​Баяртай, һургуули! Баяртай, багшанар!

Буряадай эрхим багша Дмитрий Павлов ангияа дахуулаад, һүүлшын хонхын жагсаалда гаража ябана

Арбан нэгэн жэлэй саана 29-дэхи Буряад гимназиин богоһо алхажа ороһон хөөрхэн жаахан хүүгэд - мүнөө сэхэ харашагүй гоё, бэрхэ, ухаатай басагад, хүбүүд түрэл һургуулитаяа хахасахань. Ерээдүйн юристнүүд болон эмшэд (иимэ хоёр шэглэлтэй анги) энэ бэеэрээ гүрэнэйнгөө шалгалтануудые тушаажа, хэниинь хайшаа гээд лэ, хэдэн тээшээ тарашаха.

- Мүнөө жэл манай һургуули 29 хүн дүүргэнэ. 6-ниинь алтан медаль абаха. Энэмнай ехэ һайн дүн гээшэ. Мүн 9-дэхи анги дүүргэжэ байһан һурагшадай 13 хүн эрхим һуралсал гэршэлһэн аттестат абаха юм, - гэжэ гимназиин захирал Баир Дониров Һүүлшын хонхын һайндэрэй үедэ онсолоо. – Дүүргэгшэднай булта дээдэ һургуулинуудта орожо һураха гэжэ бата найданаб. Зүгөөр шухалань гэхэдэ, һайн лэ хүнүүд болог лэ даа.

Баир Аюржанаевич һуралсалай жэлэй дүнгүүдые соносхоходоо, эдэ 29 хүүгэдые дүүргүүлжэ байһан физкультурын багша Дмитрий Павловай “Буряадай эрхим багша-2019” конкурсдо илаһыень бүхыдөө һургуулиингаа эгээл үндэр амжалта гэжэ тэмдэглээ. Дмитрий Александрович ерэхэ намар Чечен Уласай Грозный хотодо үнгэргэгдэхэ Бүхэроссиин конкурсдо Буряадаа түлөөлхэ юм гэжэ һануулая.

Хүндэтэ айлшаар бууһан “Буряад үнэн” Хэблэлэй байшанай захирал Баир Ширапов, Улаан-Үдэ хотын болбосоролой хорооной мэргэжэлтэн Хандама Суворова, Октябрьска хороогой захиргаанай ахамад мэргэжэлтэн Анна Устинова гэгшэд ажалаараа шалгарһан багшанарта, амжалта туйлаһан һурагшадта шагналнуудые барюулаа.

Ажабайдалай үргэн харгыда гарахаяа байһан һурагшадай түрэлхид олон байгаа һэн. Эрдэмтэд Сергей Геннадьевич ба Дарима Бальжинимаевна Андреевтэн ехэ хүбүүнтэеэ суг хамта Яна басагаяа амаршалхаяа ерээ. Тэдэ хоюулаа биологууд хадаа басаганайнгаа эрдэмтэн болоо һаань дуратай ааб даа. Багаһаань хойшо эрдэм шэнжэлгын ажалда хабаадуулхаяа оролдоо. Монгол, Солонгос, Германи болон бусад гүрэнүүдтэ эрдэмэй конференцинүүдтэ хабаадуулаа. Зүгөөр Яна стоматологой мэргэжэл шэлэнхэй юм.

- Сагай үнгэрхэдэ, Һүүлшын хонхын һайндэрые уяран дурсадаг байхаб гэжэ һанагдана. Түрэл һургуулияа, багшанараа, суг һураһан нүхэдөө хэзээдэшье мартахагүйб. 29-дэхи Буряад гимнази – эрхим һургуули. Манай хүтэлбэрилэгшэ – эрхим багша. Манай анги – эрхим анги, - гэжэ Яна хэлээ.

Ойро зуура гэһээр байтарнь, дүрбэн жэл үнгэрөө

Дмитрий Павлов һургуулида дүрбэн лэ жэл хүдэлжэ байна. Буряадай гүрэнэй ехэ һургуулиин Бэеын тамирай ба спортын факультет дүүргэмсээрээ сэрэгэй албанда татагдаад, табан жэлэй хэлсээгээр тэндээ үлэшоо һэн. Удаань олзын хэрэг эрхилээ, саг зуура Сбербанк Лизинг компанида экономистааршье хүдэлөө. Һүүлдэ барилга эрхилжэ байтараа, 29-дэхи Буряад гимназида физкультурын багша хэрэгтэй гэжэ дуулаад, талаангаа туршаха гэжэ шиидээ бэлэй. Тиин тэрэ үедэ һургуулиин захирал байһан Баир Ширапов залуу бэрхэ хүбүүе хёрхо нюдөөрөө обёоржо, дүрбэн хүн сооһоо шэлэжэ абаа юм.

