750
Ородой Холбоото Уласай «Болбосорол хүгжөөлгэ» гэһэн гүрэнэй программа бэелүүлхэ талаар грантнуудта хүртэхэ мүрысөөндэ Буряад уласай дүрбэн һургуули эрхимлээ.
«Юрэнхы болон нэмэлтэ һуралсалай арга боломжонуудые нэбтэрүүлхэ болбосоролой мүнөө үеын оршон хүгжөөлгэ» гэһэн мүрысөөндэ 10 һургуули хабаадаа. Тиигэжэ нэгэ-нэгэ сая түхэригэй грантдаУлаан-Үдын 19-дэхи һургуули, Сэлэнгэ аймагай Загустайн һургуули болон Гусиноозёрск хотын 5-дахи һургуули хүртөө.
Тэрэшэлэн Улаан-Үдын 19-дэхи һургуули экологи болон биологёор «Pasco» гэһэн цифровой лаборатори абаха юм. Эдэ эрдэмүүдээр һонирходог 165-һаа дээшэ үхибүүд газар, уһа, агаар, уларил шэнжэлхэ, хубилалтануудыень тэмдэглэхэ оньһон хэрэгсэлтэй болохо.
- Түсэлэй хэмжээндэ методическа сүлжээн байгуулагдажа, Буряад уласай, Эрхүү можын, Үбэр Байгалай хизаарай 20-һоо дээшэ һургуулинууд эндэ хабаадаха. Тэрэнэй ашаар, багшанартайшье, һурагшадтайшье видео-конференцинууд, вебинарнууд эмхидхэгдэхэ аргатай байха юм, - гэжэ Буряад уласай болбосоролой болон эрдэм ухаанай яаманай сайдай орлогшо Валерий Поздняков хэлэбэ.
Тиихэдэ нэгэ сая түхэригэй грантда хүртэһэн үшөө нэгэ болбосоролой эмхи хадаа Улаан-Үдын 59-дэхи гимнази болоно. Тус һургуули «Байкальская лаборатория функциональной грамотности подростков: развитие функциональной грамотности через проектно-исследовательскую деятельность» гэһэн түсэл бэелүүлхэ.
