Баир Жалсанов worldskills туг дамжуулна
“Ажал хэжэ атаржаха,
Хүдэлмэри хэжэ хүдэржэхэ” (Арадай сэсэн һургаал)
Энэ дэлхэйдэ түрэһэн хүн бүгэдэн өөрын нэгэ эрдэмтэй, нэгэ шадалтай байдаг. Теэд тэрээхэнээ зүбөөр олодоггүй али олон ушар дайралдадаг. Нэн түрүүн энэмнай түрэлхидһөө дулдыдана. Юуб гэхэдэ, эхэ эсэгэнь үхибүүгээ дан дээгүүр һанадаг гү, али нэгэ ехэл һайн мэргэжэлтэй болгохые оролдоно. Теэд түрэһэн үриингөө тэрээхэн нэгэ эрдэмые, шадалые ойлгонгүй, заал һаа дээдэ эрдэмтэй болгохо, үгы һаа, ехэһээ ехэ салинтай мэргэжэл шэлэхыень дурадхана. Тиимэһээ мүнөө сагта тусхай дунда һургуулинууд ехээр тоогдоногүй гэжэ хүнүүд һанана.
Тиишээ һурахаяа дунда һургуули эрхимээр дүүргэжэ шадахагүйб гэжэ һанаһан, ЕГЭ шалгалтаһаа айһан һурагшад ороно гэжэ тоологдоно. Тиихэдэ ядуу байдалтай гэр бүлын аргаа ядаһан үхибүүд лэ тусхай дунда һургуулинуудта ородог гэжэ баримташье бии.
Тон тиимэ бэшэ
Үнэхөөрөөшье, тусхай дунда һургуулинуудта ЕГЭ-дэл шанга шалгалта үгынь зүб. Тэндэ дээдын эрдэм олгохо бэшэ, харин мэргэжэлдэ һургаха гол зорилго табигдана ха юм. Олзо оршогүй гү, али олон үхибүүдтэй айлнуудта үхибүүдээ холо эльгээнгүй, ехэ гаргашагүйгөөр мэргэжэлтэй болгохо яһала һайн арга боломжо энэл даа. Тэдэнэр һуралсалай түлөө мүнгэ түлэнэгүй, харин бага ехэшье һаань, тэдхэмжэ абана. Мүн баһа хамтын дулаан байрада байгаад, үдэртөө халуун хоол бариха гээшэ мүнөө сагта бүрил һайн гээшэ. Теэдшье холо ошолтогүй, эндэхэнээ, хажуудаа һуража, мэргэжэлтэй болохо һайн арга ха юм.
Аймагуудай түбүүдтэ яһала олон шэглэлээр һургаха аргатай тусхай дунда һургуулинууд шэнэ сагай эрхэдэ тааруулан ажалаа ябуулһаар. Харгыншье мүнгэн алмагдана гээшэ. Тиигээдшье аяар таба-зургаан жэл һуранагүй. Харин дээдэ һургуулиин диплом абаад, мэргэжэлээрээ хүдэлһэн залуушуулые мүнөө хургаа даран тоолохоор.
Хэзээни хэзээнһээ ажалша бэрхэ хүнүүд олоной оройдо нэрэтэй түрэтэй ябаһан гээшэ. Мүнөө сагта гарта хүлтөөрөө хам орожо хэхэ ажалнууд үсөөрөө гэхэдэ, элдэбын эдэ мүнөөнэй оньһон техникэ хэн жолоодохо юм? Тэрэ техникышье хэн бүтээхэ гээшэб? Зайн гал хэн яларуулжа, бүхы ажабайдалыемнай урагшань ябуулха юм? Хэд гээшэмнай гэр байра бариха, дулаасуулха юм? Талха таряагаа хэмнай ургуулжа, адуу малаа хэднай үсхэхэ юм бэ гээд лэ олон тоото асуудалнууд гараад ерэнэ.
Тиимэһээ ажахыдамнай хэрэгтэй мэргэжэлтэдые бэлдэхэ гээшэ гүрэн түрын түрүү зорилго болоно. Теэд тэрэ зорилгонь хэр зэргэ бүтэдэг юм даа?
Болбосоролой яаманай мэдээгээр, Буряадай тусхай дунда һургуулинуудта 15 мянган залуушуул һурана гэхэдэ, дээдэ һургуулинуудта хоёр дахин олон оюутад тоологдоно. Эндэһээ хараад үзэхэдэ, дээдэ һургуулинуудые ямар нэгэн аргаар дүүргэһэшүүл юугээ хэхэ, хайшаа ошохо болоноб? Харин дунда мэргэжэлтэд ажахыдамнай дутаһаар зандаа. Илангаяа хүдөө ажахыда зооветмэргэжэлтэд болон агрономууд ехээр дуталдана. Буряадтамнай үлэһэн хэды заводуудта мэргэжэлтэ токарьнууд, слесарьнүүд, фрезеровщигууд гээд захаһаа олон мэргэжэлтэд угаа хэрэгтэй аад, үгыл даа.
