​​Буряад Уласай Аршаан һууринда һургуули баригдаха

Аршаан һууринда һургуулиин шэнэ байшан баригдахаар түсэблэгдэнхэй. Энэ һайн мэдээ Түнхэн аймагай засаг дарга Иван Альхеев мэдүүлбэ.

Засаг даргын хэлэһээр, мүнөө сагта түсэблэлгын ажал захигдаад байна.

- Энэ ажал 2019 оной апрель һарын 30-да дүүрээд байха ёһотой. Саашань барилгашадые тодорхойлжо, хүдэлмэри эхилхэ юм, - гэжэ Иван Альхеев мэдүүлнэ.

Аршаанай һургуулиин байшан аяар холын 1973 ондо ашаглалда тушаагдаһан байна. Тэрэ үедэ эндэ найман жэлэй һургуули байрладаг һэн.

- Тэрэ гэһээр манай һургуули дунда болгогдоо. Мүнөө сагта тон олон һурагшад болонхой. 500 гаран шабинартайбди. Харин һургуулимнай оройдоол 200 хүниие багтааха аргатай. Тиимэһээ гурбадахи халаанда үзэхэ хүүгэд бии, - гэжэ һургуулиин захирал Дашима Дамдинова мэдүүлнэ.

Һургуулиин шэнэ байшан Аршаанай спортын комплексын хажууда бодхоогдохо юм. Закаменск хотын 1-дэхи һургуулитай адли байшанай түсэб хэрэглэгдэхэ гээшэ. 

Анна Огороднигой гэрэл зураг