681
Буряад Уласай Хурамхаан аймагта галда хайша хэрэгээр хандаһанһаа боложо, һалхитай уларил тогтожо, туйлай ехэ түймэр гараһан байна. Ойн түймэр саралгада хоёр хүн наһа бараа. Бүхы уласай түймэр сарагшадай болон ойн ажахынуудай хүдэлмэрилэгшэдэй хүсөөр түймэр унтараагдаба. Тиихэдэ үнгэрһэн үдэрэй туршада Буряад уласай Хэжэнгэ, Хурамхаан аймагуудта гурбан ойн түймэр унтараагдаһан байна. Түймэр саралгада ойн харуулшад, Үбэр-Байгалай ойн харуулай авиациин түймэр сарагшад-парашютистнар – хамтадаа 160-һаа дээшэ хүн хабаадаа. Түймэр саралгын 34 техникэ хэрэглэгдэһэн байна.
Түймэрэй аюултай хаһын эхилһэн сагһаа хойшо Буряадай дэбисхэртэ 9,1 мянган гектар талмайда 167 ойн түймэр гэжэ бүридхэлдэ абтанхай. Үнгэрһэн жэлэй энэл сагай мэдээсэлээр, Буряадта 114 мянган гектар талмайда 211 ойн түймэр гараһан байна.
Түймэрэй аюултай хаһын эхилһэнһээ хойшо Ородой Холбоото Уласай Гэмтэ ябадалай кодексын 261 дугаар статьягаар 7 гэмтэ хэрэг эрхилэгдэнхэй. Ойдо түймэр табиһан юһэн гэмтэн элирүүлэгдээ.
Хурамхаан аймагта түймэрэй аюултай хаһын онсо байдал, Буряадай бэшэ дэбисхэртэ онсо гурим соносхогдонхой. Хүн зоной олоор ябадаг газарһаа бэшэ тээ, ойдо орохо, түүдэг носоохо, хагда, бог шорой галдаха хоригдоно. Эдэ дүримүүдтэ хайша хэрэгээр хандабал, эрхэтэд - 4 мянганһаа 5 мянган хүрэтэр; харюусалгата нюурнууд – 25 мянганһаа 45 мянган хүрэтэр, юридическа нюурнууд 300 мянганһаа 500 мянган хүрэтэр ялада тохогдохо юм.
Түймэрэй гараһан тухай дүтын ойн ажахыда гү, али (83012) 20-44-44 гэһэн утаһаар дуулгыт гэжэ ойн харуулшад ажаһуугшадта хандана.
