэхи хуралдаанда нарин бэшээшэнь байгаа. Шэбээ-Хяагтые (Маймачен) сүлөөлхэ байлдаанда хабаадалсаһан, 1921 ондо Монголой хубисхалшадтай Москва ошожо, В.И. Ленинтэй уулзаһан, Коминтернын II Конгресстэ хабаадаһан юм.
Зэбүүрхэмэ сэмүүн саг
1920-ёод онуудай хуушаар Монголдо «феодализмһаа сэхэ социализм руу” гэһэн шугам баримталжа, СССР-эй НКВД-эйн заалтаар “баруун тала баримталагшад” гэжэ гүрэн түрын эрхим бэрхэ хүтэлбэрилэгшэд олоороо гэмнэгдээ. Нэн түрүүн буряадууд зэмэлэгдэһэн юм. 1929 ондо Элбэг-Доржо Ринчино, Цыбен Жамцарано, Эрдэни Батухан болон бусад Монголһоо ябуулагдаһан юм.
Тиихэдэ Үргөөдэ бузар муухай удхатай бэшэг дансанууд тараагдаа. Нэгэн соонь: “Хомхой хобдог Жамцарано, Ринчино, Цыден-Еши (Гочитский) буряад нохойнууд болон Сан жасын яаманай тэдэнэй туһамаршад хэдэн мянган мүнгэн яншаа хулгайгаар үбэртэлжэ, оронһоомнай гаргахаяа һэдэжэ байна. Тиимэһээ бидэ, Дотоодын хэрэгүүдэй, Сан жасын, Хуули эрхын 49 албатад, эдэниие элирүүлхэ ажал үнинэй ябуулаабди. Теэд Богдо гэгээн үбдэжэ һаатуулаа. Эдэ гурбан буряадые Халхын сан жасын мүнгэ зөөри үбэртэлөөд ябахадань шангаханаар угтахаар бэлэмди”. Үшөө тиигээд хэдэн шог ёгто зурагууд үгтөөтэй: элжэгэн толгой – Цэрэндорж (гүрэнэй засаг дарга – халха монгол), гахайн - Ринчино, нохойн - Гочитский, бухын - Батухан, шонын – Цэцэн-хан (халха монгол), доронь – халдабарита үбшэ тараадаг гал дүлэтэ боомбо.
Теэд энэ гээшэ эхи заханиинь лэ бултайжа байна гэжэ эдэ зон хаанаһаа мэдэхэ бэлэй. 1930-аад оноор Монголдо ажаһууһан буряад эрэшүүлые 17-тойһоонь эхилээд, бултыень хюдаһан гашуудалта түүхэ юм! Харин эхэнэрнүүдынь ангиин дайсадай туһамаршад гүүлэжэ, ямар зоболонгой далайе гаталһан юм гэжэ Сэнгын Эрдэнэ бэшэһэн байдаг. “Тэрэ үедэ хонишье гаргаха эрэшүүл үлдөөгүй юм даа”, - гэжэ 1990-1992 онуудта Монголой юрэнхы сайд байһан Д. Бямбасүрэн хэлээ һэн.
Хэды тиигэбэшье, “Буряад” поэмэ соогоо суута Ринчинэй Чойном иигэжэ бэшээ бэлэй:
Ажилсаг энэ буряад зонууд
Ард түмэнд минь ихииг өгсөн юм,
Ид цэцэглэх хориод насанд минь
Их зүйлийг ойлгуулж үгсэн юм.
Гэртээ сүлүүлэн бусаагдахадаа, урагшаа һанаатай буряадууд түрэл Буряадтаа туһатай ажал ехэ урагшатайгаар ябуулаа. Ц-Е. Дашепилов-Гочитский, Ленинградска инженернэ-экономическа дээдэ һургуули дүүргээд, «Скороход» фабрикада хүтэлбэрилэгшөөр хүдэлөө. Цэбээн Жамцарано СССР-эй Эрдэмэй хүреэлэнгэй гэшүүн-корреспондентээр амжалта түгэс хүдэлөө. Эрдэни Батухан Ленинградай түүхын, гүн ухаанай болон хэлэ бэшэгэй дээдэ һургуули дүүргээд, Зүүн зүгые шэнжэлдэг дээдэ һургуулида багшалаа.
Хэды тиигэбэшье, түрүү буряад хүбүүдые бушуухан тушаагаа.
- Манай бэдэрэлгэ-шэнжэлэлгын ажал үшөө түгэсөөгүй. Үшөөл олон асуудалнууд бии. Гол бодолнай гэхэдэ, Бэшүүрэй Гушадай зон болон бүгэдэ буряад арад эрхим хүбүүдээрээ омогорхожо, уг удамаа хүндэлжэ ябаял даа, - гэжэ Надежда Митыповна бултаниие уряална.
Хардалга хамалганда орожо хосорһон буряадуудай гэрэлтэ дурасхаалда субарга бодхоохо ажал Дээдэ-Онгостойн дасанай Зандан-Жуу дуганай шэрээтэ Сандан лама ябуулжа эхилээ.
Мүнөө үедэ Монгол Уласай хүгжэлтэдэ өөһэдын хубитые оруулжа, 60 мянган буряадууд ажана амгалан ажаһууна.