​​Улаан-Үдэ шадарай Сотниково һууриниие ойн түймэрһөө аршалаа

Һүүлэй хэдэн үдэрнүүдтэ Буряад Уласай бүхы дэбисхэр дээрэ ааяма халуун уларил тогтожо, ойн түймэрнүүд дахинаа һүжэржэ эхилээ. Үнгэрһэн долоон хоногой эсэстэ Ивалга аймагай Сотниково һууринда дүтэхэнэ ойн түймэр боложо, элүүржүүлгын лагерьта амаржа байһан үхибүүд гэр гэртээ эльгээгдээ.

Июлиин 7-14-эй үдэрнүүдтэ уластамнай 13 аймагта 51 ойн түймэр ушараа гэжэ Ой модоной ажахын уласай агентство мэдээсэнэ. Эгээл аймшагтайнь үнгэрһэн воскресениин үдэшэ болоо гээд мэргэжэлтэд тэмдэглэнэ.

- Ивалга аймагай Сотниково һууринда дүтэхэнэ ой модон соо утаан гаража байна гэһэн мэдүүлгэ июлиин 14-дэ үдэшын 21 сагта ороһон байна. Түймэр саралгын албанай ерэхэдэ, гурбан гектар газарта ой модон дүрэнэ гэжэ элирүүлэгдээ. Тэндэһээнь оройдоол нэгэ модоной зайда “Здоровье” гэһэн санаторно-элүүржүүлгын лагерь оршодог юм. Тиимэһээ амаржа байһан үхибүүдые түймэрэй аюултай газарһаа түргэн шууд гаргаха гэһэн шиидхэбэри абтаа. 129 үхибүүн болон 52 хүн Сотниково һууринай һургуулида болон хүүгэдэй клиническэ больницада абаашагдаа, - гэжэ Ород гүрэнэй Онсо байдалай талаар яаманай Буряадтахи таһагые даагша Евгений Попов хөөрэнэ.

Ой модоной ажахын уласай агентствын хүтэлбэрилэгшын орлогшо Дмитрий Ставниковай хэлэһээр, түймэр саралгада 135 хүн бүхэли һүниндөө хүдэлһэн байна. Ганса Ивалгын ой модоной ажахынуудай хүдэлмэрилэгшэд бэшэ, мүн Улаан-Үдын, Тарбагатайн, Кабанскын, Байгал шадарай ой модо хамгаалагшад түймэр унтараалгада хабаадуулагдаа. Тиихэдэ ой модо бэлдэгшэд баһа туһалаа.

Июлиин 15-да үглөөнэй 8 сагта түймэр тогтоогдоо. Тэрэ саг хүрэтэр гал дүлэн ойн дэбисхэрэй 15 гектар газар “эдинхэй” байгаа. 

Онсо байдалай яаманай Буряадтахи таһагай мэдээсэлэй албанай гэрэл зураг