​​Елүүрэй дэргэдэ – ерэхэ жэл тухай

Баргажанай үхибүүд баяртайнууд

Үбэлэй тон һайхан һайндэрнүүдэй нэгэн болохо Шэнэ жэлые бүгэдэ зон хүлеэн байдаг. Хэнэйшье мэдэһээр, хаа-хаанагүй гоё гэгшын ёлконууд тодхогдожо, һайндэрэй дүтэлхэ бүри хүн зоной сэдьхэ­лэй байдал хөөрэнэ гээшэ аабза. Ямар туйлалтануудтай энэ жэлээ үдэшэнэ, ерэхэ жэлһээ юу хүлеэнэ гэжэ уладһаа асуухаяа үйлсэ га­рабаб. Үбэлэй сагта томошуулнай үри хүүгэдээ мүльһэн елүүртэ халтируулжа наадахаяа ерэдэ­гынь эли. Эгээл тиимэһээ тэндэ хөөрэлдөө эмхидхэхэ гэжэ бодо­боб.

Үхибүүд Улаан-Үдэтэй танилсана

Соведүүдэй талмайн елүүр дээрэ нэгэ бүлэг хүүгэд шаг шууяа табилдан, ехэ хүхюутэйнүүд һолжоржо на­адажа байба. Танилсаха зуураа ойл­гобоб, Баргажанай дунда һургуулиин 4-дэхи ангиин 22 һурагша Нина Николаевна Королёва багшатаяа амаралтын үдэрнүүдтэ Улаан-Үдэ хототой танилсахаяа зорижо ерэһэн байна. Эдэ үхибүүд робототехни­кэдэ, хатарта һурана, санаар ябаха, модоор дархалха гэхэ мэтын кружо­гуудта ябана. Хоёр үдэрэй турша­да олон юумэ үзөө: Буряадай оперо болон баледэй театрта “Золушка” гэһэн зүжэг, ФСК соо цирк хараа, бо­улинг наадаа. “Бидэ хото үзэхэ гэһэн хүсэлөө хүсэлдүүлээбди, мүнөө жэл эхин һургуулияа дүүргэнэбди. Бул­та һайн сэгнэлтэтэйгээр дүүргэхэеэ оролдохобди, харин ори ганса муу юумэн гэхэдэ, саашадаа Нина Нико­лаевнада заалгуулхагүйбди“, - гэжэ харюусабад.

Ажалтай болодог һайб

Тиигэһээр байтар, нэгэ залуу эхэ­нэр хоёр хүбүүдээ наадуулхаяа абаад ерэбэ. “Минии нүхэр Альберт Чинги­сович инженер-энергетик мэргэжэл­тэй, гэр бүлэеэ хооллуулха гэжэ вах­таар ябажа хүдэлдэг. Би ажалгүйб. Хүүгэднай футбол, тхэквондо гэһэн тамирай зүйлнүүдтэ дуратайнууд юм. Улаан-Үдэ хотодо ажаһуудагбди. Үхибүүд 29-дэхи гимназида һурана. Мүнөө жэл тиимэ ондоо юумэн ма­най гэр бүлэдэ болоогүй, харин ерэ­хэ жэлдэ ажалтай болоһойб гээд найданаб. Зүгөөр дэлхэй дээрэмнай дайн дажар болонгүй, булта энхэ элүүрнүүд, һайн һайханууд ажаһууха болтогой”,-гэжэ Дина Валерьевна хэ­лээ.

Багашуулнай сэсэрлигтэ ябаһай

Уданшьегүй хоёр эхир хүбүүдые тэбэриһэн нэгэ залуухан айл хажуу таладамни бии болобо. Дугар Вале­рьевич, Эльвира Владимировна Дугарцыреновтэн Мэргэн, Эрдэм гэжэ эхир хүбүүдтэеэ аяар холын Үбэр Байгалай хизаарай Приаргунска ай­магай Погранична тосхонһоо Улаан- Үдэ хото айлшаар ерэһэн байба. Гэрэй эзэн эхэнэр Эльвира Влади­мировнатай хөөрэлдэхэдэ: “Үнгэржэ байһан жэл манай гэр бүлэдэ яһала һайн байгаа гэхэ байнаб. Юуб гэхэ­дэ, нүхэрни “лейтенант” гэһэн нэрэ зэргэдэ хүртөө, шэнэ автоунаатай болообди. Ерэхэ жэлдэ хүүгэднай үбдэнгүй, сэсэрлигтэ ябажа эхилһэй гээд найданабди. Теэд булта зондо энхэ элүүр байхыень хүсэнэбди”.

Үхибүүдни айл болоһой

Энэ үедэ түргэн алхадалтай эхэ­нэрые тогтоожо, асуудалнуудтамни харюу үгэхыень гуйбаб. “Би Майя Ми­хайловна Ангаева гэжэ нэрэтэйб, бухгалтер мэргэжэлтэйб, жэлэйнгээ дүн, тоосоо гаргажа байгаа бэлэйб. Ажал ру­угаа яаража ябаа һэм. Мүнөө жэл манай гэр бүлэдэ тиимэ һонирхомоор юумэн болоогүй, харин ерэхэ жэлдэ үри хүүгэд гэр бүлэтэй болохо юм гү гээд найданаб. Хүбүүн басаган хоёртойбди. Гэр барижа эхилээ һэмди, тэрэнээ барижа дүүргэжэ, шэнэ гэрэй найр наада хээ һаа, болохол байгаа. Ерэхэ жэл 50 наһатай болохоб, һанаандаа үшөө залуу ябанаб гэжэ бай­тарни, саг түргэн ябашана... Гарахаяа байһан гахай жэлээр арад зоноо амар­шалжа, бултанда энхэ элүүрые хүсэнэб”.

Хэрэгнай бүтэсэтэй байһай

Тиигэһээр байтарни, холо бэшэ­хэнэ олон үри хүүгэдтэй айл бүлэ һолжоржо наадажа байба. Танилса­хадам, Улаан-Үдэ хотын ТЭЦ-2 эм­хидэ машинистаар хүдэлдэг Роман Николаевич Головко хүбүүгээ, баса­гаяа, мүн дүү басаганиинь басагаяа дахуулаад, хүйтэхэн үдэр байбашье, газаахи агаараар хүүгэдээ амилуу­лангаа, баһа өөһэдөөшье амарангаа ерэһэн байбад.

“Үнгэрэгшэ жэлдэ ажални ураг­шатай байжа, дээшээ дэбжүүлэгдээб, газаагаа гараж баряабди. Тон ехэ омогорхолни гэхэдэ, нүхэрни - Юлия Сергеевна хүбүү бэлэглээ, тиигэ­жэ хүбүүн басаган хоёрой удаа гэр бүлэдэмнай хүбүүн үри нэмээ. Ерэхэ жэл үнгэрэгшэ жэл шэнги баһа урагшатай, хэрэгнай бүтэсэтэй байһай гэхэ байнаб. Ганса бидэндэ бэшэ, бүхы арад зондо амжалта хүсэхэ байнаб”, - гэжэ Роман Николаевич хэлэнэ һэн.

Любовь ЦЫБЕНОВАГАЙ гэрэл зураг