Малай улай, үүсэлэлгэ һайн шанартайгаар, эрилтэдэ таарамаар хэхэдэ, мяханай үйлэдбэри хүгжэхэ гээд, Зэдэ аймагта үнгэрһэн Буряад Уласай Хүдөө ажахын болон эдеэ хоолой яаманай нүүдэл зүблөөн дээрэ хэлсэгдэбэ. Буряадай 15 хүдөө аймагһаа 60 гаран хүн энэ хэмжээндэ оролсоо.
Үйлэдбэриин эрилтэ хангахын тулада
Мяха болбосоруулдаг элдэб түхэлэй 100-гаад ажахы Буряадта бии. Тэдэнэй 23-иинь малай улай хэдэг. Иимэ ажахынууд 18 аймагта таранхай. Яаманай үйлэдбэриин таһагай дарга Татьяна Полозовагай мэдээсэһээр, һүүлэй 10 жэлэй туршада малай улай хэдэг эмхинүүд мяха үйлэдбэрилгын газарнуудта дүтэхэн байрладаг болонхой. Тиигэжэ Түнхэн, Байгал шадарай болон хойто аймагуудһаа бусад тээ мяха үүсэлэлгын түбүүд байгуулагдаа. Эдэ түбүүд жэлэй туршада 18 мянган тонно мяха үйлэдбэрилнэ. Саашадаа мяханиинь болон доторынь буйлуулагдажа, ниигэмэй эмхинүүдээр тараагдана, худалдаа наймаанда табигдана.
Мүнөө жэл Зүүн Сибириин гахайн фермэ 400 тонно мяха ондоо тээшэнь эльгээһэн байна. Буряад Улас дотор мяха үйлэдбэри, мал худалдажа абалга хүгжөөхын тулада үйлэдбэриин эрилтэ хангамаар малай улай хэхэ тухай хэлсэгдэнэ. Энэ асуудал хэлсээ баталһанай ашаар шиидхэгдэхэ болоно. Тиимэһээ эндэ мяха худалдажа абаха гол үүргэ хүдөө ажахын хамжаан кооперацинууд дүүргэхэ ёһотой.
Зөөри хүрэнгэ алишье талаһаа оруулһанай ашаар гахайн фермэнүүд, тэжээбэриин талмайнууд, мяханай зүйл буйлуулгын ба үйлэд- бэри үргэдхэгдэһэнэй ашаар һүүлэй 5 жэлэй туршада Буряад Улас дотор арад зоноо мяхаар хангалга 1,7 дахин дээшэлээ. 2017 ондо арад зоноо мяханай эдеэгээр 63 хубинь хангагдадаг байгаа бшуу. Нэгэ хүн жэл соо 70-75 килограмм мяха эдихэ гэһэн тоо баримтаар, манай эндэ нэгэ хүн жэл соо 68 килограмм мяха хэрэглэнэ гэжэ тэмдэглэгдэбэ.
Бэрхэшээлнүүд зүбшэгдэбэ
Зүблөөндэ хабаадагшад бэрхэшээлтэй асуудалнуудые зүбшэлсэжэ, дүй дүршэлөөрөө хубаалдаа. Удаань бог малай (хони, ямаанай) мяха үйлэдбэриин “Хамта” гэһэн хүдөө ажахын хамжаан болон Зэдын мяханай комбинат ошожо, ажал хэрэгтэйнь танилсаа.
Зэдын мяханай комбинадай захирал Владимир Хандуев ажахыдань тохёолдоод байһан бэрхэшээл- нүүдые тодоруулба.
- Сэбэрлэдэг түхеэрэлгэ шэнэлхэдэ, 39 сая түхэриг хэрэгтэй. Хиналтын яла тон ехэ. Ажалшад дуталдана. 1500 толгой мал тэжээбэридэ табяа һэмди, 7 жэл болоод, түсэлөө болюулха баатай болообди. Үхибүүдые һургаха интернадуудшье үгы, тиимэһээ залуушуул ажалда ерэнэгүй, - гэжэ тэрэ мэдээсэбэ.
Бог малай мяха буйлуулдаг “Хамта” ажахы 2015 онһоо ажалладаг. Зэдэ аймагһаа мяхаяа худалдажа абаад, хониной мяха, доторыень буйлуулан үйлэдбэрилнэ.
- Манай эдеэнэй зүйл хүн зон дуратайгаар абадаг. Нарин нооһото үүлтэрэй мяхан буряад хониной мяханһаа амтатай. Буряад хониной хабһандань ехэ өөхэн байдаг. Тиимэһээ нарин нооһото үүлтэрэй хони үсхэбэрилхэл хэрэгтэй, - гэжэ хамжаанай захирал Туяна Дамчеева мэдээсэбэ.
Захаамин аймагай хүтэлбэрилэгшын орлогшо Эрдэни Цыденжапов аймагтаа мяха наймаалха газар дуталдана гэжэ мэдүүлбэ.
- Захааминай мяханай комбинат жэл соогоо оройдоол 400 толгой мал худалдажа абана. Жэл соо 9 мянгаад толгой мал гаргагдана, тэдэнэй 2 мянганиинь үүсэлэлгын түб сооһоо наймаанда гарадаг. Бүхы наймаашад “Захааминай мяхан” гэжэ суутай нэрыемнай хэрэглэнэ. Тиимэһээ нэрэеэ хамгаалхын тулада үнэмшэлгэ хэрэгтэй, - гэжэ тэмдэглээ.
Татьяна Полозовагай гэрэл зурагууд