Буряадай бүргэд шубуун. Һүрөөтэ түхэлһөөнь сэдьхэлдэм гайхал, бишэрэл түрэдэг. Тон һайхан энэ томо шубуутай анха түрүүн Баргажанай дархан газараар ябахадаа уулзаа һэм. Тиихэдэ аян замайм эхин байжа, орёохон дабалтанууд гаталагдаа бэлэй. Тэрэ гэһээр хэдэн жэл һубарин ошоо. Бүргэдтэй бусад уулзалганууд байгаашье ааб даа. Юундэб гэхэдэ, хадын орьёл руу хараһан харгымни уһа мүрэнэй эрьеэр зубшадаг ха юм. Теэдшье бүргэд шубуу зорюута буулгаха хүсэл бии. Тэрэнээ ерэхэ намар лэ хүсэлдүүлхэб.
Сагаан һүүлтэ бүргэд Буряадта эгээл томо бэетэй арьяата шубуун юм. Эрэ шубууниинь 4 килограмм, эмэ шубууниинь 6,5 килограмм хүрэдэг байна. Бүхы бэень хүри-улаан үнгэтэй, харин оодон һүүлынь лэ саб-сагаан юм. Тиимэһээл сагаан һүүлтэ бүргэд гэжэ нэрлэгдээ. Дэлхэйдэ нилээд дэлгэрэнги - Еврази түбиин бүхы булангаар таранхай. Гэбэшье Буряадта 40 бүлэ бүргэдүүд тоологдоно гээд, эрдэмтэд элирүүлээ. Тиимэһээ сагаан һүүлтэ бүргэдтэй уулзахамнай ехэ хоморой.
Буряадай дэбисхэр дээрэ Байгалай зүүн хойто эрьеэр, Яруунада, Дээдэ Ангарай дэргэдэ иимэ бүргэд шубуу хаража болоно. Гадна Баргажанай талада адаглахаар. 1994 оной июль һарада Баргажанай дархан газарай Амту нуурай дэргэдэ Чехиин эрдэмтэд Ийржи Мликовский П. Лумпе хоёр анха түрүүн сагаан һүүлтэ бүргэд шубуу обёорһон юм. Саашадаа Баргажан голой зүүн эрьедэ оршодог Балан-Тамур нуурай дэргэдэ шубуунай уурхайнь олдоһон. Мүнөө сагаан һүүлтэ бүргэд шубуудые Балан-Тамур, Амту болон Чуригто нуурнуудай хажуугаар харахаар. Баргажанай дархан газарта 1-2 бүлэ бүргэд ажамидардаг. Тэдэниие буулгаха аза талаан намда тудаһан байна.
Сагаан һүүлтэ бүргэд шубуун нэгэл удаа бүлэ байгуулдаг. Эмэ шубууниинь үргэлжэ хоёр үндэгэ, хаа-яа нэгэ гү, али гурбан үндэгэ дарадаг байна. Тиихэдээ 35-40 үдэрэй туршада һуужа, дальбараагаа гаргадаг. Һая бултайһан дальбараань хоёр һарын туршада уурхай соо һуудаг. Ниидэжэ эхилхэдээшье, уурхайһаа холо ошодоггүй. Юундэб гэхэдэ, эжы абань эдеэлүүлжэ байдаг.
Загаһа нугаһаар баян нуурай дэргэдэхи үндэр модоной орой дээрэ бүргэд шубуун уурхайгаа түхеэрдэг гуримтай. Тэрэниие үргээгээгүй һаа, олохон жэлдэ байгуулһан уурхайгаа орхихогүй, үшөө жэл бүри шэнэлэн байха. Томо мүшэрөөр тоб-байса уурхайгаа баридаг юм. Тэрэнь саашадаа бүри үргэн болошодог.
Нуурай эрьедэ ажамидардаг тула, гол түлэб загаһаар бэеэ тэжээдэг. Загаһа оножорхибол, шууд доошоо ниидээд, нюдэ сабшаха зуура барижархидаг. Хэрэг гарабал, уһан руу шунган ороод абаха. Агнуури хэхыень харахада ехэ һүрөөтэй. Агнууриин үедэ алдахыень арай хараагүйб.
Мүнөө дээрээ сагаан һүүлтэ бүргэд Ородой Холбоото Уласай Улаан дэбтэртэ оруулагданхай. Уһа мүрэнэй шэргэжэ эхилбэл, хуули бусаар агнуури хэбэл, иимэ бүргэд шубуун үсөөржэ магад. Теэдшье Буряадай дархан газартал ажамидардаг хадаа бүри олон болохо бэзэ гээд найданаб.
Александр ГАРМАЕВАЙ гэрэл зураг