Захаамин аймагай Санага нютагаархид Гахай жэлээ угтаба. Нютагай соёлой ажалшад арад зоноо дүрбэн бүлэг болгожо хубаарилжа, найр наадаяа эмхидхэбэ. Сагаалганай нааданда иимэ зүйлнүүд оробо: буряад хэлэнэй диктант, шатар, шагай наадан, ёохор, hээр шаалган, уран hайханай номернууд ба таабари таалган, оньhон үгэнүүдые тайлбарилха, асуудалнуудта харюусаха болон бусад.
Буряад хэлэн дээрэ диктант бэшэлгэндэ нютагай юhэн эмхи зургаанай ажалшад ба нютагай диктант бэшэхэ бүхы дуратайшуул хабаадаба. Юрэнхыдөө, далан найман бэшэгшэд оролсоо. Энэ ехэ hонин хэмжээ ябуулга болоо гэжэ тэмдэглэмээр, томошуулнай ехэ эдэбхитэйгээр хабаадаа, эрдэм мэдэсэеэ шалгажа, үнинэй буряад хэлэн дээрээ бэшээгүйшье hаа, яhала hайн дүнгүүдые харуулаа гэжэ хэлэхэ хэрэгтэй. Санагын участково больницын мэргэжэлтэд эрхим дүн харуулжа, түрүү hуури эзэлжэ, шангуудаар урмашуулагдаа. Дүнгүүдые гаргаhанай hүүлээр тобшолол хэхэдээ, манай нютагай наhатай зон түрэл хэлэеэ, мүнөө үеын залуушуулда орходоо, hайн мэдэдэг байна гэжэ харагдана. Эндэ эгээ үндэр наhатай, далан долоотой Нина Цырендоржиевна Намсараевае онсо тэмдэглэмээр. Буряад хэлэн дээрэ таабари таалганда, оньhон үгэнүүдые тайлбарилха, асуудалнуудта харюусаха наадануудта үхибүүд эдэбхитэй байгаа, олонхинь баhал шагналнуудта хүртөө.
Шатар наадахадаа, Баяр Жамьянов, Саяан Бадмаев, Сэсэгма Ламажапова гэгшэд шалгарба. Шагай нааданда Николай Чимитов Гэрэлма Чимитова хоёр эрхим наада харуулба. Һээр шаалган дээрэ сэлеэнэй бүлгэм бүхэн табан эрэшүүлhээ, нэгэ эхэнэрhээ бүридэhэн байгаа. Дүрбэн сэлеэнэй бүлгэмүүд бэе бэетэеэ тэмсэжэ, шанга тулалдаанай hүүлээр Санагын дээдэ талын бүлгэм илажа гараба. Энэ бүлгэмэй Баярма Данжалова онсо шалгаржа, эрэшүүлhээ оройдоошье дутахагүй байhанаа гэршэлээ. Сэлеэн бүхэнэй бүлгэмүүд соёлойнгоо ордоной тайзан дээрэ ёохор наадаяа харуулаад, бултадаа газаашаа гаража, түүдэгээ тойрон, бүхы сугларhан зонтоёо хамта дүхэриглэн наадаба. Уран hайханай номернууд сооhоо Даниил Дашеевич Нохоровой дуулаhан урданай дуун hанаа сэдьхэлдэ ехэтэ таараба.
Үдэрэй 12 сагта эхилhэн найр наадан үдэшэ харанхы болотор үргэлжэлжэ, дүнгүүд гаргагдаад, нютагай урда талын ба дээдэ талын бүлгэмүүд тэнсэжэ, түб сэлеэнэйхид хоёрдохи, зүүн сэлеэнэйхид гурбадахи hууринуудта гараба. Иигэжэ Санага нютагайхид Нохой жэлээ хүндэлэн мордохуулжа, баян дэлгэр, буян хэшэгтэй, наадатай зугаатайгаар сагаалаа. Сагаалганай найр наадые үнгэргэхэдэ халуун туhаяа хүргэжэ, эбээн тэдхэhэн нютагайнгаа эрхим хүнүүдые нэрлэжэ, баяр баясхалангаа мэдүүлнэбди. Эдэ хэд бэ гэбэл, Арадай Хуралай hунгамал Геннадий Юрьевич Доржиев, аймагай һунгамал Алдар Жаргалович Норбоев, фермер Баяр Валентинович Жамьянов, нютагтаа худалдаа наймаа эрхилэгшэд Вера Бимбаевна Нохорова, Ольга Санжиевна Балданова, Баяр Санжижапович Цыбенов, Виктор Валерьевич Гомбоев, Ольга Балдановна Данилова. Иигэжэ хододоо нютаг зондоо туhатай, hайн hанаатай, hайхан заяатай, хэжэ байhан хэрэгтнай бүтэсэтэй, урагшатай, урматай, элүүр энхэ, амгалан тайбан ажаhуухатнай болтогой!