875
Буряад Уласай байгаалиин нөөсэнүүдэй сайд Юрий Сафьянов майн 4 болотор хүдэлөөд, тушаалаа сүлөөлхэ юм. «Новатэк» компанида хүдэлхэ тухай дурадхал орожо, Юрий Сафьянов тушаалаа сүлөөлнэ.
«Новатэк» компаниһаа һонирхолтой дурадхал орожо, би тэрээнһээ арсажа шадаагүйб. Энэ компаниин ажалай шэнэ шэглэл хүтэлбэрилхэб. Апрелиин 20-да Ородой Холбоото Уласай сайд Сергей Донскойн хүтэлбэрилһэн нүүдэл суглаанда хабаадахадаа, Алексей Цыденовтэй хэлсээб. Уласай хүтэлбэрилэгшэ минии мэдүүлгэдэ гар табиһан байна. Майн 3-да Буряад Уласта ажалай һүүлшын үдэр хүдэлөөд, Москва хото гарахаб», - гэжэ Юрий Сафьянов хэлэбэ.
Буряад Уластай холбоотой байха тухайгаа сайд тэмдэглэбэ.
«Буряадта гэр барижа, мода тарижа, хүүгэдээ үндылгөөб. Шэнэ ажалдаа Буряад Уласта туһа хүргэхэеэ оролдохоб», - гэжэ байгаалиин нөөсэнүүдэй сайд хэлэбэ.
Тобшо мэдээн
Юрий Павлович Сафьянов 1976 ондо Магадан хотодо түрэһэн юм. 1996 ондо техник барилгашанай дунда мэргэжэлтэй болоһон байна. Тэрэ Ородой гүрэнэй гуманитарна ехэ һургуули дүүргэһэн намтартай. Хизаарламал харюусалгатай «Хужир Энтерпрайз» бүлгэмэй хүтэлбэрилэгшөөр, 2006 онһоо хойшо Буряад уласта «Вертекс Инвест» бүлгэмэй юрэнхы захиралдай зүблэгшөө хүдэлһэн юм. 2014 оной июнь һарада Буряад Уласай Толгойлогшо Юрий Сафьяновые байгаалиин нөөсэнүүдэй сайдай тушаалда томилһон тухай тогтоол абаһан байна.
Хуби ниилүүһэн нээмэл «НОВАТЭК» бүлгэм Ородой Холбоото Улас дотор байгаалиин газ үйлэдбэрилдэг эгээл томо эмхинүүдэй нэгэн юм. Ородой нефть, газай һалбарида энэ компани хорёод жэлһээ дээшэ ажалаа ябуулна.
Анна Огороднигой гэрэл зураг
