Ниитэ гаршаг хүтэлэгшэ - Ардан Ангархаев
«Буряад үнэн» сонин ба Буряад Улас хоёрой 100 жэлые тэмдэглэхэ гээшэмнай юундэ нягта холбоотойб гэһэн асуудалда дахин тогтохо ёһотойбди.
Нэн түрүүн буряад арадай өөһэдыгөө арад гээшэбди гэжэ ёһотоор, бүгэдэ дээрээ мэдэржэ эхилхэдээ, республика болоходоол мэдэрһэн, ойлгоһон байна гээшэ. Буряад арадай наци гээшэбди гэжэ өөһэдөө ойлгожо, бэшэ арадуудай дунда наци гээшэбди гэгдэхэ эхин Буряад Республикын тогтоогдоходо тобойн элирээ, арадай шэнэ үе хүгжэлтэеэ абаа.
Бидэ мүнөө буряад арад гэхэдээ, эрдэмэй ёһоор, наци, хоёрдохёор, этнос гэһэн хоёр ойлгомжын (понятия) илгааень тодорхойлхо ёһотойбди. Наци – лата хэлэнэй nation – племя, народ болоно, этнос – грек хэлэнэй еtһnoc – племя, народ; теэд хэрбэеэ этнос гэхэдээ, бидэ түүхын нэгэ гарбалтай, ехэнхидээ хэлэ нэгэн зониие, нэгэ газарта амидардаг зониие хэлэнэбди, харин наци гэһэн ойлгосымнай удхань үргэн, гүнзэгы – нэгэ газарта ажаһуудаг, түүхэ нэгэнтэй, ажал эрхилхэдээ нэгэдэһэн (экономико нэгэнтэй, засаг түрэеэ хамтадхаһан (политикаараа нэгэдэһэн), илангаяа хэлэ нэгэнтэй, хэлээрээ боложо, соёл гэгээрэлэй нэгэ үндэһэтэй, тэрэнээ баримталжа ябадаг зон гэһэн юм.
Наци гээшые баһал нэгэ гүрэн түрын арад зон гэжэ ойлгодог.
1923 ондо буряад зон үни этнос боложо бүрилдэнхэй байгаа.
Л.Н.Гумилёв – түрэг монгол зоной түүхые үнэнхөөр зүб шэнжэлһэн бүхы дэлхэйдэ мэдээжэ эрдэмтэн.
Л.Н. Гумилёвой баримталһан, тодоруулһан хараа бодолой ёһоор этнос ажамидарһан байгаалиингаа, түрэл дайдынгаа, түрэл оронойнгоо түхэл шарайһаа дулдыдажа, өөрын шэнжэ шанартай, өөрсэ янзатай арад зон боложо тодордог. “Ландшафт определяет этнос», - гэжэ Л.Н. Гумилёв хэлэһэн байдаг. [Гумилёв Л.Н. Этногенез и биосфера земли. – М., 1990.]
Буряад-монгол арад Түб Азиин хойто захын хүбөөгөөр, Байгал далайн Саяан уулын хизаарта, ой тайгатай, уһа мүрэнтэй, нуурнуудтай тала дайдаар таран ажаһуужа, адуу мал үсхэбэрилжэ, ан гүрөөл олзолжо, сагай ябасаар һуурижаха нютагаа һэлгэн шэлэн ябадаг байгаа. Гол Монголойхиһоо байдалынь илгаатайшаг һэн: буряадууд анханһаа олон хоногоор агнуурида гарашадагшье, загаһа баридагшье, алирһа жэмэсшье, хушын һамаршье жэлэйнгээ эдеэ хоолдо суглуулаа юм ааб даа, газар элдүүрилжэ, таряанай зүйл бэлдэжэ абадаг, ойро холын зонуудаар аралжаа наймаа хэдэг, модон гэр байра үбэлэй хүйтэндэ ажаһуухаяа хэр угһаа бодхоодог байгаа. Далай нуурнуудтаа загаһашалхаяа, гол мүрэнүүдээ гаталхаяа элдэб онгосонуудые дархалдаг, хэрэглэдэг һэн.
