Татьяна Чагдуровна БУДАЕВАГАЙ ажалай намтар – олондо жэшээ. Хүдөөгэй юрын багшаар хүдэлжэ эхилээд, Зэдын аймагай Захиргаанай һуралсалай таһагые ударидаа. Тэрэшэлэн Буряад Уласай Болбосоролой болон эрдэм ухаанай яаманда таһагые хүтэлөө. Тиигэжэ Буряадай гүрэнэй ажалда ябаһанаа, федеральна, удаань уласхоорондын хэмжээндэ дэбжүүлэгдээ. Мүнөө хэжэ ябаһан ажал тухайнь удаадахи хөөрэлдөөнһөө анхарыт.
- Хэды жэл үнгэрбэ гээшэб, шэнэ тушаалда томилогдоһон сагһаатнай?
- 2015 ондо наһанайнгаа нүхэртэй хамта Россотрудничествада ажаллахаяа Москва зөөгөө һэмди. Тус эмхи болбол Ородой Холбоото Уласай Гадаадын хэрэгүүдэй яаманай мэдэлэй юм. Жэл шахуу тэндэ хүдэлөөд байтарни, Монгол руу эльгээгээ. Тиигэжэ Монгол Уласта Россотрудничествын Түлөөлэлгын эмхиин толгойлогшын орлогшоор гурбадахи жэлээ алба хэжэ ябанаб.
- Тиихэдээ гүрэн түрын ажалда тон ехэ дүршэлтэй болоот...
- Зүб даа. Оршон байдалаашье ондоогоор гэтэжэ эхилээб. Федеральна хэмжээндэ болоод хари гүрэндэ хүдэлхэдөө, дүршэлни улам дээшэлээл аабза. Жэшээлхэдэ, Россотрудничествын түбэй аппарадта Болбосоролой болон эрдэм ухаанай һалбариин хамтын ажалай хэлтэсэй даргын орлогшоор хүдэлхэдөө, ород хэлэ хари гүрэнүүдтэ дэлгэрүүлхэ, гүрэнэй һуралсал, эрдэм ухаа дэмжэхэ гэһэн харюусалгата үүргэ даагаад ябааб.
Эгээл тиихэ үедөө хари гүрэнүүдтэ, илангаяа Кипртэ, Израильда, Финляндида, Молдавида, Хойто Осетидэ Россиин эрдэм ухаанай болон соёлой түбүүд яажа ажалаа ябуулнаб гэжэ нюдөөрөө харааб.
Гадаадын политикадаа Россиин «зөөлэн хүсэ» хэрэглэлгэ намда ёһотой нээлтэ болоо гэхэ байнаб.
- Хаанашье хүдэлхэдөө, та олоной хараса доро ябанат. ВГТРК-да Үндэһэн түлэбэй хэмжээн соо “Болбосорол” гэжэ дамжуулга ехэ шадамараар хүтэлдэг бэлэйт. Энэ дүршэлтнай саашанхи ажалдатнай хэрэгтэй болоо гү?
- Буряадай гүрэнэй телевиденидэ Татьяна Мигоцкаятай хамта Үндэһэн түлэбэй хэмжээн соо хүтэлэгшын дүршэл 2007 ондо абаад, тэрэшэлэн 2013 ондо “Сэсэн һургуули”, 2014 ондо “Эрхэтэнэй экспертизэ”, 2015 ондо “Нээмэл педсовет” гэһэн дамжуулгануудые эмхидхээбди. Тэрэ дамжуулганууднай Буряадай телевидениин архивта бии гэжэ зосоогоо ехэ баяртай ябадагби. Гэбэшье телевиденидэ дамжуулга хүтэлһэн дүршэлни саашанхи ажалдам нилээд туһалаа. Камерын урда бэеэ зүбөөр абажа шададаг тула мүнөө сэтгүүлшэдтэй ядамаггүй харилсанаб. Тиихэдээ гол шухалыень тэмдэглэжэ үрдинэб. Гадна теледамжуулганууднай һуралсалай һалбариин бэрхэшээлнүүдые олониитэдэ дамжуулдаг байһан тула мүнөө Монголдо хэжэ ябаһан ажалдамни энэнь тон хэрэгтэй болоо.
- Мүнөө Монголдо ород хэлэ дэлгэрүүлхэ талаар ехэ ажал ябуулнат.
- Россотрудничествын Түлөөлэлгын эмхинүүд дэлхэйн 81 гүрэндэ бии. Мэдэлдэнь байһан Россиин эрдэм ухаанай болон соёлой түбүүд (РЦНК) уласхоорондын хани барисаа бэхижүүлхэдээ, нэн түрүүн ород хэлэ дэлгэрүүлхэ зорилго урдаа барина бшуу. Монголдо Россотрудничествын Түлөөлэлгын эмхиин дэргэдэ ород хэлэ шудалдаг хэшээлнүүд эмхидхэгдэнэ. Тиигэжэ Ородой Холбоото Уласта һуралсалаа үргэлжэлүүлхэ гү, али ажал ябуулха хүсэлтэйшүүлдэ горитой туһаламжа үзүүлнэбди.
Гадна ород хэлэнэй һайндэрнүүдые, урилдаануудые, олимпиадануудые болон элдэб наадануудые үнгэргэжэ, ород хэлэндэ олониитын анхарал татанабди. Россиин хэлэ бэшэгэй эрдэмтэдэй, багшанарай хабаадалгатайгаар хуралдаануудые, семинарнуудые эмхидхэнэбди. Энэ тон хэрэгтэй бшуу.
