526
2019 оной майн 15-17-ной үдэрнүүдтэ Буряад уласта эрэмдэг бэетэй хүнүүдэй дундаһаа эрхим мэргэжэлтэдые элирүүлхэ зорилготой «Абилимпикс» гэһэн уласай чемпионат үнгэргэгдэнэ. Энэ хэмжээ ябуулгада табяад һурагша болон оюутад хабаадаха. 75 волонтер чемпионат үнгэргэлсэхэ юм.
Чемпионадай үедэ үзэсхэлэнэй, албанай хэрэгэй, мэргэжэл шэлэлгын программанууд эмхидхэгдэхэ. Мүрысөөндэ хабаадагшад сетевой болон системнэ администрировани; электронно тоног хэрэгсэлнүүдые задалха, суглуулха; эдеэ хоол шанагшадай; модоор дархалагшадай; шэрдэлгэ-будалгын ажалай; текст дээрэ хүдэлмэриин, ниитын ажаябуулга, веб-дизайн, дэгээ зүүгээр нэхэхэ, оёдолшон гэһэн 10 һалбарида хаба шадалаа туршажа, эрхимүүд элриүүлэгдэхэ.
Албанай хэрэгэй программын хэмжээндэ «Инклюзивное образование: проблемы и перспективы развития» коучинг-сесси, өөрын хүгжэлтын талаар һуралсал, эрэмдэг бэетэй үхибүүдтэ гэртэхиндэ хуулиин талаар семинар эмхидхэгдэхэ. Тиихэдэ мэргэжэлэй болбосоролой эмхинүүдтэ һурагшад экскурсида ошожо, эрэмдэг бэетэй зоной ажалай яармаг үнгэргэгдэхэ юм.
Буряад уласай түрүүшын чемпионат 2018 оной октябрь һарада үнгэргэгдөө гэжэ һануулнабди. Энэ хэмжээ ябуулгада 140-һөө дээшэ хүн хабаадаа.
«Абилимпикс» хадаа уласхоорондын хүдэлөөн болоно. Тэрэнэй хэмжээндэ эрэмдэг бэетэй зоной мэргэжэл шэлэхэ, саашадаа ажалтай болохо талаар мүрысөөнүүд үнгэргэгдэдэг. Ородой Холбоото Уласай можо нютагуудта жэлэй туршада мүрысөөнүүд үнгэргэгдэнэ.
Буряад Уласай болбосоролой болон эрдэм ухаанай яаманай мэдээсэлэй албанай гэрэл зураг