Иимэһээ буряадуудые монгол туургата үргэн олон зонойнь дунда бэеэ дааһан, өөрсэ шэнжэтэй байһан хадань, этнос гээшэ гэжэ баталан хэлэхэ эрхэтэйбди.
Хоёрдохёор, хэлэнэй талаар буряадууд бүхы монгол туургата аймагуудһаань илгардаг нэгэ ушартай байна: буряадуудай хэлэндэ “һ” абяан бии.
Энээн тухай эрдэмэй шэнжэлгэнүүд дутуу ха гэжэ һанагдадаг. Жэшээлхэдэ, англи хэлэндэ “һ” аялган бии, яагаад буряадууд, монгол угсаата зоной эзэлжэ ажаһууһан газар дайдын Хойто талынь зон, “һ” аялгантайб гэһэн тайлбари хэлэ шудалалгын эрдэмдэ тодо бэшэ. Еврази гэгдэһэн түбиин Хойто талынь арадуудай хүгжэлтэтэй холбоотой асуудал бэшэ юм гэһэн асуудал аргагүй гаража ерэдэг.
Буряад хэлэн – монгол хэлэнэй нэгэн – хэлэ шудалдаг эрдэмэй үзэл бодолоор Алтай хэлэнүүдэй бүлэдэ (алтайская семья языков) ороно. Алтай хэлэнүүд ураал хэлэнүүдтэеэ нэгэн хамта ёһоороо манай ээрын урдахи арбадахи мянган жэлнүүд хүрэтэр ерээд, хоёр тээшээ һалажа ошоо гэһэн һанамжа зарим эрдэмтэд хэлэһэн юм. Тиигээд алтай хэлэнүүд монгол-түрэг, үшөө тунгус-манжа хэлэнүүд боложо манай ээрын зургаадахи мянган жэлнүүдһээ эхилээ. Манай ээрын урдахи дүрбэдэхи мянган жэлнүүдһээ эдэ хэлэнүүд бэе бэеһээнь холодожо, хоёрдохи мянган жэлнүүдһээ өөһэд өөһэдын өөрсэ нюуртай боложо эхилээ. Тиихэдээ монгол хэлэн гурбан мянган жэлэй саана бии болоо гэхэдэ, алдуу болохогүй. Монгол хэлэнүүдэй нэгэн – буряад хэлэнэй наһан иимэ үндэр гээшэ. Буряад арад өөрын түхэл шарай хэдэн мянган жэлнүүдэй саана оложо эхилээ (этнос боложо, хүгжэжэ эхилээ гэе) [Киекбаев Д.Г. Основы исторической грамматики урало-алтайских языков. – Уфа, 1996; Рассадин В.И. О характере тюрко-монгольских языковых отношений. – Улан-Удэ, 2004].
Алтай бүлын хэлэнүүдэй хүг- жэлтые шэнжэн харахадаа, бидэ буряад арадайнгаа уг унгиие тодорхойлно гээшэбди – хэлэнэй хүгжэлтэ арад зоной (этносын) хүгжэлтэ харуулдаг гэжэ мэдээжэ.
Хэрбэеэ археологи арадай түүхые ехэнхидээ малтамал булашануудһаа (археологические находки) үндэһэлэн тобшолдог һаань, хэлэ шэнжэлдэг эрдэм өөрын нэгэ үүргэтэй юм: хэлэн гээшэ хүн зоной абажа ябаһан түүхэ, баялигые аржытар харуулдаг.
Мүнөө бидэ эндэ буряад арад эртын ехэ түүхэтэй гэжэ баталнабди.
“Энэниие эрдэмэй дээдэ шатын (академическэ) ажалнуудые үзэжэ байхадаа ойлгонобди, жэшээлхэдэ: «Этимологический словарь тюркских языков» (хэдэн боти), «Сравнительный словарь тюрко-маньчжурских языков», «Этимологический словарь чувашского языка» болон бэшэ шэнжэлэлгэнүүд.
Буряад арад монгол арадуудайнгаа дунда өөрын түүхэтэй байгаа гэһэн бодолдо хабаатай домог түүхын гэршэнүүдые хараад үзэе.
Буряадуудай уг холбоон манай ээрын III-IV зуун жэлнүүдһээ VII-VIII зуун жэлнүүд хүрэтэр бүрилдэһэн байна гэһэн түүхын гэршэнүүд бии.