Гэбэшье ород хэлэ болон соёл дэлгэрүүлхэ талаар гол үйлэмнай жэл бүри октябрь-ноябрь һарануудта Орос-Монголой хани барисаанай болон хамтын ажалай үдэрнүүдтэ болодог. Тэрээндэ Россиин можо нютагууд оролсодог гээшэ. Үнгэрһэн жэлдэ Буряадһаа гүрэнэй дуу, хатарай “Байгал” театр, арадай дуу, хатарай “Забава” бүлгэм, арадай “Хэнгэргэ” ансамбль болон бусад хабаадаа һэн.
Монголдо ород хэлэ болон соёл дэлгэрүүлхэ хэрэгтээ олзын хэрэг эрхилэгшэдые болон гүрэнэй бэшэ эмхинүүдые олоор оролсуулха зорилго мүнөө урдаа баряад ябанабди.
- Теэдшье Монголой ажаһуугшад, илангаяа залуу халаан ород хэлэ тоохоёо болиһон, имагтал англи хэлэ шудалхаяа хүсэнэ гэжэ дуулаһан байнаб. Зүб гү?
- Тиимэл даа. Хэрбэеэ 1990-ээд онууд хүрэтэр Монгол орон ород хэлэ шудалдаг хэмжээгээрээ дэлхэйдэ түрүү зэргэдэ һаа, мүнөө монгол залуушуул ород хэлэ мэдэхэеэ болижо байна.
Харин һүүлэй сагта ород хэлэн Европын хэлэнүүдтэ тон дүтэ гэжэ ойлгосо ерээ. Тиимэһээ һонирхолынь һэргэжэ эхилээ. Гадна Совет гүрэндэ һуралсал гараһан гэртэхин абаһан мэдэсэеэ үндэрөөр сэгнэдэг байна. Тиимэһээ үхибүүдтээ заабол ород хэлэ шудалуулхаяа оролдоно. Жэл бүри март болон апрель һарануудта Улаан-Баатарта оршодог Россиин эрдэм ухаанай болон соёлой түб Россиин дээдэ һургуулинуудта болбосорол абаха дуратайшуулые шэлэдэг. Тиихэеэ хүсэһэн зоной тоо һүүлэй сагта улам дээшэлээ. Россиин мүнгэн һанһаа һомологдодог квото баһал нэмэгдэнэ. Хэрбэеэ 2010 ондо 250 зондо үгтэдэг байгаа һаа, 2018 ондо 500 һуури дурадхагдаа.
Хэды тиибэшье ород хэлэ дэлгэрүүлхын тулада гүрэнэй талаһаа, Монголойшье, Россииншье үмэнэһөө туһаламжа хэрэгтэй байна.
Мүнөө дээрээ Монголой бүхы аймагуудта Ород хэлэнэй түбүүд ажалаа ябуулна. Бэеэ дааһан эдэ эмхинүүд ород хэлэ дэлгэрүүлхэ талаар горитой ехэ үүргэ даана. Тиихэдээ Россиин Эрдэм ухаанай болон соёлой түбэй байгуулһан онол аргануудые хэрэглэн, элдэб бүлэг зондо хэшээлнүүдые үнгэргэнэ бшуу. Энэ хэрэг аймагай Захиргаанууд дэмжэжэ, мүнгэ һомолжо эхилээ.
- Шэнэ жэлэй үмэнэ Россиин Эрдэм ухаанай болон соёлой түб олон хэмжээ ябуулгануудые эмхидхээ гээд мэдэнэбди. Алинииень онсо тэмдэглэхэ гээшэбта?
- Үхибүүдтэ зорюулһан Шэнэ жэлэй хэмжээнүүд болохол ёһоороо болоо ааб даа. Гэбэшье Хяагтын 4-дэхи һургуулиин эмхидхэһэн ород хэлэ хари хэлэн мэтээр зааха шэглэлээр педагогическа үүсхэлэй наадан дээрэ тогтохо хүсэлтэйб. Буряадай тус һургуули социальна үүргэтэй томо проектнүүдэй урилдаанда түрүүлжэ, федеральна һанһаа һомологдоһон мүнгэндэ хүртэжэ, энэ хэмжээ үнгэргөө бшуу. Москвагай болон Монголой ород хэлэнэй багшанарай хабаадалгатайгаар эрдэмэй-практическа хуралдаан, семинар, олимпиада үнгэрөө. Ород хэлэнэй түрүү багшые элирүүлгын урилдаан эмхидхэгдээ.
- Гаража ерэһэн шэнэ жэлдэ үшөөшье олон түсэбүүдые, уулзалгануудые хараална ёһотойт.
- 2019 ондо ойн баярнууд олоор тэмдэглэгдэхэ. Халхин-Голдо болоһон байлдаанда Илалта туйлаһаарнай 80 жэл гүйсэбэ. Мүн “Улаан-Баатарай түмэр замай” байгуулагдаһаар 70 жэл болобо...
Саашанхи ажалдаа ород хэлэ болон соёл дэлгэрүүлхэ гэһэн гол зорилгоёо урдаа баряад ябахабди. Тиихэдээ Монголдо Россиин болбосоролой хүндэ үргэдхэхэ талаар бүри эршэтэй ажал ябуулха, хоёр гүрэнэй һуралсалай эмхинүүдэй хоорондо холбоо байгуулха тухай түсэблэнэбди. Гадна Монголдо ажаһуудаг нютагаархинаа харааһаа алдахагүйбди гээд найдуулнаб.