863
“Владимир Путинтай сэхэ утаһан” гэһэн мүнөө жэлэй дамжуулга июниин 7-до Москвагай сагаар үдэрэй 12-то гараха. “Первый”, “Россия 1”, “Россия 24”, “ОТР” телеканалнуудта, “Маяк”, “Вести FM”, “Радио России” радиостанцинуудта дамжуулагдаха.
Гүрэнэй толгойлогшо эрхэтэдэй һонирхоһон гүрэнэй олониитын-бодолгын болон ниигэмэй-эдэй засагай ажабайдалда, мүн тиихэдэ уласхоорондын байдалда хабаатай асуудалнуудта харюусаха.
Асуудал табиха гэбэл, утаһаар хонходохо, СМС гү, али ММС-мэдээсэл эльгээхэ, гадна тус дамжуулгын сайтаар гү, али тусхай мобильна хабсаргалтын ашаар энэ эрхэеэ бэелүүлжэ болоно.
Тиихэдэ “ВКонтакте” болон “Одноклассники” сүлжээ хэрэглэгшэд хандалгануудаа эльгээхэ аргатай. Тиигэхын тула асуудалаа бэшэмэл түхэлөөр эльгээхэ гү, али видео-буулгабариин ашаар Юрэнхылэгшэдэ хандаха хэрэгтэй.
Энээнһээ гадуур “Москва – Путину” болон “ОK live” хабсаргалтануудые хэрэглэгшэд сэхэ дамжуулгын үедэ студитай холбоо бариха аргатай.
Асуудалнууд майн 27-ой үглөөнэй 8 сагһаа (мск) июниин 7-до дамжуулгын дүүрэтэр хүлеэн абтаха. Тон һонирхолтой болон амин шухала асуудалнуудынь сэхэ дамжуулгын үедэ Юрэнхылэгшэдэ табигдаха. Мэдээсэлнүүдые согсолон бэлдэлгын ниитэ нэгэ түбтэ Россиин ямаршье буланһаа 8-800-200-40-40 гэһэн утаһаар хонходожо болоно. Хотын болон гар утаһануудаар хонходолго түлбэригүй.
Мүн moskva-putinu.ru (москва-путину.рф) гэһэн сайтда асуудалаа эльгээхэ арга бии. Тэндээл үнгэргэгдэхэеэ байһан “Сэхэ утаһан” тухай тодорхой мэдээсэл, Мэдээсэлнүүдые согсолон бэлдэлгын ниитэ нэгэн түбтэй холбоо бариха арганууд тухай мэдээнүүдые, урдахи дамжуулгануудай архив олохот.
Майн 27-һоо “Москва – Путину” гэһэн албан ёһоной мобильна хабсаргалтаар асуудалаа эльгээхээр. “ВКонтакте” болон “Одноклассники” сүлжээ холбоонуудта бүлэгүүд – vk.com/moskvaputinu болон ok.ru/ moskvaputinu.
Июниин 7-до дамжуулгын сайт дээрэ болон Россиин олониитын телевидениин (ОТР) эфиртэ сурдо-оршуулгатайгаар дамжуулагдаха.
“Буряад үнэн” мэдээсэлэй албан
kremlin.ru сайтһаа гэрэл зураг абтаба
