Владимир Шираповые танилсуулан тодорхойлжорхихо гэн гэһээ, онсо хурса олон бэлиг сооһоонь нэгыень илгажа нэрлэхэнь хэсүү байшаба. Тиимэһээ энэ удаа уулзажа хөөрэлдэһэн ушарһаа дулдыдан, найруулагша Владимир Ширапов гээд танилсуулая. Тэрэнэй бүтээһэн “Бэлигэй зам – хүндэ зам” гэжэ богони хэмжээнэй кино һаядаа олониитын анхаралда дурадхагдахань.
- Хэжэ байһан ажал тухайгаа Фейсбук-хуудаһандаа саг үргэлжэ тоосожо байдагта. Дооромбо лама Эрдэни-Хайбзан Галшиев тухай фильм бүтээһыетнай дуулабабди...
- Хэжэнгын дасанай харьяата Бадын дуганай ловон лама Дандар Базаржапов намда хандажа, Галшиев тухай баримтата фильм буулгая гэжэ дурадхаа һэн. Нютагайнгаа агуу санаартанай нэрыень мүнхэлэлсэхэ аргатай болоһондоо урмашажа, зүбшөөлөө үгөөд, мэдээсэл бүридхэжэ эхилээ һэмби. Теэд Түбэдтэ шажанай һургуули түгэсхэхэ үедөө тэндэхи ламанартай хэдэн үдэрэй туршада шойро хаялсажа, бултыень буляад, хороолгохоёо байтарнь, Шалсаана буурал баабай абарһан юм гэжэ арад зоной дунда тараһан түүхэһээ бэшэ, Галшиев тухай ондоо бодото баримта олдохогүй байшоо. Тэрээнтэй түрэлэй һэльбээтэйбди гэдэг зонойшье дунда тодорхой мэдээсэл дурадхаад орхихо хүнүүд үгы болонхой. Ямар юумэндэ үндэһэлжэ, фильм бүтээхэ гээшэбиб гэжэ һанаа үнөөн боложо, зобожо байтараа, ехээр халууршооб. Эгээл тэрэ үбдэжэ байхадаа, дэмырээ хүн гүб, зүүдэлээ гү, зүгөөр сценари бэшэхэ гол бодолнууд толгойдом орожо ерээ.
- Яагаа һонин юм бэ! Хөөрэжэ үгэхэ гүт?
- Бүхы сценарияа хөөрэжэ орхихогүй хүн аабзаб, гэбэшье гол нюусаяа нээһүү - Эрдэни-Хайбзан Галшиев хара багаһаа лама болохо хүсэлтэй байгаагүй гэжэ таамагланабди. Залуудаа олон эндүү гаргажа, харгыһаа хадуурхаяа ябатарнь, нютагайнь газар уһанай эзэд сабдагууд урдаһаань татажа, хойноһоонь түлхижэ, хоёр тээһээнь тэлэжэ, зүгыень харуулжа, зүб мүрыень олгожо үгэнэ.
- Тон юунэй болоһыень тодорхойгоор кино харахадаал мэдэхэт гэжэ гү?
- Галшын Эрдэни гэжэ эрид хатуу абари зантай, эрэлхэг зоригтой хүбүүн нэгэ баян хүнэй эхэнэртэй холбоорилдоно. Тиигэжэ тэрэнь үбгэндөө баригдаад, һүхөөр сабшуулжа алуулна. Үхэһэн эхэнэрэй һүнэһэн Эрдэнидэ һанаагаа зобожо: “Гэнтэ дайсан дээрмын ерээ haa, нимгэн хаалгаар яажа хаахаб? Тэрэшэлэн hангай гэрэй үүдыешье хэрэмэй үүдэн мэтэ бэхилэ”, – гэжэ захина. Иимэ аргаар Эрдэни-Хайбзан Галшиевай гол зохёол болохо “Бэлигэй толидо” ороһон һургаалнуудые гаргаабди. Бүхыдөө долоон субашад тайлбарилагдаа.
- Зоригтой алхамуудые хээ байнат. Теэд арад зон, илангаяа шажанай түлөөлэгшэд эдэ бүгэдыетнай хэр зэргэ хүлеэн абаха ааб? Буруушаагдажа болохоб гэжэ зүрхэ алданагүй гүт?
- Баримтата фильм хэхэ гэһэн зорилготойгоор ажал эхилһэн аад, һүүлэй һүүлдэ фэнтези түхэлэй богони хэмжээнэй фильм бүтээбэлди даа. Уран һайханай кино һэн тулань, иигэжэ өөрынгөө һанамжа бодолнуудые үргэнөөр хэрэглэхэ эрхэтэйбди. Гэбэшье гол дүрэмнай үндэр санаартан, дооромбо лама ушарһаань тон үлүү гараагүйбди гэжэ һананаб. Манда хандаһан Дандар ламбагай өөрөө Галшиев боложо наадаа.
- Нээрээ, зүжэгшэдөө нэрлыт. Олоной танил одод бии гү? Киногоо хаана буулгаабта?
- Эрдэни-Хайбзан Галшиевай тоонто гэжэ тоологдодог Ородой-Адаг нютагта буулгаабди. Тэндэмнай хүннүүгэй үеын хүүр булашанууд олон. Урдандаа мүнгэ олзоборилдог байһан уурхай байна, тэндэнь зарим зэр зэбсэгһээ эхилээд, элдэб юумэнэй үлэгдэлнүүд хэбтэнэ... Юрэдөөл, тэрээгүүр ябажа байхада, үни холын үльгэр түүхэ һэргэшэһэн мэтээр үзэгдэнэ. Мүн кинодо наадаһан зон тухай хэлэхэ болоо һаа, мэргэжэлтэ зүжэгшэдые хабаадуулаагүйбди, Хэжэнгэ нютагай юрын лэ арад зон дүрэнүүдые гүйсэдхөө. Тэдэнэй дунда малшад, һургуулиин үхибүүд, захиргаанай ажалшадшье бии.