Монгол болон түрэг зоной анхан нютаг Эргэнэ-хон гэгдэдэг байгаа гэжэ эртэ урдын домогуудта үндэһэлһэн мэдээн анха түрүүн Иранай монгол хаашуулай түшэмэл, эрдэмтэн Рашид-ад-динай “Сборник летописей” гэжэ ород хэлэндэ оршуулагдаһан томо зохёол соо дурдагдана (ХIII-XIV зуун жэл). Удаань Дунда Азиин гүрэнүүдтэхи эрдэмтэдэй зохёолнууд соо хэлэгдэдэг юм (Абуль-Гази, ХVII зуун жэл, Хондомир, Шакарим Худайберды Чокан Валиханов болон бусад). Эргэнэ-хон энэдхэг эрдэмтэн Абу-л Фазла Алламиин «Акбар-наме» зохёол соо бии (ХVI зуун жэл, Агууехэ Моголнуудай түүхэ тухай ном).
III-IV зуун жэлнүүдэй үедэ монголшуудай уг гарбалай нэгэ хаан тон ехэ дай хэжэ ябатараа, бута сохигдожо, хүн зонгүй хада уула руу үлэһэшүүлынь тэрьедээ юм ха. Энэ шуһата байлдаан мүнөөнэй Баруун Монгол (Хитад), Туркестанай зүүн хизаарай тэндэ болоһон, тэрьедэһэн зон Алтай гү, али Саяан уула руу тэрьедэһэн гэжэ тэрэ үеын түүхын баримтанууд дээрэһээ бараглагдана [Ангархаев А. О топониме “Эргэнэ- хон” (Прародина монголов. –У.-У., Изд.БГУ, 2014].
Монголнуудай уг гарбалнууд 400 жэлэй туршада Эргэнэ-хон гэгдэһэн газартаа байһан гэжэ домоглогдодог. Манай һанаанда, энэл үедэ буряадуудай этнос бүрилдэжэ эхилээ.
Буряад арад манай ээрын нэгэдэхи мянган жэлэй дунда үеһөө өөрын нюур шарайтай болоһон ха гэжэ олонхи эрдэмтэд тоолодог.
Монголшууд гэжэ нэрлэгдэһэн зоной Эргэнэ-хонһоо гаража байха сагтаа “монгол” гэжэ нэрэтэй бэшэнь эли.
Лата үзэгэй хэшээл. Самбарта иигэжэ бэшээтэй: “Ulaan tug kusbe. Manai arteeliin zeerdegcen unagalba”
Цыренжап Сампиловай зураг
Манай һанахада, хожомынь монгол гэгдэһэн зон хадата нютагһаань урданайнгаа талата нютагтаа бусажа ошоһон ёһотой. Энэнь мүнөөнэй монгол зоной нютагууд болоно. Энэ Түб Азиин талануудые дунху, хунну гэгдэжэ, хитад түүхын бэшэгүүдтэ ороһон арадууд эзэлжэ һууһан аад, манай ээрын тоологдожо эхилһэн сагһаа сяньби гэжэ дунхунарай үри һадаһадта түригдэһэн юм. Сяньби арад монгол хэлэтэйшүүлэй эхин уг байгаа гэһэн хараа бодол эрдэмтэдэй дунда эли (дунхунарай һадаһад гэжэ дабтан хэлэе).
Эргэнэ-хон гэһэн хада уулын дундахи гол газарһаа гаража ошоһон аймагуудай дунда курлас /горлос, хонгирад, эхирид/ дурдагдана. Хожомынь хори, хонгоодор гэгдэн үлэһэн гээшэ. Эхирид лэ тэрэл ёһоороо үлөө. [Рашид-ад-дин, Абуль-Гази, “Акбар- наме” болон бусад].
Эргэнэ-хонһоо гаралганай үедэ зоной ударидагшань курлас Бүртэ- Шоно байһан, эгээл түрүүн гарагшань хэд байгааб гэхэдэ, хонгарад аймаг. Энэ мэдээн Дунда Азиин болон Энэдхэгэй Агууехэ Моголнуудай эрдэмтэдэй зохёолнууд соо бии. Энэнь эдэ аймагуудай (племена) Эргэнэ-хон соо түрүү байһаниие гэршэлнэ.
