​Юрэнхылэгшын тангариг

Ородой Холбоото Уласай Юрэнхылэгшэ Владимир Путин уржадэр гүрэн түрынгөө арадай урда тан­гариг барижа, хуулиин ёһоор тушаалдаа оробо.

Хууляар хараалагдаһан ёһолол

Россиин Гүрэнэй туг, Юрэнхы­лэгшын штандарт, Россиин Үндэһэн Хуули болон Юрэнхылэгшын заса­гай Һүлдэ тэмдэг Кремлиин ордо­ной Андреевскэ зал руу оруулагда­жа, баяр ёһолол эхилһэн байха юм. Юрэнхылэгшын тангаригаа үргэхэ тайзан дээрэ Федеральна Суглаа­най хоёр танхимай түрүүлэгшэнэр Валентина Матвиенко, Вячеслав Володин, Үндэһэн Хуулиин Сүүдэй Түрүүлэгшэ Валерий Зорькин гэг­шэд хойно хойноһоо һубарин гара­жа, хүн бүхэниинь өөрынгөө байха тусхай газарта зогсобод.

Юрэнхылэгшын Тангариг үгэхэ ёһололдо энэ удаа хэзээ хэзээнэйхиһээ олон, аяар табан мянга гаран айлшад уригдаа. Буряад Ула­сай Толгойлогшо – Засагай газа­рай Түрүүлэгшэ Алексей Цыденов, гүрэнииемнай уласай парламентда түлөөлдэг һунгамалнууд түүхэтэ хэмжээ ябуулгада хабаадаа. Ородой Холбоото Уласай Буддын шажанта­най Заншалта Сангхын Бандида Хам­ба лама Дамба Аюшеев мүн лэ баяр ёһололдо уригдаһан байха юм. Түбэй телесубагуудай үнгэргэһэн сэхэ дам­жуулгада дээдын санаартаниие бу­сад айлшадай дунда харуулаа.

Ородой Холбоото Уласай Үндэһэн Хуулиин 82-дохи статьятай зохилдуулан, Федеральна Суглаанай хоёр танхимай - Федерациин Зүблэлэй гэшүүдэй болон Гүрэнэй Дүүмын һунгамалнуудай, Үндэһэн Хуулиин Сүүдэй шүүгшэдэй байхада, ара­дайнгаа үмэнэ Владимир Путин тан­гариглаба. Удаань Юрэнхылэгшын тушаалда ороһон тухайнь гүрэнэй Үндэһэн Хуулиин Сүүдэй Түрүүлэгшэ Валерий Зорькин соносхоһон байна.

Тэрэнэй һүүлдэ Ородой Холбоо­то Уласай Юрэнхылэгшын, Зэбсэгтэ Хүсэнүүдэй Дээдын Ахамад захираг­шын тушаалаа эзэлһэн ушараарнь Юрэнхылэгшын полк Владимир Пу­тинай урда ерэжэ ёһолбо.

Хууляар хараалагдаһан ёһололой удаа Кремлиин ордоной газаа суглараад байһан, баярай энэ хэмжээ ябуулгада мүн лэ түрүүшынхиеэ уригдаһан олониитын залуушуулай эмхинүүдэй түлөөлэгшэд, һунгалта эмхидхэхэ ажалда өөһэдынгөө һайн дураар эдэбхи ехэтэйгээр хабаадалсаһан хүбүүд, басагадтай Россиин Юрэнхылэгшэ Владимир Пу­тин уулзажа хөөрэлдөө.

Хэмгүй ехэ харюусалга

Үндэһэн Хуулиин ном дээрэ баруун гараа табижа, тангариг үгэһэнэйнгөө удаа сугларагшадта хандажа, Владимир Путин үгэ хэлэ­хэдээ: “Юрэнхылэгшын тушаалда орожо байха үедөө хүн бүхэнэйтнай урда, олон үндэһэ яһата арадайн­гаа үмэнэ, агууехэ илалтануудаа­раа суурхаһан Россиин болон гүрэн түрын байгуулалтын мянгаад жэ­лэй түүхын урда хэмгүй ехэ харюу­салгаяа мэдэрнэб”, - гэжэ тэмдэглээ. Арадаймнай эрэлхэг зориг, эсэшэ сусашагүй ажал, илагдашагүй нэгэ­дэл, түрэл нютагтаа нангинаар хан­даха ёһо хадаа Эсэгэ орондоо үнэн сэхэ байлгын мүнхын жэшээ гээшэ гээд Юрэнхылэгшэ хэлэһэн байна.

Эхэ оронойнгоо мүнөөдэрэй бо­лон ерээдүйн – агууехэ арадайнгаа таһаршагүй угаа залгажа байхын тула, гүрэндэмнай ажаһуудаг бүлэ бүхэнэй амгалан тайбан, аза жаргал­тай ажабайдалай түлөө бии хүсэ ша­далаа элсүүлэн ажаллаха эрмэлзэ­лые өөрынгөө гол уялга, наһанаймни удха гэжэ тоологшоб гээд Владимир Путин тэмдэглээ. “Түбхын түрүүндэ хүн зоной, Эсэгэ оронойнгоо урда алба хэхэ гээшэ минии наһанай, эр­хилжэ байгаа ажалаймни гол зорил­го зандаа үлэхэ”.

Үнгэрһэн һунгалтын үедэ эбтэй­гээр дэмжэжэ, диилэнхи олоороо ду­угаа үгэһэнэйнь түлөө арад зондоо Владимир Путин үнэн зүрхэнһөө баяр хүргөө.

kremlin.ru сайтһаа гэрэл зураг абтаба