838
Буряад Уласай Засагай газарай Түрүүлэгшын хүдөө ажахы хүгжөөлтын талаар орлогшо - Буряад Уласай хүдөө ажахын болон эдеэ хоолой сайд Даба-Жалсан Чирипов албанай хэрэгээр Хяагта аймаг гаража, үбһэ, тэжээл хэр бэлдэгдэнэб гэжэ хараба. Даба-Жалсан Чирипов аймагай хизаарламал харюусалгатай «Буян» бүлгэм болон Балсановай фермерскэ ажахыда хүрэжэ, үбһэ, тэжээл бэлдэлгэ хэр ябуулагданаб гэжэ хараһан байна.
Тиихэдэ Буряадай гүрэнэй хүдөө ажахын академиин мэргэжэлтэд «АПО Кяхтинское» гэһэн бүлгэмдэ хүрэжэ, буряад үүлтэрэй мал шэнжэлхэ талаар түрүүшын ажалнуудые үнгэргэбэ.
2015 ондо буряад үүлтэрэй мал худалдажа абаха хэрэгтэ Буряад Уласай Засагай газар 5,4 сая түхэригэй тэдхэмжэ үзүүлһэн байна. Удаань молекулярна-генетическэ шүүбэри хэхэ талаар 400 мянган түхэриг һомолһон байна. Шэнжэлэлгэ хэгдэһэнэй удаа, буряад үүлтэрэй мал гэжэ тобшологдоо. Энэ ажал үргэлжэлүүлхэ талаар 2018 ондо Буряад Уласай Засагай газар 2 сая түхэриг һомолоо. Буряадай гүрэнэй хүдөө ажахын академиин мэргэжэлтэд шэнжэлгэнүүдые хэхэ мүрысөөндэ илажа, ажал ябуулха. Тиихэдэ 2018 ондо Буряад Уласай Засагай газар буряад үүлтэрэй мал тэжээлгэдэ 1 сая түхэриг һомолоо. Хэһэн шэнжэлгэнүүдэй түрүүшын дүнгүүд намартаа согсологдохо.
