Хүдөө ажахын хүдэлмэрилэгшэд урда долоон хоногто мэргэжэлтэ һайндэрөө тэмдэглэбэ. Энэ ушараар үүлтэртэ малай яармаг үнгэргэгдэһэн байна. Бүхы уласаймнай хүдөө ажахынхид эндэ хабаадаха гэжэ оролдоо.
Үүлтэртэ малай үзэмжэ Буряадта хоёрдохиёо үнгэргэгдэнэ гээд һануулая. Исток һууринһаа холо бэшэ оршодог үйлэдбэриин паркын дэргэдэ шэнэ байшангууд бодхоогдоо. Урда жэлдэ орходоо, эндэ сэбэр һайхан болошоо. Мүнөө малай байранууд таарамжатай болгогдожо, үшөө нэмэри таһалганууд түхеэрэгдэһэн байна. Мүн хүн зоной ябажа хараха харгы асфальт болон плиткээр хушагдаа.
Үзэмжэ яармагта үүлтэртэ малай 30 гаран ажахы хабаадаһан байна. 130 гаран үүлтэртэ мал үзэмжэдэ харуулагдаа. Бүхы хүдөө ажахынхидые амаршалхаяа Буряад Уласай Толгойлогшо Алексей Цыденов, Ородой Хүдөө ажахын яаманай мал ажалай болон үүлтэртэ хэрэгэй департаментын дарга Харон Амерханов болон бусад хүндэтэ айлшад ерээ. Тиихэдэ бүхы аймагуудай засаг дарганар ерэжэ, хүдөө ажахыда өөрын хандаса харуулаа гэхэдэ, алдуу болохогүй.
Хэмжээ ябуулгада хабаадаһан ажахынууд үргэн дэлисэтэйгээр, урма ехэтэйгээр хүдэлжэ байһанаа харуулаа. Буряад үүлтэрэй “бүүбэй”, монгол болон бусад үүлтэрэй хонид, хальмаг, казах, герофорд үүлтэрэй үхэрнүүд харалганда олоор табигдаа. Мүн ород болон буряад үүлтэрэй моридые сугларагшад гайхан хараа. Эндэ үндэр һайхан бэетэй, ута хүлтэй моридые тэмдэглэмээр. Энээнһээ гадуур шубууд, һарлагууд, загаһад, шандаганууд, ямаад үзэмжын үедэ олоной анхарал татаа.
Буряадай ажаһуугшад анханһаа хойшо үхэр малаа тэжээжэ ажамидардаг байһан гэжэ үнинэй мэдэдэгби. Һүүлэй үедэ ганса хоолойгоо тэжээхын тула адуу малаа хараад һууха хэрэггүй. Шанар һайтай эдеэ хоол хэжэ, гүрэнөө хангаха гэһэн гол зорилго табигдана. Юуб гэхэдэ, манай гүрэн өөрыгөө шубуунай мяхаар хүсэд хангана. Харин хониной, үхэрэй, адуунай болон гахайн мяхан дуталдана. Энэ дутагдал усадхаха талаар шанга ажал ябуулагдана. Буряадай хүдөө ажахын хүдэлмэрилэгшэдэй ашаар энэ орёо асуудал шиидхэгдэхэл байха, - гэжэ Харон Амерханов тэмдэглэнэ.
Тус ажалай һайнаар ябуулагдахын тула гүрэнэй тэдхэмжэ үзүүлэгдэнэ. Буряадай хүдөөгэйхид ганса 2018 ондо 120 гаран оньһон техникэ гүрэнэй туһаламжаар худалдан абажа, ажалаа эршэдүүлээ.
Үхэр малдаа хоол бэлдэхын тула шэнэ оньһон техникэ хэрэгтэй юм. Хяагта болон Зэдэ аймагуудай дэбисхэр дээрэ “Буян” ажахы хальмаг үүлтэртэ үхэр тэжээнэ.
“Хальмаг үхэр хадаа мяханай үүлтэрэй болоно. Мраморна гэжэ алдаршаһан мяхыень эдихэдэ амтатай даа”, - гэжэ “Буян” ажахын Владимир Ильин хэлэнэ.
Казах үүлтэрэй 700 гаран толгой үхэр Кабанск аймагай “Байкальское” ажахын газар дайдаар бэлшэжэ ябана. Тус ажахын түлөөлэгшэ Александр Мощевой хэлэһээр, Кабанскда Альпынхидал үндэр хада нуга үгышье һаа, казах үүлтэрэй үхэрэй мяхан ехэ амтатай. Һайн тэжээлһээ энэ дулдыдана гээд тэрэ мэдүүлээ.
Буряад Уласай Толгойлогшо Алексей Цыденовэй хэлэһээр, үүлтэртэ мал тэжээдэг ажахынуудые дэмжэлгэ үргэлжэлжэ байха. Тиигэжэ 2019 ондо малай үүлтэр һайжаруулгын тусхай албан Буряадтамнай хүдэлжэ эхилхэ юм.
Яармагта хабаадажа, өөрынгөө нюдөөр хүдөө ажахымнай амжалтануудые хараһан Харон Амерханов 2019 ондо бүхы Сибирь болон Алас Дурна зүгэй яармаг Буряадта болохо гэжэ мэдүүлбэ.
Анна Огороднигой гэрэл зурагууд