801
Түрүү аймагуудта үйлэдбэринүүдэйнгээ буйлуулһан эдэй зүйлнүүдтэ олоной анхарал хандуулха гэһэн ажал үргэнөөр ябуулагдадаг. Энэ талаар Мухар-Шэбэр аймагай захиргаан шударгыгаар хүдэлнэ гэжэ тэмдэглэлтэй.
Намарай налгай сагта аймагай захиргаан ямаршье муу-һайн холисогүйгөөр ургуулагдаһан шэнэ ургасын дээжэ хямдаар худалдан абажа, хотоёо жаргуулагты гэжэ үргэн ехэ яармаг эмхидхэдэг. Үбэлэй хүйтэндэ, хабарай хагсууда эдихэ бүдүүн хоолоо бэлдэжэ нөөсэлэгты гэжэ таряа талханһаа эхилээд, хартаабха, элдэбын овощ болон бүхы мяханай зүйлнүүдые дурадхадаг яармагууд үргэнөөр дэлгэгдэдэг. Тиигэжэ ажахынууд ургуулһан, үйлэдбэрилһэн зүйлнүүдээ саг соонь худалдаха, зүгөөр ажаһуугшад тааруу сэнгээр хоол хомогоо бэлдэхэ аргатай болоно.
Мухар-Шэбэр аймагай захиргаан яармагуудаа эмхидхэхэдээ, эгээл олон зоной ябадаг газар шэлэдэг. Энэ удаа “Мухар-Шэбэртэ үйлэдбэрилэгдэһэн” гэһэн яармагаа авто-унаагай буудалай талмайда июлиин 26-да үнгэргэхэ гэжэ тогтоол гаргаа.
Эндэ ганса худалдаа наймаан болоод үнгэрхэ бэшэ. Нютагай ажахынуудай үйлэдбэрилһэн эдеэ хоолой зүйлнүүдэй амтые туршаха дүүрэн арга олгогдохо. Тэрэ аргаар эгээл амтатай, хоолтой, шанартай эдеэ хоол элирүүлэгдэжэ шагнагдаха. Тиигэжэ эрхим шанартай гэжэ бултанда мэдээжэ болохо. Сугларһан зон ганса хотоёо дэбтээгээд байхагүй, үшөө хатар наада хаража, сэдьхэлээ хужарлуулха.
Автор: Сэнгэ РИНЧИНОВ