- Тэдэниие шэлэжэ абахада, хүшэр байгаа ёһотой...
- Өөрөө Хэжэнгын хүн хадаа зониие таниха байжа, энэ рольдо тэрэ таараха гэжэ тухайлаад дурадхаа һэмби. Жэшээлхэдэ, Уһанай лус сабдагые наадаһан Номина Цырендылыковагай хэдэн жэлэй саана тайзан дээрэ дуу дуулажа ябахадань, ямар хурса харасатай басаган гээшэб гэжэ адаглаһан байгааб. Галшиевые наадаһан Барас Цыденов Дандар лама хоёр түхэл шарайгаараа адлихануудшье һаа, мүн лэ нюдэнэйнь хараса ондоо. Нэгэниинь залуу зандан наһандаа, эршэ хүсэн дундаа ябаһан - сог заляар дүүрэн харасатай, нүгөөдэнь ажабайдалай эреэ маряаниие үзэһэн – оюун ухаатай, онсо мэргэн харасатай.
- Кино гээшые хүнүүд зүжэгшэдэйл хүсөөр, тэдэнэйл абьяас бэлигээр бүтэшэдэг гэжэ бододог. Үнэн дээрээ ара талын ажал хангадаг мэргэжэлтэд – кинооператорнууд, абяа, гэрэл тааруулагшад, монтаж-эблүүлгэ хэдэг хүнүүд - тон ехэ үүргэ дүүргэдэг ха юм. Тэдэнээ нэрлыт.
- Нээрээ, зүжэгшэдэй наада гурба-дүрбэн үдэрэй туршада буулгаһан аад, хэдэн һара соо компьютераар элдэб шэнэ онол аргануудые хэрэглэн эблүүлээбди. Видео буулгаха, монтаж хэхэ ажал Михаил Цыренов, Николай Елизов гэгшэд даажа гараа. Залуушье һаа, яһала дүршэлтэй болоһон эдэ хүбүүдтэй хамта олон хэрэгүүдые бүтээгээбди. Бүри һаяхана суута барилдаашан Олег Алексеев тухай баримтата фильм дүүргэжэ, харагшадай һонорто хүргөөбди.
- “Буряад үнэн” сониной уншагшадта Таниие тобшохоноор танилсуулхамни гэхэдээ, сэтгүүлшэн, зүжэгшэн, продюсер, Арадай Хуралай гэшүүнэй туһалагша гээд лэ, олон ажал мэргэжэлыетнай дурдаха ёһотой болоходоо, энэ удаа найруулагша гээд лэ тодорхойлоо һэмби. Өөрөө өөрыгөө хэмби гээд нэрлэхэбта?
- Би Зүүн Сибириин гүрэнэй соёлой академидэ Виктор Русинов, Туяна Бадагаева гэгшэдэй хүтэлбэри доро һуража, 1996 ондо “театрай найруулагша” гэһэн мэргэжэлтэй боложо гараа һэмби. Һуралсалаа үргэлжэлүүлхэ гээд, Москвагай гүрэнэй соёлой ехэ һургуулиин Кино болон телевидениин институдта ороо һэм. Тэндэһээ бусаад, Яхад орондо телевиденидэ хүдэлөөб, удаань Улаан- Үдэеэ ерэжэ, эндэхи бүхы телекомпанинуудтай нягта харилсаатайгаар мүнөө болотор ажаллаһаар байнаб. Хажуугаарнь “Үндэр” гэжэ студи байгуулаад, баримтата болон уран һайханай фильмүүдые буулганаб.
- “Бэлигэй зам – хүндэ зам” гэһэн кино тухайтнай хөөрэлдөөндэ бусахадаа, хэзээ, хаана тэрэниие хараха гээшэбибди гэжэ асууял даа.
- Хэжэнгын дасанай ламанар Буряадай Засагай газарай Захиргаанай үндэһэтэнэй хорооной буряад хэлэ һэргээн дэлгэрүүлхэ зорилготойгоор эмхидхэһэн грантын мүрысөөндэ хабаадажа, 100 000 түхэригэй дэмжэлгэдэ хүртэһэнэйнь ашаар энэ кино бүтэбэ гээшэ. Гадна аймагай захиргаан, Ородой-Адаг нютагай арад зон аргагүй ехэ туһаламжа үзүүлээ. Аймагай соёлой байшанда хүдэлдэг уран зураашад Алла Михайлова, Полина Суворова гэгшэдтэ, мүн хэдэн үдэрэй туршада Ородой-Адаг нютагта байрлажа ажаллахадамнай, хүндэмүүшэ һайханаар хүлеэжэ абаһан Дамбаевтанай бүлэдэ онсо баяр хүргэхэ хүсэлтэйб. Харин киногоймнай хэзээ, хаана гараха тухайнь мүнөө дээрээ тодорхой болоодүй байна. Элирхэдэнь, Фейсбук-хуудаһандаа, мүншье бусад аргаар заатагүй соносхохоб гэжэ үгэеэ үгэнэб.
- Тэсэжэ ядан хүлеэхэбди. Һонирхолтой хөөрөө дэлгэһэндэтнай баяр хүргөөд, ажал хэрэгтээ амжалта туйлан, арад зониие баясуулан ябахыетнай хүсэел даа.