Ардаевтанай амаршалга
Агуу Илалтын һайндэрые 73-дахияа мүнөө жэл тэмдэглэжэ байнабди. Захаамин аймагай Санага нютагта баһал үргэнөөр энэ ехэ һайндэрые угтаба. Гашуудалтайнь гэхэдэ, сэлгеэ ехэ Санагада Эсэгэ ороноо хамгаалгын Агууехэ дайнай нэгэшье ветеран үлөөгүй, харин дайнай ара талын 13 лэ ветеранууд амиды мэндэ байнад.
Үглөөнһөө эхилжэ, нютагай сомон дарга Юрий Дамбаев, Закаменскһаа ерэһэн Алдар Норбоев Екатерина Дашеева хоёр болон Сталинградска байлдаанда эрэлхэгээр хабаадаһан Санжа Ардаевай үхибүүд ябажа шадахагүй ветерануудта гэртэнь хүрэжэ, халуунаар амаршалжа, бэлэг сэлэгүүдээ барюулаа.
Санагын һургуулиһаа һурагшад “Мүнхын жагсаалда” гаража, жэгдэ гэшхэлэлдэн, Эхэ оронойнгоо түлөө баатарай үхэлөөр унаһан 112 баатар нютагаархидайнгаа хүшөөдэ ерэжэ, дүхэриглэн зогсобод. Хүшөөгэй дэргэдэ автомат буу бариһан сэрэгэй хубсаһатай хүбүүд бэе бэеэ һэлгэлдэн, хүндэлэлэй харуулда зогсонод. Хүндэтэ айлшад – дайнай ара талын ветеранууд, дайнай үедэ үхибүүн ябаһан наһатайшуул һууринуудаа эзэлжэ һуубад.
Ара талын ветерануудтай
Нэн түрүүн эгээл багашуул – сэсэрлигэй хүүгэд уран шүлэгүүдые сээжээр уншажа, аха захатаниие амаршалба. Хүндэлэлэй харуулда байһан хүбүүд хүшөөдэ хүжэ мүнхэ гүрэмэлнүүдые табяа. Иимэл гүрлөөе Санжа Ардаевай үхибүүд, аша зээнэр табижа, үбгэ эсэгынгээ аша габьяае дурсаа. Алдар Солын орденуудай дүүрэн кавалер Бато Дамчеевэй хүшөөдэ түрэл гаралнуудынь улаалзай сэсэгүүдэй баглаануудые табяа.
"Мүнхын жагсаалда"
Сомон дарга Юрий Дамбаев, дунда һургуулиин захирал Ирина Бандеева, Захааминай наһатайшуулай “Хадата агаар” байшангай захирал Алдар Норбоев, уласай 8-дахи түхэлэй һургуулиин захирал Екатерина Дашеева, Бато Дамчеевэй зээ Саян Бадмаев нютагайнгаа зониие халуунаар амаршалжа, элүүр энхэ ябажа, эб хамта Агуу Илалтын 75 жэлэй ойе угтахые уряалаа. Нютагай ирагуу найрагша Даниил Нохоров, һурагшад уран шүлэгүүдээ уншаа.
Буряадай гүрэнэй дуу, хатарай “Байгал” театрай уран бэрхэ артистнууд Агуу Илалтын һайндэртэ зорюулжа, ирагуу дуунуудаа, солбон солгёон хатар наадаяа дэлгээ. Соёлой ордоной ехэ танхим соо багтажа ядатараа сугларһан харагшад артистнуудай уран бэлигые үндэрөөр сэгнээ. Нютагайнгаа хүбүүн Жаргал Бадмаевай концерт-наадаяа уран гоёор хүтэлбэрилхэдэнь, бүришье баяртайнууд, бахархалаа мэдүүлжэ, халуун альга ташалгаар угтажа байгаа. Захааминда гастрольдо ябаһан эдэ хорёод артистнуудай хахадынь шахуу хангай ехэ Захааминай хүбүүд, басагад байгаа гэжэ омогорхолтойгоор тэмдэглэе.
Фронтовигай үри үхибүүд ветерануудые хүндэлбэ
Дайнай, хүдөө ажахын ажалай ветеран, Баатар-хото Сталинградые хамгаалагша Санжа Шагдарович АРДАЕВ мэндэ ябаа һаа, 105 жэлэйнгээ ойе угтаха байгаа.
