890
2018 оной 12 һарын 13-да Ородой Холбоото Уласай бүхы хотонуудта Театрай жэлэй нээлгын хэмжээ ябуулганууд үнгэргэгдэхэ. Тиихэдэ гол хэмжээ ябуулга Ярославль хотодо Фёдор Волковой нэрэмжэтэ Ород гүрэнэй академическэ драмын театрта эмхидхэгдэхэ. Ородой Холбоото Уласай театрай хүдэлмэрилэгшэдэй эблэл энэ ёһололдо хабаадаха можо нютагуудай түлөөлэгшэдые томилоо. Ородой Холбоото Уласай арадай артистка, Гүрэнэй шангай лауреат, Монгол гүрэнэй соёлой габьяата хүдэлмэрилэгшэ Марта Зориктуева Буряад уласаа түлөөлхэ юм.
Театрай жэлэй нээлгын ёһололдо Ород гүрэнэй дүшөөд театрнууд уригданхай,160-аад хүн хэмжээ ябуулгануудта хабаадаха гэжэ багсаамжалагдана.
Ородой Холбоото Улас дотор Театрай жэл 2019 оной март һараһаа эхилжэ, ноябрь хүрэтэр театрай бүхэроссиин марафон эмхидхэгдэхэ. Хэмжээ ябуулганууд Владивосток хотодо эхилжэ, бүхы гүрэн дотор эмхидхэгдэжэ, Калининград хотодо түгэсэхэ юм. Июнь һараһаа ноябрь хүрэтэр Санкт-Петербург хотодо театральна олимпиада үнгэргэгдэхэ. Тиихэдэ театрта дуратайшуулай болон оюутадай театрнуудай фестиваль-мүрысөөнүүд, Ород гүрэнэй театрай хүдэлмэрилэгшэдэй эблэлэй хэмжээ ябуулганууд, бүхэроссиин болон уласхоорондын түсэлнүүдые дэмжэхэ, 2030 он болотор театрай хүгжэлтын стратегиин түсэл байгуулха, «Ородой Холбоото Уласай театральна энциклопеди» бэлдэхэ талаар ажал ябуулагдаха гэжэ түсэблэгдэнэ.
Буряад драмын театрай мэдээсэлэй албанай гэрэл зураг
