​Буряад уласай Захаамин аймагта шэнэ үйлэдбэри нээгдэбэ

“Закамна Агропродукт” гэһэн эмхи мяханай үйлэдбэриин таһаг нээбэ. Буряад Уласай Засагай газарай Түрүүлэгшын орлогшо, хүдөө ажахын сайд Дабажалсан Чирипов энэ эмхиин ажаябуулгатай та­нилсаба.

Химиин ямаршье холисогүй мяхаар бүтээгдэһэн эдеэнэй 10 янзын зүйлнүүдые эндэ үйлэдбэрилнэ. Ти­игэжэ аймагай ажаһуугшадые ажалтай болгобо.

Хүдөө ажахын кооперативай түрүүлэгшэ Туяна Цыренжаповагай хэлэһээр, эндэ үдэрэй туршада 312 килограмм мяхан болбосоруулагдажа, наймаанда ябуулагдаха, һургуули болон хүүгэдэй сэсэрлигүүдтэ тараагдаха.

2016 ондо тус эмхи Буряад Уласай хүдөө ажахын яаманай шугамаар 2 сая 400 мянган түхэриг гүрэнэй дэмжэлтэдэ хүртөө бэлэй. Тиихэдээ һүнэй үйлэдбэри байгуулһан юм.

2018 ондо Буряад Уласай хүдөө ажахын потребкоо­перациин жасын дэмжэлтээр 1 сая 500 мянган түхэриг туһаламжа абажа, һү ба мяханай үйлэдбэри байгуулжа захалаа. Саашадаа энэ кооператив огородой ургамал буйлуулжа эхилхэ түсэбтэй.