Эргэнэ-хонһоо гарагшад – ехэнхинь эртэнэйнгээ тала нютаг руу шэглэжэ ошоо (Бурхан Халдун тээшэ), зарим зониинь хадата тайгата газараа орхёогүй (тэдэнэрэй үри һадаһад – хори зоной хубинь, хорилар гэһэн нэрэтэй болоод, Бурхан Халдун руу ошоһониинь “Монголой нюуса тобшо” соо хэлэгдэнэ, тэндэ бүгэдэндэ мэдээжэ Алан Гуа монголшуудай Хаан нэрын эхи табиха хубитай бэлэй).
Эдэ баримтанууд гансал ябаган зугааһаа, домогуудһаа абтаа бэшэ – Хивын хаан Абуль Гази 18 түүхын сударнуудые, тэдэнэй тоодо Рашид-ад-динайхиие шудалһан юм, тиихэдэ “Акбар-наме” гээшые бэшэгшэ Абу-л-Фазл 4000 номой сантай байһан юм. [Дэлгэрэнгыгээр: А. Ангархаев, Буряты в общемонгольской истории].
Буряад зоной этнос боложо хүгжэһэн замда өөрын бэшэг байгаа гү гэһэн асуудал гарана. Буряадуудай уг бэшэгүүд ХIX зуун жэлдэ ехэнхидээ бэшэгдэһэн гээшэ (Юмсунов, Хобитуев, Ломбоцыренов, Сахаров гэгшэд). Эдэ зохёолнуудые шэнжэлэн харахада, буряадуудай үнинэй бэшэгтэй байһаниинь элирдэг: буряадууд бүхы монголой нэгэ уйгаржан бэшэгтэйшье һаа (старомонгольское уйгурское письмо), өөрын буряад янзатайгаар (старобурятское) бэшэдэг байгаа гэхэ аргатайбди. Хүгжэнги хэлэ бэшэгтэй (литература) болоһон монголшууд олон зохёолнуудаа энэ саг болотор абажа ерээгүй (жэшээнь Чингис хаанай бага хүбүүн Тулуйн хатан Сорхугтани) томо уран зохёол бэшэһэн юм гэжэ мэдээн бии. Тэрэнэй хэһэгүүдынь Баруун Монголдо бэшэгдэжэ абтаһан юм. Дээрэ дурсагдаһан гар бэшэгүүдһээ гадна үшөөшье ондоо уг унгинуудаа бэшэһэн тэмдэглэлнүүд тухай буряад нютагуудта дурдагдагша.
1923 ондо Буряад арад республика гэгдэжэ нэрэтэй солотой болоходоо, наци гэгдэхэ хүгжэлтын шатада дүтэлөөд байгаа.
Гансал хуулита ёһоор эзэлжэ һууһан газаргүй байгаа. Тиихэдэ нэгэн улас түрэтэй (политическэ нэгэдэлтэй) болоодүй һэн: тиимэ арга боломжо, тэрэ үедэ Россиин ажабайдалда, уласхоорондын ажабайдалдашье үгы бэлэй.
Эдэй засаг - экономикын талаар харахада, буряадуудта тогтонижорһон ажахы байгаа, тэрэнь гол түлэб мал ажахы (традиционное животноводство) һэн гэжэ дээрэ дурдаа һэмди: буряадуудта капиталис ёһоной ажабайдал ерэжэ эхилһэн, зөөритэй, аргатай зониинь тэрэ янзаар ажахыгаа эрхилжэ туршаһан ааб даа. Баруун буряадууд таряан ажахыгаа, зүүн буряадууд мал ажалаа шэнэ янзада оруулжа, газар элдүүрилжэ, үрэһэ хүрэнгэеэ һайн болгожо, малайнгаа үүлтэр һэлгэжэ, яһала олзо ехэтэйгээр ажаллажа эхилээ. Боохондо Пирожков, Агада Бата-Далай Очиров тэрэ үедэ бүхы Сибирьтэ байгаагүй түрүү ажахынуудые бии болгоһон юм. Буряадуудай ажалые шэнэлхэ, Баруунай арга шадал хэрэглэжэ болгохо гэжэ Пётр Бадмаев Сагаан хаанай амбан сайдуудаар золгон, мүн алтанай хэлсээ хэжэ, ехэтэ оролдоһон бэлэй. Иигэжэ буряад арадай нюур шарай хубилжа, шэнэ сагай шэнжэ шанар олохо тээшээ болоо. Энэ хубилалта Россиин Зүүн зүг руу түмэр харгы татаһантай холбоотой.
