808
Буряад Уласай Соёлой яаманай мэдээсэлэй албанай гэрэл зураг
Ц. С. Сампиловай нэрэмжэтэ Уран һайханай музейдэ августын 8-да Инна Нимаевагай түрүүшын үзэсхэлэн нээлгын баяр ёһолол эмхидхэгдэхэ юм.
Буряад уласта һүүлэй жэлнүүдтэ мартагдаад байһан «буряад зураг» һаял һэргэжэ байна гэхэдэ алдуу болохогүй. Инна Гомбоевна энэ шэглэлээр Захааминай хүүгэдэй соёл урлалай һургуулиин Санагын таһагта үхибүүдые һургана.
2006 ондо уран зураашын хуби заяан эрид хубилаа һэн. Тэрэ наһанайнгаа нүхэр, Санагын «Даша Пунцоглин» дасанай лама Лев Нимаевтай ушаржа, дасангуудтай суг ажаллажа эхилһэн юм. Инна Нимаева нютагтаа 8 субаргын шэмэглэлдэ эдэбхитэй хабаадаа. 2008-2008 онуудта 16 метр утатай Калачакра уран зураашын түсэлөөр бодхоогдоо һэн.
Буряад Уласай Соёлой яаманай мэдээсэлэй албанай гэрэл зураг
2015 ондо Инна Нимаева Буряадай гүрэнэй ехэ һургуули дүүргэжэ, нэмэлтэ һуралсалай багша гэһэн мэргэжэлтэй болоһон байна. Тиихэдээ «буряад зураг» шэглэлээр һуралсалай программа байгуулаа һэн. Мүнөө тэрэ программаяа улам мүлижэ, хүүгэдые уран зурагта һургана.
Инна Нимаевагай хэлэһээр, Буряад Уласай арадай уран бүтээлэй түбэй Буддын шажанай «Даши Чойнхорлийн» ехэ һургуулиин уран зурагай багша Чимит ламатай хамта үнгэргэдэг «Основы старобурятской живописи. Буряад зураг» гэһэн семинар-практикумууд ехэ туһатай.
Буряад Уласай Соёлой яаманай мэдээсэлэй албанай гэрэл зураг
Хубиин түрүүшын үзэсхэлэн хадаа дүнгүүдые согсолхо, болоһон үйлэ хэрэгүүд, уулзалгануудые бодотоорнь сэгнэхэ, үнгэрһэн наһаяа эрьен хараха һайхан шалтаг болоно бшуу. Балшар наһаяа һанахадаа, уран зурагта эжымни дурлал түрүүлээ гэжэ мүнөө ойлгоноб гэжэ Инна Нимаева тэмдэглэнэ.
- «Зохёохы замаа олооб гэжэ мүнөө һананаб. Өөрынгөө дурлаһан, һайхашааһан юумэ «буряад зураг» маягаар дамжуулжа шадаха байһандаа жаргалтайб. Эгээл шухалань гэхэдэ, һурагшадтаа дамжуулха, тэдэнээ һургаха аргатайб», - гэжэ Инна Нимаева хэлэбэ.
