931
Үсэгэлдэр, майн 7-до, Ородой Холбоото Уласай Юрэнхылэгшын тушаалда Владимир Путинай тангаригаа үгэхэ ёһолол Кремлиин Андреевскэ танхимда үнгэргэгдөө. Энэ хэмжээ ябуулгада Буряад Уласай Толгойлогшо Алексей Цыденов хабаадалсаа.
Тиихэдэ Ородой Холбоото Уласай Юрэнхылэгшын тушаалда орохо ёһололдо Буряад Уласһаа Ородой Холбоото Уласай Федеральна Суглаанай түлөөлэгшэд, Гүрэнэй Дүүмын һунгамалнууд, Ородой Холбоото Уласай Буддын шажантанай заншалта Сангхын Бандида хамба-лама Дамба Аюшеев, Ород гүрэнэй Олониитын танхимай түлөөлэгшэ Галина Горбатых, Буряад Уласай һунгуулиин комиссиин түрүүлэгшэ Дмитрий Ивайловский болон бусад уригдаһан байгаа.
Ородой Холбоото Уласай Юрэнхылэгшын тушаалда орохо ёһолол Ород гүрэнэй шэнэ түүхэдэ 7-дохиёо үнгэргэгдэнэ гэжэ тэмдэглэлтэй.
Ородой Холбоото Уласай Юрэнхылэгшын тушаалда орохо ёһололой удаа Буряад Уласай Толгойлогшо Алексей Цыденов иигэжэ хэлэбэ: «Ородой Холбоото Уласай Юрэнхылэгшын тушаалда орохо ёһолол – гүрэн түрэдэ ехэ удха шанартай үйлэ хэрэг болоно. Удаадахи зургаан жэлдэ бэелүүлэгдэхэ зорилгонууд элирхэйлэгдэжэ, энэ талаар зохихо зарлигууд абтаха гэжэ хүлеэнэбди».
Владимир Путинай Ород гүрэнэй Юрэнхылэгшын тушаалда орохо ёһолодо федеральна болон можо нютагуудай засаг зургаанай хүтэлбэрилэгшэд, соёлой хүдэлмэрилэгшэд, олониитын эмхинүүдэй түлөөлэгшэд, волонтёрнууд болон һунгуулиин үедэ ябуулагдаһан ажалда хабаадагшад уригдаһан байна.
kremlin.ru сайтһаа гэрэл зураг абтаба