Иигэжэ буряадуудай яһанай (этническэ) шэнжэ шэнэлэгдээд байгаа.
Теэд наци гэгдэхээр оршом байдал арад зондо хүрэжэ ерэхээр бэшэ һэн, юуб гэхэдэ, улас түрэ уладта тогтоогдоогүй байгаа ха юм.
Буряад арадые хүгжэлтын шатада хүргэхын түлөө Буряад Республика хэрэгтэй болоод байһыень арадаймнай сэсэн бэрхэ хүбүүд ойлгоод, хэдэн жэл соо тэмсэжэ байгаа.
Үнэн дээрээ эгээл түрүүн шэнэ улас түрэ тухай, республика тухай гэе, буряадууд сооһоо хэн хэлээб гэхэдэ - Доржи Банзаров юм. Гайхалтай бэзэ!
“Баруунай гүрэнүүдтэ сүмүүн саг ерээд байна: хаашуулаа, баяшуулаа намнахынь, намнажа гаргажа эхилээ, зон өөһэд хоорондын хёмороотой болонхой”, - гэжэ Доржи Банзаров Петербургһаа Алексей Александрович Бобровниковто бэшэһэн юм, тэрэнь 1848 оной апрелиин 12-то һэн (энэ хадаа Францида болоһон Февралиин хубисхал тухай хэлэгдэжэ, тиихэдэ Франциин Хоёрдохи республика тогтоогдоо).
«Гэсэр хаанай энэ түбидэ тодорходо, эгээл иимэшүү юумэн боложо байгаа ёһотой. Мүнөөшье гушан гурбан баатарнуудайнь тоодо жагсаха ёһотойбди. Гурбан эрдэни бурхадтаа һүгэдэн мүргэн байха болонобди!” – гэжэ Доржи Банзаров бэшэгээ дүүргэнэ. [Банзаров Д. Собрание сочинений. – М., Изд-воАН СССР, 1955].
А.А. Бобровниковой эсэгэ хэрээһэ зүүһэн буряад һэн, Эрхүүдэ протоирей бэлэй, эжынь баһал буряад.
А. Бобровников Эрхүүгэй шажанай семинари дүүргээд, Казаниин ород шажанай академидэ һуража түгэсэһэн юм. Д. Банзаров мэтэ профессорнүүд О. Ковалевский болон Поповой шаби ябаа.
Д. Банзаровай Петербургда хасаг албанһаа сүлөөрхэ хэрэг барихаяа ошохо үеэр А. Бобровников Хальмаг нютагта эрдэмэй томилолгоор мордожо, “Хальмаг-Монголой грамматика” зохёоһон юм. Эсэгэнь Монгол хэлэнэй грамматика 1835 ондо Петербургда хэблүүлһэн юм. Хүбүүн Бобровников грамматикынгаа түлөө Казаниин шажанай дээдэ һургуулиин – академиин мүнгэн шанда, Ородой академиин Демидовэй нэрэтэ шанда хүртэһэн, магистр эрдэмэй шатада хүрөө һэн. Оренбургда хилын захиргаанда ажалтай байхадаа, монголой дүрбэлжэн бэшэг тухай шэнжэлгэ хэһэн юм, тэрэнииень эрдэмтэн В. Григорьев наһа бараһанайнь һүүлдэ хэблүүлээ юм.
Эдэ жэшээ баримтанууд буряадай гэгээрэл ехэтэй зоной өөрын гүрэн түрэтэй болохо тухай эрмэлзэлээ хэзээ үниһөө буйлуулжа ябаһаниие гэршэлнэ.
Ардан АНГАРХАЕВ, Буряадай арадай уран зохёолшо, түүхын эрдэмэй доктор