1147
Августын 16-да Буряад Уласай Толгойлогшо Алексей Цыденовэй хүтэлбэри доро Ородой Холбоото Уласай болбосорол болон эрдэм ухаанай сайдай орлогшо Татьяна Синюгина болон Болбосоролой һалбари хинадаг федеральна албанай хүтэлбэрилэгшэ Сергей Кравцовай хабаадалгатай нүүдэл суглаан үнгэргэгдэбэ.
Улаан-Үдэ хотын 112-дохи кварталда баригдажа байһан һургуулида үндэр сайд хүрэбэ. 2016 ондо уласай бюджетһээ һомологдоһон мүнгөөр тус һургуули баригдажа эхилһэн юм. 2018 ондо һургуули барилгада федеральна бюджетһээ мүнгэн тэдхэмжэ үзүүлэгдээ. Тиихэдэ уласай бюджетһээ - 283,5 сая түхэриг, федеральна бюджетһээ 415,2 сая түхэриг һомологдобо.
- Энэ һургуулида 1400 үхибүүд хоёр халаанда һураха аргатай. 63-дахи һургуулиһаа үхибүүд ерэхэ. Тиихэдэ эрэмдэг бэетэй үхибүүдэй класс байгуулагдаха. Эдэ үхибүүд мүнөө 60-дахи һургуулида һурана. Һургуулиин баригдахада, олон асуудалнууд шиидхэгдэхэ, - гэжэ уласай хүтэлбэрилэгшэ Алексей Цыденов хэлэбэ.
112 кварталда баригдажа байһан һургуулиин нэгэ халаанда 744 үхибүүд һураха аргатай. Тиигэжэ зуудахи кварталнуудта һургуулиин һууринуудай дутагдалай асуудал шиидхэгдэхэ. Мүнөө 63-дахи һургуулида 1900 үхибүүд һурана. Тиихэдэ үшөө 600 үхибүүд хотын болбосоролой бусад эмхинүүдтэ һурана.
2018 оной февраль һарада 63-дахи һургуулида 350 һууритай залгалаа баригдажа, үхибүүд хоёр халаанда һурадаг болоо. Тиигэбэшье класс дотор гушанһаа дээшэ һурагшад.
Байгша оной сентябриин 1-һээ 63-дахи һургуулиин 2-дохи – 8-дахи ангинуудай 1400 һурагшад шэнэ һургуулида хоёр халаанда һураха юм.
Шэнэ һургуулида тамирай хоёр танхим, актова заал, мүнөө үеын эрилтэнүүдтэ таараһан эдеэ хоол бэлдэхэ, эдеэлхэ газар, мастерской, номой сан, мүнөө үеын оньһон хэрэгсэлнүүдээр хангагдаһан кабинедүүд бии. Тиихэдэ һургуули харууһалха, адаглаха оньһон хэрэгсэлнүүд тохогдонхой. Барилгын эмхи ажалаа дүүргэжэ, шэрдэлгэ-будалгын ажалнууд хэгдэнэ.
Удаань Байгалай хуралдаанай хабаадагшад Тарбагатай аймагай Доодо Саянтын һургуулида хүрэһэн байна. Энэ һургуули аймаг дотор эгээл түрүүшын һургуулинуудай нэгэн юм. Сентябриин 1-һээ 768 үхибүүд хэшээлнүүдтээ ерэхэ. Харин Доодо Саянтын эхин һургуулида - 80 үхибүүд, дунда һургуулида нэгэ халаанда 190 үхибүүд һураха ёһотой.
- Эхин һургуулида сентябриин 1-һээ 304 үхибүүн гурбан халаанда һураха. Дунда һургуулида 464 һурагша хоёр халаанда хэшээлнүүдтэ ябаха, гэжэ һургуулиин захирал Людмила Парыгина хэлэбэ.
Доодо Саянтын һургуулида тамирай, актова танхимууд, мастерской, дулаан жорлон, канализаци, уһанай һужаа үгы юм. 38 үхибүүдые багтааха буфет хүдэлнэ. Энэнь хадаа эдеэ хоол бариха газарай талмайн, хүнэй тоогоор эрилтэнүүдтэ тааранагүй. Тиихэдэ дүтэ оршодог һууринуудһаа үхибүүдые шэрэхэ талаар болон хуушарһан мебелиин асуудалнуудые шиидхэхээр гэжэ һургуулин захирал хэлэбэ. Эдэ асуудалнуудые Болбосоролой һалбари хинадаг албан сүүдэй шиидхэбэреээр бэелүүлхэ тухай эрилтэ табинхай.
Буряад Уласай Толгойлогшо Алексей Цыденовэй хэлэһээр, 2020 он болотор мүнөө байһан һургуулиин һуурида 450 һууритай болбосоролой эмхи баригдахаар түсэблэгдэнэ. Энэ талаар түсэлэй дансанууд бэлэн, барилга ябуулха болон хэрэгэслнүүдээр хангаха хэрэгтэ мүнгэ һомололго түсэблэгдэнхэй.
Анна Огороднигой гэрэл зурагууд