Мүн хараад үзэхэдэ, ондоо можо, хизаарнуудта ошожо, ээлжээгээр хүдэлдэг хүбүүднай мэргэжэлгүйһөө боложо, элдэбын хара ажалда заруулна. Һайн һургуулитай трактористнууд ашагта малтамалнуудые олзоборилдог үйлэдбэриин ажахынуудта дуталдана. Мүнөө үеын хүсэ ехэтэ бульдозернуудые, экскаваторнуудые, крануудые жолоодохо гээшэ бэлэхэн хэрэг бэшэ.
Хэды тиигэбэшье…
Һүүлэй жэлнүүдтэ тусхай дунда мэргэжэлтэниие һургаха, хүмүүжүүлхэ, залуушуулые ажалтай болгохо гэһэн гүрэнэй түсэлнүүд, түсэбүүд табигдажал байдаг. Ганса манайшье гүрэндэ бэшэ ааб даа. Уласхоорондын “Залуу мэргэжэлтэд WorldSkills” гэһэн нэгэдэлэй (1953 ондо байгуулагдаһан) ябуулгада 75 гүрэн хабаадана. Энэ түсэл залуу мэргэжэлтэдые дэмжэхэ зорилготой юм. Мүн Ородой Холбоото Улас болон манайшье Буряад Улас хабаадана. Мүнөө жэл Уласхоорондын чемпионат байгша оной майн 20-24-эй үдэрнүүдтэ Казань хотодо үнгэргэгдэхэ. Россиин командын бүридэлдэ орожо, тэрээндэ хабаадаха эрхэдэ манайшье залуушуул хүртэхэ.
Эсэгэ ороноо хамгаалагшын һайндэрэй үмэнэ, февралиин 22-то, “Буряад Уласай залуу мэргэжэлтэд (WorldSkills Russia)- 2019” гэһэн V чемпионадай дүүргэлтын үдэшэ соёлой “Рассвет” ордон соо үнгэрөө. Энэ хэмжээ ябуулгын эндэ үнгэргэгдэһэниинь гайхалгүй, өөрын онсо удхатай. Буряадаймнай эгээл түрүүшын “промышленна гигантнуудай” нэгэн болохо “Авиазавод” мүнөө сагта хэрэгтэй мэргэжэлтэдые бэлдэхэ талаар горитой ажал ябуулдаг.
Залуушуулые ямар мэргэжэлнүүдээр шэлэнэб гэхэдэ: гэрэй болон офисуудай бараа бэлдэгшэ, модошо дархан, электрик, столяр, гагнууршан, тоһон шэрээр шэрдэгшэ, штукатурщик, сантехник, тогоошон, оёдолшон гээд лэ мүнөө үеын дизайн, флористика, информационно болон коммуникационно технологинууд, робототехникэ хүрэтэр олон даа.
Буряадай, Алтайн хизаарай, Кемеровскэ болон Эрхүү можонуудай, Татарстан Уласай, Үбэр Байгалай хизаарай 480 хабаадагшад, шүүгшэд суглараа. “Эгээл эрхим мэргэжэлтэн” урилдаанда 100 мэргэжэлтэд WorldSkills гээшээр 23 компетенцеэр болон WorldSkillsJunior 6 компетенцеэр урилдаһан байгаа.
Залуу эрхим мэргэжэлтэдые Буряад Уласай болбосоролой сайд Баир Жалсанов, Буряадай Засагай газарай Эдэй засагай болон худалдаа наймаанай яаманай таһагые даагша Михаил Осеев, Буряадтахи «WorldSkills» хүтэлбэрилэгшэ Анатолий Белоусов гэгшэд халуунаар амаршалаа.
- 2015 ондо түрүүшын урилдаан манда үнгэрөө. Тэрэ гэһээр урилдаашадшье олошороо, компетенцишье үргэдөө. Тиихэдэ 6 компетенци байгаа һаа, мүнөө 31 болонхой. Саашадаа үшөөшье үргэдэхэ гэжэ этигэнэб. Мэргэжэл гү, али тушаал хүниие нэрлүүлнэ бэшэ, харин хүн өөрынгөө мэргэжэлые дээшэнь үргэнэ. Бүхы юумэн өөһэдынтнай гарта, - гэжэ Баир Баторович залуу мэргэжэлтэдтэ хандаа.
Баярай эгээл ехэ хэмжээн гэхэдэ, WorldSkills болон WorldSkills Казаньда гэһэн тугууд Буряад Уласта үргэгдэбэ ха юм. Тугай эстафетын эмхидхэлэй хорооной түрүүлэгшэ Данил Ясельский Баир Баторовичта “WorldSkills Казань – 2019” гэһэн баталамжа барюулаад, туг саашаа дамжан, Чечен Уласта хүрэхэ гэжэ хэлээ.
Илагшадые яамануудай, таһагуудай түлөөлэгшэд, тусхай дунда һургуулинуудай захиралнууд, багшанар, эбээн тэдхэгшэд амаршалаа. Эдэл һургуулинуудай оюун бэлигтэйшүүл хатар наадануудаа бэлэглээ.
Болбосоролой яаманай сайтһаа гэрэл зурагууд