Энэ ушараар дашарамдуулан, үри үхибүүдынь, аша зээнэрынь тоонто нютагайнгаа аха захатаниие Илалтын һайндэрөөр хүндэлхэ гэжэ ехэ ажал ябуулаа. Улаан-Үдэ хотоһоо багшын ажалай ветеран, “РСФСР-эй гэгээрэлэй отличник”, 80 наһатай Татьяна Сампилова; бүхы наһаараа Буряад Республикын гүрэнэй архивта хүдэлһэн, Буряадай соёлой габьяата хүдэлмэрилэгшэ, 74-тэй Дора Абагаева Саржана, Марина, Бэлла зээнэртэеэ; Галина Санжиевна, Олег Юрьевич Балдаевтан; Людмила Санжиевна Солбон хүбүүтэеэ; Екатерина Санжиевна, Николай Гомбоевич Гомбоевтон Артём, Тимур, Арина зээнэртэеэ; Ада Санжиевна, Пётр Санжиевич Очировтан Кирилл зээтэеэ микроавтобус хүлһэлжэ, үбгэн таабайнгаа, өөһэдынгөө түрэһэн, үдэһэн тоонтые харуулхаяа, сэлгеэ ехэ Санагада үбгэн таабайетнай һайн һайханаар һанан дурсадаг юм гэжэ үхибүүдтээ ойлгуулхаяа, хүндэтэ ветерануудаа амаршалан хүндэлхэеэ ерээ. Энэл нангин хэрэгээр хэбэд номхон Хэжэнгэһээ Ксения Санжиевна, Арсалан Патанханович Базаронтон Зүүн Сибириин гүрэнэй технологическа дээдэ һургуулиин дид-доктор Сэсэг басагатаяа; баһал фронтовик Дондок Шагдарович Ардаевай басаган Любовь Дондоковна гэгшэдэй тоонто нютагаа ерэхэдэ, Санжа Шагдаровичай зээ басаган, бүхы наһаараа Санагынгаа почтодо эрхимээр ажаллаһан, Буряадай хэлхеэ холбооной габьяата хүдэлмэрилэгшэ Эмилия Цырендоржиевна Владимир Хандуевич нүхэртэеэ, Буряадай габьяата малай эмшэн Евгения Цырендоржиевна Владимир Санжиевич нүхэртэеэ, ашанар зээнэртэеэ халуунаар угтажа, энэ ехэ бүгэдэ арадай һайндэрые һайн һайханаар үнгэргэхые бүхы шадалаараа оролдоо.
Аша зээнэр амаршална
АРДАЕВ Санжа Шагдарович 1920-ёод оной һүүлээр эхин шатын һургуули дүүргээ. Хамтын ажалда эдэбхитэйгээр хабаадаа. Дайнай урда малшадай бригадираар хүдэлөө. 1942 оной эхеэр дайнда мордоо. Тиигээд лэ тэрэ үедэ түүхэдэ ороһон эгээл шуһата Сталинградые хамгаалалгын байлдаанда эрэлхэгээр хабаадаһан габьяатай юм. Тэрэ сагта фашис Германитай хамта манай Эхэ орондомнай добтолһон Италиин, Румыниин сэрэгшэдтэй дайлалдаа.
Дайнай гал дүлэн соогуур нютагайнгаа Чимит Шагдурович Балуевтай ээм мүрөө түшэлсэн тулалдажа ябаха золтой байгаа. Бэе бэеэ харалсажа, эдихэ хоолоо хубаалдажа, эб хамта долоон һара дайлалдажа ябаа. Санжа Шагдарович хүндөөр шархатаад, Баруун фронтһоо зүүн тээшээ олон госпитальнуудта эмшэлүүлһээр, Эрхүүгэй госпитальдо асарагдаа. Эндэһээ гэртээ мэдээ эльгээгээ.
- Наһанайнь нүхэр, манай эжы Долгор Мункуевна нэгэ үхэрөө гаргажа, түргэн дундаа түхеэржэ, утын харгыда гараа. Тиигэжэ хайрата нүхэрөө, манай үлбэр эсэгые Санагадаа асараа. Нютагайнгаа түрэл байгаалиһаа, эм домто аршаан булагуудһаа, наһанайнгаа нүхэрэй үнжэгэн һайн харалтаһаа, үри үхибүүдэйнгээ золоор Санжа Шагдарович хүл дээрээ бодоо. Тиигээд дайнай инвалидшье һаа, түрэл колхоздоо хамсыгаа шамажа хүдэлөө. Олон жэлэй туршада полевод бригадираар үрэ дүнтэйгөөр ажаллаа. Теэд дайнай шарханууд шархиран зобоохо даа. 1960-аад оноор бэе тамирайнгаа һуладаһанһаа бригадирайнгаа тушаалһаа болёо. Долгор Мункуевнагайнгаа шахамал малай гүүртэ даажа абахадань, хажуудань ябалсажа, шадаха зэргээрээ туһалалсаа.
Эбиимнай хэды хүндэ ажалда ябажа байбашье, 13 үхибүү түрэһэн юм. Эхэ-Герой Долгор Мункуевна эжымнай хайрата нүхэрэйнгөө сагһаа урид наһа бараашье һаань, үхибүүдээ гарынь ганзагада, хүлынь дүрөөдэ хүргэжэ, бултандань эрдэм олгуулаа, - гэжэ Санжа Шагдарович Долгор Мункуевна Ардаевтанай 74-тэй басаган Дора Санжиевна Абагаева митингдэ сугларагшадта тобшохоноор хөөрэжэ үгөө.
“Ажалшадые удариха шадалтай, урма зоригыень бадараан хүгжөөхэ хүнгэн хурса хэлэтэй, ниитын ажахынуудые эмхидхэлсэһэн бэрхэ ударидагшадай нэгэн байгаа. Полевод бригадираар хүдэлхэдөө, 1950-яад онуудаар малай олон шэнэ байрануудые барюулһан юм. Тэрэ үедэ тракторнууд үсөөн һэн. Тиимэһээ барилгын модон үбэлэй сагта хайнаг сарнуудаар бэлдэгдэдэг байгаа.
Санжа Шагдарович ехэ һайндэрнүүдтэ манай эсэгэтэй хамта һуужа, үни удаан хөөрэлдэжэ, дайнда ябаһан ушарнуудаа һанан дурсадаг һэн”, - гэжэ Санжа Шагдаровичай унаган нүхэр Чимит Шагдуровичай ууган хүбүүн, багшын ажалай ветеран, “РСФСР-эй гэгээрэлэй отличник”, хизаар ороноо, уг гарбал, түүхэ домогуудые шэнжэлэгшэ Владимир Балуев ном соогоо бэшэһэн юм.
Авторай гэрэл зурагууд