- Ойро зуура хүдэлөөд болишохоб гэжэ һанажа байһамни, һара болоод лэ, намда 8-дахи анги даалгажархёо. Энээнһээ урид һургуулида нэгэшье үдэр хүдэлжэ үзөөгүй би ехэ гайхааб. Зай, яахаб теэд. 9-дэхииень дүүргүүлээд болино бэзэб гэжэ һанаһан аад, бодото дээрээ үхибүүдээ хахад харгыдань хаяад ябажа шадаагүйб. Тиигэһээр ажалдаашье дадажа, үхибүүдтэ дурлаһанайхи түрүүшынгээ выпуск хэхэмни гээшэ, - гэжэ Дмитрий Александрович омогорхон хэлээ.

Залуу багша һурагшадайнгаа түлөө ехэ һанаагаа зобоно: гүрэнэйнгөө шалгалта хэр тушаахаб, хэн хайшаа һурахаяа орохоб, ямараар ажабайдалаа зохёохоб... Дүрбэн жэл соо түрэл болошоһон үхибүүдээ ходо һанажа ябаха, саашанхи ажабайдалдань дэмжэжэ байха. Иихэдээ 2019 оной Буряадай эрхим багша хуби заяагаа һургуулитай бүхөөр холбобо гэжэ найдая.

Һургуулиингаа нэрэ үргэжэ ябаха

Алексей Найданов, Елена Ундонова – ангиингаа түрүүшүүл, тон эдэбхитэйнүүдынь. Алексей анханһаа ганса “5” дээрэ һураһан, элдэб янзын хэмжээ ябуулгануудта, тэрэ тоодо олимпиада болон конференцинүүдтэ амжалтатай хабаадаһан. “Байкал” гэһэн футбольно клубта наададаг, самбо барилдаагаар бэеэ һоридог байһан. Зүгөөр энэ жэлдэ гансал һуралсалдаа, гүрэнэй шалгалтада бэеэ сүм зорюулаа.

Алексей ерээдүйнгөө мэргэжэл 8-дахи ангида һуража байхадаа шэлэһээр, мүнөө болотор һанамжаяа хубилгаагүй. Хүбүүн Эхэ ороноо хамгаалхын тула сэрэгэй дээдэ һургуулида орохоор хараална. Гүрэнэй шалгалтаһаа айнагүй: лаб һайн тушаахаб гэжэ бата найданхай.

- Иигээд лэ һургуулитаяа, суг һураһан нүхэдтэеэ хахасахаб гэжэ һанахада гунигтай. Гэбэшье урдамни шэнэ арга боломжонууд нээгдэнэ, ажабайдалай шэнэ шата эхилхэ гэжэ ойлгоходоо баяртайб, - гэжэ тэрэ һанамжаяа мэдүүлээ. – Манай анги ехэ эбтэйгээрээ бусадһаа илгардаг. Дмитрий Александрович бидэниие нэгэдүүлжэ шадаа. Багшанартаа баярые хүргэнэб, суг һураһан нүхэдтөө бүхы зорилгонуудаа бэелүүлхыень хүсэнэб.

Елена баһал бэрхэ һурадаг. 29-дэхи Буряад гимнази 9-дэхи ангидаа ерэһэн. Урид Хурамхаанай дунда һургуулида һураһан хүдөөгэй басаган эндэ академик гэхээр ганса ухаан үхибүүд сугларанхай юм бэшэ гү гэжэ зүрхэ алдаа һэмби гэжэ мүнөө энеэн хөөрэнэ. Тиин айжа байжа ерэхэдэнь, Дмитрий Александрович дэмжэжэ, абаһаар лэ староста болгожорхёо.

Басаган дуулаха, хатарха дуратай. 2017 ондо “Мисс Улан-Удэ” конкурсдо “Эдир мисс Улан-Удэ” номинацида шалгараа. Энэ жэл Чайковскиин нэрэмжэтэ уралигай колледждо ороод, хоёр тээ һураад туршаа. Тиин мэргэжэлтэ дуушанай зам минии бэшэ, сэдьхэлээ ханаахын тула хоёр һарын нэгэ дахин тайзан дээрэ гарахада болохо гэжэ ойлгоод, колледжһоо болёо. Мүнөө Эрхүүгэй гүрэнэй ехэ һургуулиин юридическэ факультедэй оюутан болохоор түсэблэнэ. Саашадаа мүрдэгшөөр хүдэлхэ хүсэлтэй.

- Би олон һургуули һэлгээб. Зүгөөр 29-дэхи Буряад гимнази намда тон дүтэ. Бидэ, 82-дохи выпускынхид, хаанашье һураа һаа, ямаршье газарта хүдэлөө һаа, түрэл һургуулиингаа нэрэ үргэжэ ябахаяа оролдохобди, - гэжэ Елена хэлээ.

Анна Огороднигой гэрэл зурагууд